Ayubu 27 - Bibilia Ilagano Lya Kale 2015

Ayubu kūbawīla alīhaya ya ng'hana

¹ Ū Ayubu ongeja ū kūsomboola; ūhaya,

² “Ūmo Mulungu alī mpanga, ūyo wanitaagije ī ng'hana yane, ū Ndūji wa shose ūyo būpanga wane wabūtūūlile mu kūsaatwa kūtaale,

³ ū nene ng'wenūyū aho nataalī nakwesheemaga, ī myūyī ya ng'wa Mulungu ūlū ītaalī ū mu mūūlū gane,

⁴ ū nomo gwane gūtūyomba mihayo ya malofu; nū lūlīmi lwane lūtūhaya būmaama.

⁵ Ū nene yaya ū kwizunīlīja ning'we Ī gīkī a bing'we mulītūngīlīja; nūūlū kūcha nakūcha natabūlemile ū būshikaanu bone.

⁶ Ū būtūngīlīja bone nabūmīīlile no, natūbūlekelaga biya; ī ng'holò yane ītī na gwa kūnibūūla pyī ī shikū ja būpanga bone.

⁷ A banishi bane ni ībagwīlage Īyo īkabagwīlaga babūbi, na būūbūkīji bane Īyo ībigeleelilwe bahūnga.

⁸ Nguno ūyo atī na logohano kūlī Mulungu alī na kwisagīlwa kī ūlū ūgeswa, ū Mulungu ūlū ūng'wīngīja ū būpanga bokwe?

⁹ Ū Mulungu akūkwigwa ū kūdaaya kwakwe ūlū gūng'wizīīla makoye?

¹⁰ Akūnyegela gete ū Ndūji wa shose? Akūdūla kūng'witana ū Mulungu pye a makanza?

¹¹ Ū nene nakūmulanga ī ya būdūla bo ng'wa Mulungu, natūmubisa ūmo jilī ī nzīla jakwe ū Ndūji wa shose.

¹² Bing'we benekīlī ng'wībonile pyī ī yenīyī. Hama nibūlī lūūlū mulīlūngalūnga mihayo misūūku gīko?”

Mheela ya ng'hūnga

¹³ Ūyū hū ngabo ūyo Mulungu agūtūūlile kūlwa bakenaagūji, wingīji ūbo ng'wiboneeji akanukūlaga kwīngīīla kūlī Ndūji wa shose:

¹⁴ A baana bakwe h'ūmo bakwīlīle, Ī ng'halīlo yabo kūmalwa kūbūlagwa bo līlūshū; nī nzala ītī ya kwīnga ū mu banhū ba mpanda gwakwe.

¹⁵ A banhū bakwe abo balasaagīīle bakūshilīla mu shigila kūlw'ikūla, na a bake babo batūbalīla.

¹⁶ Ū mu gīko nūūlū ajikwīje ī hela gītī lūbuubu, nī shizwalo atūlīīle gītī malindo,

¹⁷ Īsho akwikwīgījaga shikūzwalwa na ntūngīlīja, ī hela bakūjigabanha banhū abo batī na shilingo.

¹⁸ Ī numba īyo akazengaga ībange chanjo, īlī gītī ibebete lya nang'hani wa mu ngūnda.

¹⁹ Akūkīla a ha būlīīlī kūjūlaala alī nsabi, alīyo atūshokeja hangī; ūlū alīkaloleecha a miso pyī ī sabo jajaga.

²⁰ Booba būdito būkūng'wikīīla gīt'ihūūma; mu makanza ga būjikū akūja na nshūūlūlū.

²¹ Nyaga go kīya gūkūnsola gūnjaane, gūkūng'hwehula īnge gete a ha shandaalo shakwe.

²² Gūkūng'widoseela ndūhū na shigongo, kūnū alīkiling'hima alīgūpeela.

²³ Gūkūnsola gūje gūntūlīla langalanga gūlīng'heheeja kwīnga a h'ipandī lyakwe.