Ayubu 31 - Bibilia Ilagano Lya Kale 2015

Ū Ayubu atī na būsobya, nīyo ng'wela

¹ Ū nene nalaganile nago a miso gane, yaya ū kūkalalīla munhya mu kūng'wikūmvwa.

² Ī gīsī, ū ngabo go ng'wa munhū ū gwa kūfuma kwigūlya kūlī Mulungu gūlī kī? Ū wingīji bokwe bo kūfuma kwigūlya kūlī Ndūji wa shose, h'ī kī?

³ Angū, ītī būkenaagūji ū kū babūbi, na mayanga ū kū bīīti ba mihayo mibi?

⁴ Ī gīsī ū Mulungu atūdūl ū kūjibona Ī nzīla jane? Nī nhaamulo ja kashimīzīle kane pyī ī jose atīko ū kūjibala?

⁵ Ūlū nakashimīzīlaga mu nhūngwa ja nyalomolomo, nū gūgūlū gwane gūūbiza ng'wangū kūlondeela ya būmaama,

⁶ ū Mulungu ni anitūūlage h'ipimīlo lya būtūngīlīja, akūbona gīkī natī na shilingo.

⁷ Ū mu shimīzīle yane ūlū naabīta kūtala nīnga mu nzīla, nūūlū ī ng'holò yane yabīta kūtwalanījiwa na miso gane, nūūlū makono gane gaabīta kūsosohajiwa mhayo gose gose;

⁸ ūlū chene ni bashilyage bangī Ī shilīwa īsho naashihamba nene, nī shisho shizwile ū mu ngūnda gwane ni shidubbagūlagwe.

⁹ Ī ng'holò yane ūlū yabīta kūdutwa na nkīma ūngī, nūūlū naabīta kūja ha nyango gwa nzenganwa nakūguukuubaga,

¹⁰ a henaho ū nke wane ni ajage kūnsheela būsu ngosha ūngī, na bagosha bangī balaale nang'hwe.

¹¹ Nguno ū gwenūyo mhayo gwa magooke no, shibi sha kūng'wenheleja munhū kwinhwa nsango.

¹² Nīyo ū gwenūyo moto ūyo gūkanogotejaga nūūlū mu kūlimu, ni gwanikenaagūja ī shikolo shane.

¹³ Ūlū naabīta kūndalaha ntūmami wane ngosha nūūlū nkīma akūniibūūlīlaga kūlwa kūng'hūba mhayo nebe,

¹⁴ numho nakwīta ginehe ūlū nīmīīla kū būtongi bo ng'wa Mulungu? Nakūshosha mhayo kī ūlū nūbūūjiwa?

¹⁵ Ūyo akanibeeja nene ū mu nda ya ng'wa mayū, atababeegije wei na a boi? Ū meeja wise ū mu nda ja baninise atī h'ūmò ng'wenūyo dūhū?

¹⁶ Ūlū naabīta kūlemeja shikolo Īsho shidūgije kūngunanha ngayiwa, nūūlū naabīta kūng'wenheleja nchīlwa kwisagīlwa mabu ng'wizungu,

¹⁷ nūūlū hamo nabize nakalyaga shilīwa shane iyene, na a babo baashilīlwe babyaji babo natabadīīlīlaga.

¹⁸ Alīyo kūfuma ha walūki bone, ū wa mbika yenīyo nalī neji wakwe ū nene gītī nalī ise, nū nchīlwa nalī nang'hani wakwe kwīngīīla kūbyalwa kwane.

¹⁹ Ūlū naabīta kūmona munhū alībūlagwa būzuuka, nūūlū ngayiwa atī na kachembeho,

²⁰ hūna ī ng'holò yakwe yūleka kūnilūmba kūlwa kūngunanha kūfuma mu booya wa ng'holo jane, ūpandīka kachembeho wikumba ūlūngūja,

²¹ nūūlū kūbūūcha nkono gwane ng'wibanza nalīhangīja būgunanhwa bo mpīna ose ose, aho namanile gīkī nadūgije kūdegelekwa;

²² ūlū īlī gīko ū nkono gwane ni gūtagūkage gwīnge a h'ibega; gūtagūkīle ha lūpī gūlagale.

²³ Nguno ū būkenaagūji bo kūfuma kūlī Mulungu nabogohile no ū nene, natūdūla kwīta mhayo gūlī gīko kūlwa kogoha ikūjo lyakwe.

²⁴ Ūlū ni najisanije zahabu kūbiza ng'winhando gwane, ī zahabu niiza nūūjiwīla gīkī, “A bing'we mulī baguni bane;”

²⁵ nūūlū ni nakayegelaga wingī bo sabo jane, ījo naajipandīka bo makono gane,

²⁶ nūūlū ni nakalībonaga līīmi ūmo līkakangaalīlaga, nūūlū ū ng'weji ūmo gūkaselemelaga gwelaga pe,

²⁷ hūna ī ng'holò yane yadutwa, nū nkono gwane gwayūshitūmamīla na kūshilamya mu wiba wiba,

²⁸ Ī yenīyo nayo ni yabalwa gīkī shilī shibi sha kūng'wenheleja munhū kwinhwa nsango, nguno ni nabiza nalīngomela Mulungu ūyo alī higūlya.

²⁹ Hamo ūlū ni nakayegaga kūmona ng'wanishi wane wapandīka makoye, nūūlū kūdoosa ūlū wagwa mu mayanga!

³⁰ Alīyo ū nene nataalī kūzunīlīja nomo gwane kwīta shibi mu nzīla ya kūlomb'izumo kūlwa būpanga bo ng'wanishi wane.

³¹ Kolaga hamo a banhū ba mukaya yane bataalī kūhaya gīkī, “Nani ūyo atīnaalya wigūta sha ha ng'wa Ayubu?”

³² Alīyo atīho mīti wa kūlaala mu matogolo, nguno pyī ī shikū ū nyango gwa ha ng'wane gūlī ng'waje ū kū bashimīzi.

³³ Nūūlū hamo nashibisile shibi mu ng'holò yane nūshikundīkīja, gīt'ūmo banhū bakīītīlaga na kale,

³⁴ kūlwa kogoha ibità lya banhū na gīkī nakūdalahwa na badūgū, nose nūhuumūlīja sele kūshisha noya na kūfuma hanze.

³⁵ Yee, nīyo gīt'ūlū ni wilonga wa kūnidegeleka! Ī haha lūūlū namalīgīje aha natūūle na lūmeng'ho kūlwa kwibūūla kwane! Ū Ndūji wa shose ni anishokejage; Ī gete ū mūūji wane ni wīyandīka ī mihayo īyo alīnibūūla!

³⁶ Ni naalūsola ū lūbbapūla lwenūlo nūlūtūūla h'ibega, na kūlūkonzeela kū ntwe gītī ngikili.

³⁷ Ni nansomboolela a kajīle ka mihayo yane pyī ī yose, ni nang'wegeela gītī nalī ng'wana wa ng'wikūlū.

³⁸ Ūlū gūnilīlīīla a malaale gane, nī migūnda yane īyo nakīlīmaga yūseja shisoji;

³⁹ ūlū nakalyaaga matwajo gaamo na kūlīpa yaya, nūūlū naabenheleja basūlūja baamo kūgwa ng'holò;

⁴⁰ ūlū chene ni jizwage mo shokolo a ha ng'wanya gwa ngano, na maswa sagala a ha ng'wanya gwa būsīga. Ī mihayo ya ng'wa Ayubu yakalīkīla henaha.