Bafilipi 2 - Bibilia Ilagano Lya Kale 2015

Bazunya shibigelile kwidohya

¹ Hūna lūūlū ūlū būlīho būganikīji bose bose mulī Kilisito, nūūlū būtogwa bose bose ūbo būshikile kūlūngūja, nūūlū būsangī bose bose mulī Moyo, nūūlū kwisaatwa na kwikūlīlwa;

² būshikīlījagi ū būyegi bone. Bizagi na widomanīja ū mu maganiko, hama mubize na būtogwa bo mbika īmò; nīyo hangī mubize nang'holò īmò na long'we īmò.

³ Yaya ū kwīta mhayo mu kūkooba ikūjo nūūlū mu wikumīlīja, alīyo mubize bidohya, būlī ng'wene ibone gīkī alī ha sīlīlī ya biye.

⁴ Hama yaya kūyūdīlīla būlī munhū yakwe dūhū, ng'ūdīlīla nī ya bangī.

⁵ Ning'we bizagi nalyo ī liganiko īlo walī nalyo ū Kilisito Yesu;

⁶ ūyo nūūlū īkī alī Mulungu waho na kale, alīyo ū mhayo gwa kūlenganīla na Mulungu atagūbonile gīkī gūlī gwa kūmīīlwa.

⁷ Akizuula wei ng'wenekīlī ī likūjo lyenīlo, ūsola kūbiza nsese, ūbiza mu suso ya banhū. Ūbiza alī munhū.

⁸ Ūbiza ng'widohya no, hangī ng'wigwi; kūshisha ūzunya kūcha lūfu lo ha nsalaba.

⁹ H'ī nguno yene ū Mulungu akangūngūhya higūlya no no no, ūng'winha lina īlo līkīlile mina gose;

¹⁰ gīkī ī shiseeng'wa shose na shose, Īsho shilī ng'wigūlū nī sha ha sī, nī sha mu gatī ya sī, shilītugīje mazwi ī lina lya ng'wa Yesu.

¹¹ Na būlī lūlīmi lūhabūle hape gīkī Ū Yesu Kilisito alī Seeba, kūlw'ikūjo lya ng'wa Mulungu Sīswe.

Kwaaka gītī isana mu sī

¹² Nose hū kūhaya gīkī badūgū bane batogwa, ongejagi ū kūbiza bigwi, gīt'ūmo mukwītīlaga na kale, ītī kūgonga nabize nalīho dūhū ū nene, alīyo ī no no no ī haha aho natīho; būlwīlīlagi bing'we benekīlī ū būpīji wing'we, mu logohano na kūdetema.

¹³ Nguno ū Mulungu akūtūmamaga ū mu bing'we, hū ng'wene ūyo akūng'winhaga būkalalwa, hamò na būdūla bo kwīta īyo yīnyegije.

¹⁴ Hūna lūūlū ng'ūbeeja pyī ī yose mu būtūduguma nūūlū halalī.

¹⁵ Mubize mutī na shilingo nūūlū būbi, baana ba ng'wa Mulungu abo batī na shisembo, nūūlū ū ng'wikanza īlo mukwikalaga hamò na shibyalīlwe shikenaagūkile na shilyūngūmile; īsho mukūng'weka ng'wekaga musho gītī kūng'weka kwa sonda mu sī.

¹⁶ Hangī nīyo gūhandatīlagi ū mhayo gwa būpanga, nalapandīke sha kūyegela a ha lūshikū lo ng'wa Kilisito, gīkī gashinaga natanogile kūtagamba dalali.

¹⁷ Alīyo ī haha nūūlū būkitwa ū būpanga bone gītī shitambo na shitūmamīlo kūlwa nguno ya kūzunya kwing'we, nalī na būyegi; hangī nalīyega hamò ning'we pye a bose.

¹⁸ Na a bing'we shing'wigeleelilwe kūyega, na ng'hana yegagi hamò nane.

Timotheo na Epafradito

¹⁹ Ali lūūlū, nalī na kwisagīlwa mulī Seeba Yesu gīkī, nakūntūma Timotheo ize wangū ū kū bing'we, nane nīmane ī mihayo ying'we, nayege.

²⁰ Nguno natī na munhū ūngī wa kūlenganīla nang'hwe, ūyo adūgije kwīdīlīla mu welwa ng'holò ī mihayo ying'we.

²¹ Pye a bangī bakwikoobelaga yabo dūhū, ītī ya ng'wa Kilisito Yesu.

²² Alīyo ū wei muumanile ī nhūngwa jakwe, nī gīkī ū nene nū wei twalī hamò ū mu kūgūtūmama ū nīmo gwa Ng'hūlū Jawiza, gītī munhū na ng'witūnja wakwe.

²³ Hūna lūūlū, nalī na ng'hūmbū ja kūntūma wangū ūlū nalamane ūmo īlījīla ī mihayo yane.

²⁴ Alīyo nalī na kūsanya mulī Seeba gīkī, nū nene natūdīla ū kwiza ko.

²⁵ Gwike ī haha īlīnigeleelwa nantūme atonge ū kwiza koi ū ndūgū wane ū Epafradito, ū ntūmami na nshilikale ng'wichane; ūyo alī ntūng'wa wing'we kūlwa kūnigunanha.

²⁶ Nīyo wamukūmbūlile no pye a bose, hama akūkoyaga ū mu maganiko īkī ng'walī ng'wigwile gīkī walī wasaatile.

²⁷ Na ng'hana walī wasaatile no, nīyo lya mandetendete hihī na kūcha, gwike ū Mulungu akankūlīlwa, hangī nīyo ītī wei dūhū, alīyo nū nene ng'wenekīlī, gīkī natizūpīnīhala nakakīlanīja.

²⁸ Hūna lūūlū, ī haha nalīntūma hangī ū kū bing'we, mu kwisagīlwa kūtaale gīkī mukūyega ūlū mulamone, nane būnigehele ū būpīna.

²⁹ Hū kūhaya ng'wanukūlagi mulī Seeba na būyegi bose; nīyo a banhū ba mbika īlī gīko ng'ūbakūja.

³⁰ Nguno walī wendil'ūcha kūlwa nīmo go ng'wa Kilisito, akaweega ū būpanga bokwe gīkī ayīshikīlīje īyo mukalebya ho a bing'we ū mu kūnigunanha.