Baefeso 4 - Bibilia Ilagano Lya Kale 2015

Būmò wa mīlī go ng'wa Kilisito

¹ Nose lūūlū nalīng'wikūmbīlīja ū nene ūyo nalī ntungwa kūlwa ng'wa Seeba, mushimīze gīt'ūmo kalī kitanīlwe king'we ako ng'witanwa mubize mo.

² Bizagi bidohya no no no na balyehu, na mubize biyūmīlīja; ng'wikondele bing'we kū bing'we mu būtogwa.

³ Mukalalwe ū kūbūlang'hana ū būmò ūbo mulī nabo kūfuma kūlī Moyo, būdaamiwe mu nguzu ja mhola.

⁴ Gūlīho mīlī gūmò, na alīho Moyo ūmò gīt'ūmo nū kwisagījiwa kwa kitanīlwe king'we kūlī kūmò.

⁵ Alīho Seeba ūmò, kūzunya kwa mbika īmò, būbatīījiwa būmò;

⁶ na Mulungu ūmò, ūyo alī Sīswe pye a bose, hangī alī higūlya ya yose, na akatūmamaga mu bose, nūwe alī mu bose.

⁷ Alīyo būlī ūmò wise winhwa shakwinhwa kūlenganīla na kanong'hele ka ng'wa Kilisito.

⁸ H'ī nguno yene ū mhayo gūhayile gīkī, “Aho walinha kwigūlya ūdima nding'wa, ūgabanhya banhū shakwinha.”

⁹ (Ī gīsī ūyo akalinha, nani ūlū atī ng'wene ūyo akika kū mhandī ja kū sīlīlī ya sī?

¹⁰ Ūyo akika ng'wenūyo hū ng'wene ūyo akalinha kwigūlya kūkīla pye a mapandī ga ng'wigūlū, gīkī okale mu shose pye hose hose).

¹¹ Hū ng'wene ūyo bangī akabinha kūbiza batūng'wa, bangī bahangi, bangī balomeeji ba Ng'hūlū Jawiza, bangī badīīmi na balangi,

¹² kūlwa nguno ya kūbashikanya a beela, būbize ho būdūla bo kūgwīta ū nīmo, ū mīlī go ng'wa Kilisito gūzengwe.

¹³ Kūshisha pye a bose tūbize na būmò ū mu kūzunya, nū mu kūmana ū Ng'wana wa ng'wa Mulungu; kūshisha tūkūle tūshike mo ū ng'wilika lya būshikanu bo ng'wa Kilisito.

¹⁴ Twīnge ū mu būnīgīnī, tooye ū kwikala tūpelengetiwa na kūtwalanījiwa na miyaga ya malange ga būlī mbika, nūūlū kūjananījiwa na banhū mu nyasala sala na būlemba lembi wabo.

¹⁵ Alīyo tūbize ba kwīhaya ī ng'hana mu būtogwa, hama tūkūle mu yose ū mulī Kilisito ūyo alī Ntwe.

¹⁶ Ū mulī we ū ng'wenūyo pyī ū mīlī gūdimanyiwe hamò, gūkūbanījiwa mu nzīla ya nge ja būlī mbika ījo jilīho. Hūna lūūlū gūkūkūlaga na kwizenga mu būtogwa kūlwa būgunanhi wa būlī ibudīka, kūlenganīla na būdūla bo katūmamīle kalyo.

Shimīzīle ya kale na shimīzīle mhya

¹⁷ Hūna lūūlū nalīmuhūgūla mu lina lya ng'wa Seeba gīkī, yaya a bing'we ū kūshimīza gīt'ūmo banhū ba mahanga bakashimīzīlaga; mu būbi bo maganiko gabo.

¹⁸ A bene a masala gabo galī mu giiti, nīyo bakomanyiwe, batīmo ū mu būpanga bo ng'wa Mulungu kūlwa nguno ya būtūmana wabo na būgang'hanazu wang'holò jabo!

¹⁹ Bazunije mīlī ngima kūshimīzīla mu nzīla ja minala, na kūbeeja milīmo misoso ya kwikūmva kwa malofu kwa būlī mbika; nguno bagūnu, īng'holò jabo Jachatambalaguna!

²⁰ Alīyo a bing'we mutilangile gīko ū kūfuma ū kūlī Kilisito,

²¹ ūlū mubize ng'hana ng'wigwa, nū kwilanga ng'wilanga kūfuma kūlī wei, gīt'ūmo īlī ī ng'hana ya ng'wa Yesu.

²² Lekanagi najo ī nhūngwa jing'we ī ja kale, ī ja mu būmunhū bo kale, ījo jikongejaga kūkenaagūka kūlwa nguno ya būlemba lembi wa kwikūmva;

²³ Mugalūke mubize bapya ū mu nhūngwa ja maganiko ging'we,

²⁴ muzwale būmunhū būpya, ūbo būbeejiwe gīt'ūmo Mulungu atogelilwe; ūbo būlī mu shītwa sha būtūngīlīja na wela bo ng'hana.

Kashimīzīle kapya ūmo kalī

²⁵ Nose lūūlū lekanagi nabo ū būlomolomo, ng'wiwīla ya ng'hana būlī munhū na nzenganwa ng'wiye, nguno tūlī mīlī gūmò go ng'wa Kilisito.

²⁶ Nūūlū mukapelana, ilang'hanagi mutizīīta shibi; ī līīmi litizūgwa mutaalī mupelanile.

²⁷ Yaya ū kūng'winha ng'wanya ū Ng'wanishi.

²⁸ Ū ng'wibi ni oyage ū kwiba, hambū hambū atūmame na makono gakwe milīmo misoga, apandīke sha kūbagunanha abo balī na makoye.

²⁹ Mhayo nsoso gose gose gooye kūfuma ū mu milomo ying'we, alīyo ū gwawiza gūhayagi kūlwa kūzenga aho būlīho būgehelwa, gūbazenge a badegeleki.

³⁰ Yaya ū kūmpīnīhaja ū Moyo Ng'wela o ng'wa Mulungu, nguno ū mulī we mumeng'hilwe kūlwa lūshikū lo kūkomoolwa.

³¹ Pye ū būkalahu nū būpelanu, nū būyombo nū būdalahīja, nīyo pyī ū būbi bose na bose būponyagi wīnge gete ū mu bing'we.

³² Ilyehelagi, mubize biza ng'holò na banhū ba kwilekeja, gīt'ūmo Mulungu wamala kūmulekeja a bing'we mulī Kilisito.