Ayubu 37 - Bibilia Ilagano Lya Kale 2015

¹ Ū mu mhayo gwenūyū ī ng'holò yane īlītininhīla, nīyo īlibakīla gītī īlīhaya kūfuma.

² Degelekagi! Degelekagi mugwigwe ū ng'hilimo gw'ilaka lyakwe, ū numī ūyo gūlīfuma mu nomo gwakwe.

³ Ī ndabi jakwe akajilasaga kūja hose pye a ha sīlīlī y'igūlū, akajitūmaga hose hose kūshisha kū būgelelo bo sī.

⁴ A ha numa yaho līkizaga ilaka lya ng'hilimo gwakwe, wapalalūka mu magaka g'ilaka lyakwe, ū ng'hilimo gwakwe ūlū gwahilima akajilekelaga pyī ī ndabi.

⁵ Ī lilaka lya ng'wa Mulungu līkapalalūkaga mu mbika ja kūkumya, īyo akībeejaga mitaale īkīlile a ha būdūla bo kwitegeleja kwise.

⁶ A minzī ayo gibūmbile akagalagīlaga, “Idīkagi ha sī!” Ī liswalala nū nzumbī akashilagīlaga alīhaya, “Bizaga mbula nhaale!”

⁷ A banhū akabalechaga ī milīmo ya makono gabo, kūlwa gīkī pye abo balī shiseeng'wa shakwe bashimane ī shītīle shakwe.

⁸ Ī shiinū najo jikibisaga jalembeela mu mahalo gajo.

⁹ Ī mbula ya nyaga īkidīkaga īfumile mu wikalo wayo, ī mbeho nayo īkabībagwa na miyaga ūlū īkūhembaga.

¹⁰ Ī myūyī ya ng'wa Mulungu Īkagafuulīlījaga a minzī gibūmba, na ng'hana a minzī h'ūmo gakwīlīle gakūūmaga gīt'iwe.

¹¹ A malunde akagabbakīlījaga minzī gabunīka, wajitūma ī ndabi jakwe jagasambaalīla pye a gose.

¹² Kūlwa katongeelele kakwe gakajaga gakūyeela yeelaga a higūlya ya sī pye a hose, gakwīshikīlījaga īyo alagīlile kūlwa shiseeng'wa shakwe.

¹³ A malunde akagenhaga kūlwa kūbinha nsango banhū, nūūlū kwīyisīīla ī sī gīkī ooleche būtogwa bokwe.

Kwīyideedeng'hanya milīmo yakwe

¹⁴ Degelekaga Ayubu, yīyī mihayo; lembeejaga a maganiko wīyideedeng'hanye Ī milīmo ya ng'wa Mulungu ī ya kūkamaaja.

¹⁵ Ūmanile ū Mulungu ūmo akagatongeelaga a malunde, nī ndabi jakwe ūmo jikalabījaga?

¹⁶ Ūmanile īsho shikagalang'hanaga a malunde ūlū galembeelile ū ng'wigūlya? Ī yenīyo h'ī milīmo yakwe ya kūkamaaja, ū wei ūyo alī nshikanu mu būmani.

¹⁷ Ū bebe ūyo ūkazwalaga shizwalo hūna wazwanjiwa lūyīlo, nguno yalembeelaga ī sī kūlwa būsebu bo nyaga gwa dakama,

¹⁸ ūdūgije nang'ho ū kūngunanha kūlyamba ī ligūlū, na kūlyīta līgūlūngīle gīt'ilole lya shaba ībītije mu moto?

¹⁹ Tūwīlage shi ī ya kūng'wīla; a bise tūtī na gwa kūng'helela nguno tūlī mu giiti.

²⁰ Awīlwe gīkī natogilwe kūyomba? Alīho munhū kī akikūmbagwa kūkenaagūlwa?

²¹ A banhū bakalemeelagwa ū kūbūlola ū būng'weku w'igūlū ūlū lyūpyagūlwa nyaga lyeela pe.

²² Wiza w'ikūjo gītī lya zahabu būliza kūfuma sukuma, ū Mulungu akizaga ng'wikūjo lya magaka mataale.

²³ Ū Ndūji wa shose alī higūlya no kūlwa būdūla bokwe; ū mu kalamulīle kakwe atiboneelaga kūlwa nguno ya būntūngīlīja bokwe.

²⁴ Hūna lūūlū a banhū bang'ogohile, nguno atabadīlīlaga abo bisanije boi benekīlī gīkī balī na masala.