Ayubu 32 - Bibilia Ilagano Lya Kale 2015

Elihu kūbawīla banwani ba ng'wa Ayubu

¹ Hūna lūūlū a banhū būdatū wabo benabo, boya ū kūnshokeja ū Ayubu; nguno ū mu maganiko gakwe wibonaga gīkī walī ntūngīlīja.

² Alilūūlū, walīho Elihu ng'wana Balakeli, muna Buzi wa mu lūganda lwa Lamu; ū munhū ng'wenūyo akapelana no, ūmpelanīla ū Ayubu, nguno wihayaga gīkī ū wei hū walī ntūngīlīja, at'ū Mulungu.

³ Na a banwani biye ba ng'wa Ayubu, a badatū akabapelanīla, nguno bakagayiwa ū mhayo gwa kūnshokeja ū Ayubu, nūūlū īkī bamonaga gīkī walī ng'hūbi.

⁴ Ū wei ū Elihu walī wahuumūla, ūbaleka tame a boi būlūngalūnga nū Ayubu, nguno baalī banamhala kūntinda ū we.

⁵ Alīyo aho wabona gīkī ū mu būdatū wabo yabagaya ī ya kongeja kūshosha, akasaaya.

⁶ Hūna ū Elihu ng'wana Balakeli, ū muna Buzi ūshosha ūhaya, “Ū nene nalī ndo ū mu myaka, a bing'we mulī bakūla kale; h'ī nguno yene naalī nogohile natagimile kūfunya īyo nīmanile.

⁷ Naalikalaga niwīla gīkī, ‘Leka bayombe a bakūla kale; abo bakwījaga ī myaka balange masala.’

⁸ Alīyo īsho shikang'winhaga witegeleja ū munhū gūkabizaga moyo ūyo gūlīmo ū mulī we; Ī myūyī ya Ndūji wa shose.

⁹ Ītī gīkī banamhala dūhū h'abo balī na masala; ītī bakūla kale dūhū abo bīyitegelegije Īyo ītūngīlīgije.

¹⁰ Alilūūlū nalīhaya gīkī, ‘Nidegelekagi leki nane nang'winhe Īyo nīmanile.’

¹¹ Naalindanile no aho mukūyombaga, naagadegelekile a maganiko ging'we; aho mukūkooba koobaga mihayo

¹² naalikalaga namudegelekile mu būlembeezu bose. Alīyo ū mu bing'we atilongile nūūlū ūmò wa kūng'olekeja ū Ayubu ū būhūbi bokwe; atilongile nūūlū ūmò wa kūnkala ū mu kalūngalūngīle kakwe.

¹³ Mutizūhaya gīkī, ‘A masala twagapandīkile, Mulungu h'ūyo akūng'hūgūla; atī munhū.’

¹⁴ Ū Ayubu walī atūnisongaga nene ū mu mihayo yakwe, hūna lūūlū ū nene natūnshokejaga mu nzīla ya mihayo ying'we.

¹⁵ Baatūngūlaga, batī na gūngī ū gwa kūshosha, yabagayaga ī mihayo ya kūyomba.

¹⁶ Hū ū kūhaya nalindane dūhū Īkī baahuumūla sele sele; īkī ī haha bīmīīla dūhū batī n'ishosho!

¹⁷ Leka nane nafunye ū būhayi bone; nane nīfunyī īyo nīmanile.

¹⁸ Nguno nokalile pa mihayo, ū Moyo ūyo alī mulī nene alīnikomeleja.

¹⁹ Ī ng'holò yane yatunganile gītī shisaabo shigubbanīgije; gītī shisaabo sha ng'asha yadudumile, Īlī hihī kūshitandūla.

²⁰ Nilekagi nayombe gwike ū moyo; naasamye nomo gwane nahaye.

²¹ Natūyomba mu kūnsolanhya munhū, nūūlū natūng'himbīlīja ose ose.

²² Nguno ū nene natamanile kūtūmamīla mihayo ya kūhimbīlīja, nguno numho ū Mūmbi wane akūnīnja wangū.”