Bagabīji 1 - Bibilia Ilagano Lya Kale 2015

Shitambò sha kūpemva

¹ Ū SEEBA ūnyombya ū Musa kūfuma ū ng'wiheema lya kwibilingīla, ūng'wīla,

² shitambò kūlwa ng'wa SEEBA, ni enhage ntugo kūfuma ng'widaale lya ng'ombe, nūūlū lya ng'holo na mbūli.

³ Ī shakwinha shakwe ūlū alīfunya ng'ombe kūbiza shitambò sha kūpemva, akūfunya nzagamba ītī na būka. Akūyenha ha nyango gw'iheema lya kwibilingīla, yanukūlwe kū būtongi bo ng'wa SEEBA.

⁴ Hanuma akūtūūla nkono gwakwe a ha ntwe gwa ntugo gwa shitambò sha kūpemva shenīsho, hū shikwanukūlwa ha ng'wanya gwakwe, kūlwa nguno ya kūmeegeja isangī.

⁵ Hanuma ya henaho, ī ng'ombe yenīyo akwīsīnza kū būtongi bo ng'wa SEEBA; a bitūnja ba ng'wa Alooni, a bagabīji, bakūgenha a mininga gayo bagaseeseebele kū mhande jose ja ng'walīlo ūyo gūlī a ha nyango gwa h'iheema lya kwibilingīla.

⁶ Hūna ī ng'ombe ya shitambò sha kūpemva yenīyo akwībaaga, hanuma ībutagūle mapingili mapingili.

⁷ A bitūnja ba ngabīji Alooni bakūtūūla moto a ha ng'walīlo, būgūkūbīkīīla ng'hwi.

⁸ Hanuma a bitūnja ba ng'wa Alooni a bagabīji, bakūgatūūla a mapingili ga nyama yenīyo higūlya ya ng'hwi jilībaka moto a ha ng'walīlo; nū ntwe bakūgūtūūla ho, pye na a masazu.

⁹ Alīyo ī sha mu nda nī chūūga akūshooja tame mu minzī; hama ū ngabīji akwīpemba pyī ī nyama ya ng'ombe yenīyo ha ng'walīlo. Shilī shitambò sha kūpemva, shitambò sha kūfunyiwa mu nzīla ya moto; sha ng'waso gwa kūnyeja SEEBA.

¹⁰ Ī shitambò ūlū shifumile ng'widaale lya ng'holo nūūlū mbūli, akūfunya ng'osha ītī na būka.

¹¹ Akūyenha kū būtongi bo ng'wa SEEBA, kū lwande lwa sukuma ya ng'walīlo wīsīnzīle kwenūko; hūna a bitūnja ba ng'wa Alooni a bagabīji bakūgaseeseebela a mininga gayo ha ng'walīlo, kū mhande jago jose.

¹² Hanuma akwībbutagūla mapingili mapingili, hūna ū ngabīji ūgatūūla higūlya ya ng'hwi jilībaka moto a ha ng'walīlo; nū ntwe akūgūtūūla ho, pye na a masazu.

¹³ Ū ng'wenekīlī shitambò akūshooja mu minzī ī sha mu nda nī chūūga, hūna ū ngabīji akūshenha pyī ī shose ha ng'walīlo ashipembe. Ī shenīsho shitambò sha kūpemva, shitambò sha kūfunyiwa mu nzīla ya moto; sha ng'waso gwa kūnyeja SEEBA.

¹⁴ Ī shitambò sha kūpemva ī sha kūmfunīja SEEBA, ūlū noni akūfunya ng'hūūlū, nūūlū ng'hune ya mhunda.

¹⁵ Ū ngabīji akūyenha ha ng'walīlo, ūyīmyoola ī nhingo, ūgwīnja ū ntwe gwayo, ūgoocha ha ng'walīlo; a mininga gayo gūūsūlūlūkījiwa ha ng'walīlo mu kabazu.

¹⁶ Ī lisogejo akūlyīnja na a yayo galīmo ū mu gatī yalyo, ūlīponya ha kīya ya ng'walīlo aho gakaponejiagwa mabu.

¹⁷ Ī noni yenīyo akwīdimīla kū manana wītandūla, gwike yaya ū kwīlekanya gete; hūna ū ngabīji akwīpemba ha ng'walīlo, a higūlya ya ng'hwi ījo jilī mu moto. Ī shenīsho shitambò sha kūpemva, shitambò sha kūfunyiwa mu nzīla ya moto; sha ng'waso gwa kūnyeja SEEBA.