Ayubu 25 - Bibilia Ilagano Lya Kale 2015

Atīho ntūngīlīja ū kūlī Mulungu

¹ Hūna ū Bilidadi ū muna Shuha ūshosha,

² “Ū būsugi nī lyogohya shilī kūlī Mulungu, akatūūlaga ho mhola ū mu mapandī gakwe ga higūlya ū ng'wigūlū;

³ Angū, a mabità gakwe galī na būbalīle? Nani ūyo lītang'wakīīlaga Ī lisana lyakwe?

⁴ Alīyo ū munhū adūgije kūbiza ntūngīlīja ginehe ū kūlī Mulungu? Ū wa kūbyalwa na nkīma adūgije ginehe ū kūbiza ng'wela?

⁵ Īkī ūlū na ng'weji gwabiza gūtī na būpe ū kūlī we, nī sonda jabiza jitī na wela ū mu būtongi wakwe,

⁶ sumbagwa na munhū ūyo atikīlile n'igino dūhū, ū ng'wana wa munhū ūyo alī kūngūsī!”