Ayubu 30 - Bibilia Ilagano Lya Kale 2015

Kūdalahwa kwa ng'wa Ayubu

¹ Gwike ī haha bakūniibengelejaga, banhū bado kūle kūle ū kūlī nene; abo nūūlū basaabo naalī natadūgije kūbiganikīla kūbatūūla ng'wigelè līmò na mvwa ja badīīmi bane.

² Ī nguzu ja makono gabo ni janinha fiilū kī ū nene, īkī nīyo baalī baakobagūka gīko jūbagaya nī nguzu?

³ Baalī basedeeku ba basedeeku kūlwa būkuneese na kūkoyiwa nzala, būjikū pe bikalaga bakūyūngaga mu matogolo mūūmu makalamuku, gatī na shose shose.

⁴ Bajaga bakūtonagūlaga madūūtū ga mitī misalazu ya mu masaka, hama ī shilīwa shabo shalī miji ya mitī ya kaniniigwe.

⁵ Baalī baapeejiwa ū mu banhū bichabo, būlī kwene baalīgījiagwa ng'wano gītī basambo.

⁶ Nose baalī bashoka kwikala kū mahululu makamuku, na mu mapilinga ga mawe na mu myobo ya mu shigūlū.

⁷ Bikalaga bakūhoyookaga nyayobe mu masaka, bisūmbyaga mu mashilūūtū ga lūbambe.

⁸ Baalī banhū bahwīganu nūūlū kūmanīīka yaya, būlī kwene ū mu sī bajaga bakwayīgagwa bo milang'ha.

⁹ Alīyo ī haha a baana babo hū bakūniineenelegejaga mu mīmbo, ū kūbo nalī shikolo sha kwimelela kūnū bakwaalaga seko.

¹⁰ Banikolilwe no, batatogilwe ū kwiyeegeela nū nene, bakūniswīlaga na mate mu būshū ndūhū nūūlū kūsusanya.

¹¹ Ī haha ū Mulungu wabūtegije ū būtà bone waniluhije, baamalile ī soni ū kū būtongi bone.

¹² Ū kū nkono gwane ū gwa būlyo banishi baanūbūkīlile, balīyūnitega mitego gīkī banigwashe Ī mhambala jane; bakūnenhelaga mihayo yabo ya kūnikenaagūla.

¹³ Ī nzīla yane bakwīkenaagūlaga, bakūpandīkaga solobo mu nzīla ya mayanga gane, na atīho nūūlū ūmò wa kūbahama.

¹⁴ Bakwizaga balīhūūma gītī balībītīla ha shisheelele shigalī, bakūniihoolekelaga ng'wikanza lya mayanga gane.

¹⁵ Mihayo ya kogohya īnikiimaalīlile, Ī likūjo lyane lyabizile gītī lyalajiwe nyaga lyūnīnga, Ī mhola yane yabītile yūja gīt'ilunde lya mbula.

¹⁶ Ī haha ū būpanga wane būlīshila wangū no, ī shīkū ja kūluha jilīnisheedekeja.

¹⁷ Ū būjikū būkūgabbebbenaga a maguha gane, a kasaatīle kene kakūnilyaga ndūhū na kwifuula.

¹⁸ Ū Mulungu kūlwa būdūla bokwe būtaale, ū kūlī nene akūbizaga gītī shizwalo shinideenije mu nhingo.

¹⁹ Wanitaalīkīgije mu tembe, Ī haha naabizile gītī lūbuubu na mabu dūhū.

²⁰ Ee, Mulungu nakūkūlīlīīlaga alīyo ūtūnishokejaga, nūūlū nīmīīla nahene ūkūniiloleelaga dūhū.

²¹ Ī haha wanigalūkīlile kūniluhya, ūkūnūūbūkīlaga bo nguzu ja nkono gwako.

²² Ūkūnidimaga waniponya mu lūyaga, hanuma wanihubenga mu nshūūlūlū.

²³ Namanile gīkī nose ūkūnishisha mu kūcha, ū ng'wipandī īlo baheleliwe pye a bapanga.

²⁴ Atīho ūyo akamalījaga munhū aluhile alī ha gatī ya mayanga kūnū akūlīlaga alīkooba kūgunanhwa!

²⁵ Ū nene nataalī kūlīla kūlwa banhū abo balī mu mayanga? Ū būpanga wane būtaalī kūpīnīhala kūlwa nguno ya ng'habī?

²⁶ Alīyo ū nene ū mu kwisagīlwa wiza, naagwīlilwe yabūbi; ū mu kūlindīīla isana, giiti shanitinganīlile!

²⁷ Ū mu gatī yane nalī na kūyugūūka kūtaale kūtī kwa kwifuula, shikū ja makoye madito jinichaamile.

²⁸ Nose naajigūkile alīyo ītī kūlwa kūpya līīmi, nalīyīmīīla na ng'wibità naalīla, nalīkooba kūgunanhwa.

²⁹ Naabizile ndūgūye wa nyamhawa, na nwani ng'wiye wa ging'hi.

³⁰ Ī likūnza lya mīlī gwane līlīyūjigūka hūna lyabbadūka, a maguha gane gakūbugumaga kūlwa būsebu bo nswiza.

³¹ Nose ī ndono yane yabizilūtūlwa kūlwa mīmbo ga būpīna, nī mbiilūlū yane īlīyūfuulwa ya kūlīla kwa ng'hūngū.