Bagabīji 19 - Bibilia Ilagano Lya Kale 2015

Shilagīlo sha mbika ningī

¹ Ū SEEBA ūng'wīla ū Musa,

² Bawīlage pye a Baisilaeli gīkī, “Bizagi beela nguno ū nene SEEBA Mulungu wing'we nalī ng'wela.

³ Būlī ūmò wing'we ankūje nina na ise; nī shilagīlo shane sha Sabato mushikūje. Ū nene nalī SEEBA Mulungu wing'we.

⁴ Yaya kūgalūka mukandya kūlondeela bamulungu bangī; yaya nūūlū kwibeegeja shiikolile sha kūsula sha kūlamiwa. Ū nene nalī SEEBA Mulungu wing'we.

⁵ “Ūlū ng'ūmfunīja ū SEEBA shakwinha sha būsangī, shisīnzagi mu mbika īyo shikwanukūlwa kūlwa nguno ying'we.

⁶ Ī shakwinha shenīsho shilī sha kūlyiwa lūshikū lwenūlo ng'washifunījaga, nūūlū ū lwa ntondo yaho; shose shose īsho shilasaage kūshisha kū lūshikū lwa kadatū, ī shenīsho shiigelile kūpemva mu moto.

⁷ Ūlū shose shose shūlyiwa kū lūshikū lwa kadatū lwaaho, shitanukūlwa, nguno shasosohalaga.

⁸ Būlī ng'wene ū wa kūshilya akūbalīlwa būkenaagūji, nguno wagimaga kwīta mhayo ūyo agūlemegije SEEBA; ū munhū ng'wenūyo shiigelile akomanyiwe wīnjiwe ū mu banhū bakwe.

⁹ “Ūlū ng'ūgesa ī shilīīwa ū mu migūnda ying'we, yaya ū kūpūmbīlīja kūshisha kū mbīmbī ja malaale ging'we, yaya nū kūshishokeela īsho shilīsaagīīla ū mu magesa ging'we.

¹⁰ Nū mu migūnda ying'we ya mizabibu, yaya ū kūbīta mo ng'hangala ibīlī mukūhūlūlaga pye gete a matwajo; ayo galīyūlagala hasī ūlū mulīgesa yaya ū kūgasoleela. Ng'ūgaleka baayūsoleela nabo a bahabī na bageni. Ū nene nalī SEEBA Mulungu wing'we.

¹¹ Yaya kwiba, yaya kūlomaloma, yaya kwinyeekeja.

¹² “Yaya kūlahīla nyamaama mu lina lyane, na kūlīsosohaja ī lina lya ng'wa Mulungu wako. Ū nene nalī SEEBA.

¹³ “Yaya kūsola shikolo sha nzenganwa ng'wiyo mu nyasalasala. “Yaya kūdimīīla mheela ya ntūmami wako būjikū pe, kūshisha ha ntondo dilū.

¹⁴ “Ū munhū ūyo atigwaga ūtizūndūka, nūūlū ū mhokū yaya kūntega kīīnhū sha kwipama; ng'ogohage Mulungu wako. Ū nene nalī SEEBA.

¹⁵ “Yaya ū kūbiza na būsolaanhya ū kūbalamula a banhū ūlū balī na mihayo; yaya kūngunīja ū ng'hūbi kūlwa nguno īkī ng'habī, hama yaya nūūlū kūgwīīla kū lwande lwa nsabi. Alīyo namulage būlī munhū mu būtūngīlīja.

¹⁶ “Yaya kūja ūkūbībaga mihayo ya būlomolomo mu banhū ba ng'wing'we; nūūlū kūlembekeja nzenganwa ng'wiyo mihayo ya kūng'wingīja mu nhabaala. Ū nene nalī SEEBA.”

Shilagīlo sha kwitogwa

¹⁷ “Yaya kūnkolwa nzenganwa ng'wiyo mu ng'holò yako, alīyo ng'wīlage hape ū būhūbi wakwe, ūtizūgwa ū bebe mu būhūbi kūlwa nguno yakwe.

¹⁸ “Yaya kūūmalīla ng'wiyo shiilī, nūūlū kūng'wikanwa ose ose ū mu banhū ba ng'wing'we; alīyo ntogagwe ū nzenganwa ng'wiyo gīt'ūmo witogelilwe bebe ng'wenekīlī. Ū nene nalī SEEBA.

¹⁹ “Gadimagi a malange gane. Yaya kūlekela mitugo jiibyale na jitī ja mbika īmò najo. “Yaya kūhamba mbīyū ja mbika ibīlī mu ngūnda gūmò. “Yaya kūzwala shizwalo sha būlūba wa mbika ibīlī būsangīlīgije hamò.

²⁰ “Ūlū ngosha ūlaala na ng'wanikī nsese ūyo alūnjiwe na ngosha ūngī, alīyo ataalī ū kūtaligūlwa ū mu būsese bokwe, būbīlī wabo bakwinhwa nsango. Gwike batūbūlagwa, nguno ū ng'wanikī ataalī ū kūtungūlwa ū mu būsese.

²¹ Alīyo ū ngosha ng'wenūyo akūlyiwa ihyū, enhe ng'ondi ya ng'holo kū nyango gwiheema lya kwibilingīla, īfunyiwe kū būtongi bo ng'wa SEEBA kūbiza shitambò sha kwihīga.

²² Ī ng'ondi yenīyo akwītūmamīla ngabīji kūbeeja isangī kū būtongi bo ng'wa SEEBA, kūlwa nguno ya shibi shakwe īsho washītile ū ngosha ng'wenūyo; hūna akūlekejiwa ī shibi shakwe.

²³ “Ūlū mulingīle ū mu sī yenīyo, ntī gose gose ū gwa matwajo ūyo ng'ūgūhamba, ū mu myaka idatū ya kwandya gūbalagi gīkī gūlemejiwe ū kūlyiwa.

²⁴ Ū mu ng'waka gwa kanè pye a matwajo ga ntī gwenūyo gakūbiza shakwinha sheela kūlwa kūnkumīlīja SEEBA.

²⁵ Alīyo ū mu ng'waka gwa kataano, mukwandya kūgalya a matwajo ga ntī gwenūyo. Ū mu gīko hū mukūpandīka matwajo mingī kūtinda. Ū nene nalī SEEBA Mulungu wing'we.

²⁶ “Yaya kūlya ī nyama īyo mininga gayo gatidīkile. “Yaya kūtūmamīla būchembi bo ngoko, nūūlū būlogi.

²⁷ “Nū kūgeeng'ha ī nzwīlī jing'we yaya; hama yaya nūūlū kūmoogeela ndezu ū mu mhelo mhelo.

²⁸ “Yaya a bing'we ū kūteng'wa salago kūlwa kūbizūkwa abo baamala kūcha; nūūlū kūteng'wa būgomoola yaya. Ū nene nalī SEEBA.

²⁹ “Mutizūgema kūbasosohaja a bashīke bing'we mu nzīla ya kūbalanga kikalīle ka wīmīlīzu; ūlū ng'wīta gīko ī sī īkookala būsoso kūlwa mihayo ya witongeleja.

³⁰ “Ī shilagīlo shane sha Sabato shidimagi n'ikūjo; nī lipandī lyane ī lyeela mulītūūlīle logohano. Ū nene nalī SEEBA.

³¹ “Yaya kūyūja kū bachūūja, nūūlū abo basendamīlile nguzu ja masamva; nguno ūlū ng'wīta gīko bakūmusosohaja. Ū nene nalī SEEBA Mulungu wing'we.

³² “Binhagi ikūjo a bataale, muyūbūūka ū kū būtongi wabo, ng'ūbakūja a bakūla kale; ng'ogohagi ū Mulungu wing'we. Ū nene nalī SEEBA.

³³ “Yaya kūng'wītīla nsambo ngeni ose ose, ūyo wiza kwikala hamò ning'we mu sī ying'we.

³⁴ Īyo mukūbīītīlaga a bana byalwa, nū ngeni ūyo akwikala hamò ning'we, ng'wītīlagi gīko nū ng'wene. Ntogagwi gīt'ūmo ng'witogelilwe bing'we benekīlī, nguno na a bing'we ng'walī bageni mu sī ya Misili. Ū nene nalī SEEBA Mulungu wing'we.

³⁵ “Yaya kūchaamya mhayo gose gose ūlū mulīfunya būlamuji, ībize mu kalolele ka būlīīhu wa shikolo, nūūlū mu kagelekele ka būdito na wingī washo.

³⁶ Ī gapani jing'we ja kūpimīla jibize jitūngīlīgije, na a mawe ging'we ga kilo gabize ayo gigeleelilwe. Nī ngelekelo jing'we, ī efa nī hini, jibize jitūngīlīgije. Ū nene nalī SEEBA Mulungu wing'we, ūyo akang'wīnja mu sī ya Misili.

³⁷ “Kadimagi a katongeelele kane nī shilagīlo shane pyī ī shose, nīyo mushimīzīle musho. Ū nene nalī SEEBA.”