Ayubu 29 - Bibilia Ilagano Lya Kale 2015

Shikū ja kwīlūkīlwa kwa ng'wa Ayubu

¹ Ū Ayubu ongeja kūlūngalūnga ūhaya,

² Gīt'ūlū kūnishokela hangī ī myeji Īyo yabītile, ūmo nikalīlaga mu shikū ījo Mulungu walī anibaladile!

³ Ī tala yakwe yanitwimīlaga ū mu būpanga bone, nūūlū mu giiti nashimīzaga kūlwa kūtwimīlwa n'isana lyakwe!

⁴ Ū mu shikū jenījo naalī nataalī natang'anhīlile, ū būsangī bo ng'wa Mulungu wenhaga ū mu ng'hambī yane;

⁵ ū Ndūji wa shose walī hamò nū nene, na a baana bane bikalaga banipīndije kose kose.

⁶ Ū mu shikū jene nikalaga nakūgalagalaga mu būhondo, na mawe hose ganenhelaga mihūūmo ya maguta.

⁷ Ūlū naaja ū kū mita gwa nzengo naakigasha a h'isumbī lyane a ha gwalugwa ya mu nzengo,

⁸ a basūmba baanibonaga baaniyaalīla, na a banamhala babūūkaga, bīmīīla.

⁹ A batongeeji bahuumūlaga booya ū kūyomba, bīkundīkīja na makono ī milomo yabo;

¹⁰ a bakūjiwa bahuumūlaga sele, Ī ndīmi jabo jadamīīla kū malangū.

¹¹ Būlī ng'wene ūyo ūniigwaga wanihayaga chiza, na būlī munhū ūyo ūnibonaga wanikumīlījaga.

¹² Nguno nangunaga ū ng'habī ūlū ūlīla alīkooba ngunanhi, nū mpīna ūyo atī na wa kūnguna.

¹³ Ū munhū nūūlū alī ng'wikanza lya kūcha wanifuuhaga mbango, nū mu ng'holò ya nchīlwa natūūlaga mo lyīmbo.

¹⁴ Ū būtūngīlīja nawifafatīīlaga gītī shizwalo shane, a kalamulīle ka wīīmà ū kūlī nene yalī ng'hanjo n'ihima lyane.

¹⁵ A babboku naalī miso gabo, na a balemehazu naalī mhambala jabo.

¹⁶ A bagayiwa naalī gītī saabo, na a bageni nabīmīīlaga ū mu mihayo yabo.

¹⁷ A biboneeji nababīnzagūjaga a mahambayū gabo, naabahulumūja īsho balumile na mino gabo.

¹⁸ Nose niganikaga gīkī, “Nakūkwīja ī myaka gītī maseni, nīyo ū nene nalī wa kūchīla mu ng'wane dūhū.

¹⁹ Ī miji yane īkūkolobela kūshisha kū minzī, na a matambī gane gakūyikala gakwidīkīlagwa lūme būjikū pe.

²⁰ Ī likūjo lyane līkwikala isoga shikū jose, nū būta ū mu nkono gwane būkwikala būpya gwa.”

²¹ A banhū baanidegelekaga mu kwisagīlwa, bahuumūlīgije sele sele baalindīīlaga kwigwa būganikīji bone.

²² Ūlū nalīīkakalīcha walī atilongaga ūngī wa kūyomba, ī mihayo yane yabingīlaga mu būlembeezu ū mu matū gabo.

²³ Banilindīīlaga gīt'ūmo banhū bakalindīīlīlaga mbula, ī mihayo yane bīng'waga gītī minzī ga mbula ya mu mīsa.

²⁴ Ū kūyega nabo ū nene baakumyaga no, ū būyegi w'ihanga lyane boolī na mpango ntaale no ū kūbo.

²⁵ Ū mu kwikala nabo naabalangaga nī nhūngwa ja kikalīle kabo, nikalaga nabo gītī nalī Ntemi ntaale ha gatī ya mabità gakwe ga būlūgū; naalī gītī nūngūja wa banhū ha mayanga ga kūchīlwa.