Ayubu 40 - Bibilia Ilagano Lya Kale 2015

¹ Hūna ū SEEBA ūng'wīla ū Ayubu,

² “Ū ng'halalī ng'wenūyū atogilwe kūnanga nū Ndūji wa shose? Alilūūlū, ūyo akūnsaayīlaga Mulungu ni ang'winhage ishosho!”

Ayubu kwidoohya kūlī Mulungu

³ Hūna ū Ayubu ūnshokeja ū Mulungu gīkī,

⁴ “Ū nene natī shikolo shose shose, numho nakūkūshokeja mhayo kī? Naahuumūla ī haha!

⁵ Naalūngalūngaga kamò, hangī natī n'ishosho, naashishaga ng'hangala ibīlī, natī na gūngī gwa kongeja.”

⁶ Hūna ū Seeba ūlūngalūnga nū Ayubu kūfuma mu nshūūlūlū; ūhaya gīkī,

⁷ “Alilūūlū itungage nyagosha widadīle, leka nakūbūje, shikwigeleelilwe ūnishokeje.

⁸ Ū bebe ūkūdalahaga būlamuji bone? Ūlīnisola būbi ū nene gīkī ū bebe wibalīle būtūngīlīja?

⁹ Ū bebe ūlī na nkono gītī go ng'wa Mulungu, nī lilaka lyako līdūgije kūpalalūka gītī lyakwe?

¹⁰ Al'ikundīkījage ikūjo na būtaale, ūzwalīle būkumīlījiwa na magaka!

¹¹ Būkundūlīlage ū būdaki wa būpelanu wako; ūyūnola būlī ng'wene ū ng'wikumīlīja wandooheleja.

¹² Būlī ng'wikumīlīja nolage ūng'wiche ha sīlīlī, a bahūnga ūyūbapandagīla aho bīmīīlile.

¹³ Bajīkage mu lūbuubu pye a bose; ū būshū wabo ūbūkundīkīje mu gatī ya shigila.

¹⁴ A henaho ū nene hū nakūkaanīla gīkī, ‘Ū nkono gwako ū gwa būlyo gūdūgije ū kūkūpīja.

¹⁵ Īyiganikage ī ngubū ya mu nyanza, Īyo nībeeja gīt'ūmo naakūbeegeja bebe, ī yoi īkalyaga maswa gītī ng'ombe.

¹⁶ Īlī na nguzu no ū mīlī gwayo, nī nda yayo īlī na būdūla būtaale.

¹⁷ Ū nkīla gwayo ndaamu gīt'itambī lya manga; a matimba ga mu ng'hunu jayo gidosile kīngī nasho.

¹⁸ A maguha gayo gabange mapūūgījo ga chūma sha shaba, a magūlū gayo galī gītī myīsī ya shisīnza.

¹⁹ Ī yoi h'ī ya kwandya ū mu shiseeng'wa sha ng'wa Mulungu, alīyo ū meeja wayo adūgije kwīyegeela na lūshū lwake.

²⁰ Ī shilīwa shayo īkapandīkaga kūfuma mu matūmbī, ūko shiinū jose ja mu masaka jikigusījaga.

²¹ Ū būtūūgījo wayo mu mbeho ja mantī, Īkibisaga mu malūtende, yalembeela mu madete.

²² Mbeho ja mitī migiitu hū būhooyelo wayo, magobeko ga mu mongo gakīshīkījaga.

²³ Ū mongo h'ūmo gūseesele Ī yoi ītibakīlaga; ī yoi īlī mhola no nūūlū mongo gwa Yolodani gūfuule kūshisha kū ngegu,

²⁴ Nani wa kūdūla kwīgwasha n'ilobo, nūūlū kwīchima mu mūūlū īlī mu lūbeto?’”