Ayubu 34 - Bibilia Ilagano Lya Kale 2015

Ū Mulungu Namuji Ntūngīlīja

¹ Ū Elihu ongeja ū kūhaya,

² Bing'we banhū ba masala, īdegelekagi ī mihayo yane; tegagi matū munidegeleke bing'we bamani.

³ Nguno ū gūtū gūkīdegelekaga Ī mihayo mu kwīlola, gīt'ūmo lūlīmi lūkalojaga būsandūku bo shilīwa.

⁴ Twīyitegelejagi ī mihayo Īyo ītūngīlīgije, tūsangīle ū kwīyilanga ī yawiza.

⁵ Nguno ū Ayubu akūhayaga, “Ū nene natī na shisembo; gwike dūhū ū Mulungu wanitaagije Ī ng'hana yane.

⁶ Nūūlū īkī nalī ntūngīlīja, alīyo nalībalwa kūbiza ng'hwahwa; nūūlū īkī natī na shilingo, alīyo isonga lyakwe lyanilasile lyūnilekela ilonda lītī lya kūpīla.”

⁷ Alīho munhū kī ūyo abange gītī Ayubu, ū nkweleji w'ibengwe gītī minzī?

⁸ Ū wei a babūbi h'a basūmba biye, na a ba malofu h'abo iinonije nabo.

⁹ Nguno alīyūhaya na gīkī, “Ītīho solobo ū kūlī munhū ū kūnyegela Mulungu.”

¹⁰ Alilūūlū bing'we bitegeleja, nidegelekagi. Gūche gūjimīīle ū gwa gīkī ū Mulungu akīītaga yabūbi, ī gīkī ū Ndūji wa shose akahūbaga.

¹¹ Nguno ū wei akanīpaga būlī munhū kūlenganīla na katūmamīle kakwe; na akang'winhaga būlī ng'wene kūlenganīla na shītīle shakwe.

¹² Ū Mulungu atīko kwīta mhayo gwabūbi gose gose, ū Ndūji wa shose atīko kūchaamya būtūngīlīja.

¹³ Ī gīsī nani ūyo wantūūla a ha nīmo gwa kwīlang'hana ī sī, nani ūyo wang'helela būlang'hani bo sī jose na jose?

¹⁴ Ū wei ūlū ūhaya ashikile kūng'wīnja ū Moyo wakwe pyī nī myūyi yakwe,

¹⁵ a henaho pye a banhū bakūshila, numho gwashika gwa banhū kūbiza hangī lūbuubu!

Ū Mulungu ajibonile ī nzīla ja banhū

¹⁶ Bebe, ūlū ūlī ng'witegeleja gwigwage ūyū, Īdegelekage īyo nalīyīsomboola.

¹⁷ Ūyo atabūtogilwe būtūngīlīja, ashikile kūsuga? Ū bebe ū Ntūngīlīja na wa Būdūla hū ūlīnsola būbi?

¹⁸ Atī ng'wene ūyo akabawīlaga na batemi gīkī, “Ū bebe ūtī na fiilū,” na a basugi gīkī, “Ū bebe ūlī wabūbi,”

¹⁹ ūyo atītīlaga batemi yawiza mu būsolanhya, nūūlū kūbatūūla higūlya a basabi kūtinda bagayiwa? Nguno pye a bose balī nīmo gwa makono gakwe.

²⁰ Bakachaaga wangū no, hamo mu būjikū ha gatī; ng'wene wadetemeela hūna lūgendo. Na a bataale bakajaga nūūlū batakuumiwe na nkono gwa munhū.

²¹ A miso gakwe ū Mulungu gajibonile dūhū ī nzīla ja banhū; nī nhūngwa ja kashimīzīle kabo ajibonile pyī ī jose.

²² Lītīho ipandī lya giiti ūko bakenaagūji badūgije kwibisa, ndūhū nūūlū īkabiza mu giiti sha gamha.

²³ Ū Mulungu atī na nguno ya kūnkūūbīlīja munhū gīkī anshishe kū būtongi bokwe kūng'winha nsango.

²⁴ Na a ba būdūla akabatobagūlaga, watūūla bangī a ha ng'wanya gwabo;

²⁵ Ī nhūngwa jabo ajimanile, na lūūlū akabasīnūlaga makanza ga būjikū baatobagūka.

²⁶ Akabatūlaga bo hape hape nguno ya būbi wabo,

²⁷ kūlwa kooya kūnondeela, na kūleka kūjidīlīīla ī nzīla jakwe pyī ī jose.

²⁸ Nguno ya kwenheleja kūlīla kwa bagayiwa nose kwampandīka ū wei; na ng'hana akakwigwaga ū kūlīla kwa baduki.

²⁹ Alīyo nahene nūūlū ūhuumūla, nani akūkuuma? Ūlū ūbisa būshū bokwe nani ū wa kūmona? H'ūmo akīītīlaga ū kū banhū nūūlū kū mahanga,

³⁰ kūlwa kūng'hangīja munhū ūyo atang'ogohile Mulungu, atizūbasuga a banhū, nūūlū atizūbagwasha.

³¹ Īlī chiza ū munhū kūng'wīla ū Mulungu gīkī, “Nalī ng'hūbi, alīyo natūhūba hangī.

³² Nilangage īyo natadūgije kwībona, ūlū naahūba natūshokeela hangī.”

³³ Ī gīsī ū bebe ūlū ūlema kūhūgūka, ū Mulungu akūkūnong'ha kūlenganīla na katogelwe kako? Bebe ng'wenekīlī lamulaga, natūkūlamulīla nene, hūna ūniwīle īyo wīmanile.

³⁴ A banhū bitegeleja ni bahabūlage, nguno a banhū ba masala abo bakwigwaga bakūniwīlaga gīkī,

³⁵ “Ū Ayubu wabizilūyomba mihayo Ītī ya witegeleja; oyile ū kūtūngīlīja ī mihayo yakwe.”

³⁶ Hambū hambū ū Ayubu agīsīlījiwe chiza īmanwe ī ng'hana yakwe, nguno alīyūfunya mashosho ga malofu no.

³⁷ Nīyo hangī a higūlya ya shibi shakwe, ongegije na būshitiigwa; alīyūtūyombya mu būdalahi kūnū wipaala na makono. Nū Mulungu wankwīgīgīgije no a malang'wa!