Ayubu 23 - Bibilia Ilagano Lya Kale 2015Ayubu atogilwe kūlamulwa na Mulungu 1 Nang'hwe ū Ayubu ūshosha, 2 “Kūshisha nī lelo īyī nataalī niyanda kūlwa kūminyiwa kūtaale, nakūgang'hīlaga alīyo ū nkono gwakwe gūtaalī gūnisheedekegije. 3 Gīt'ūlū ūlū ni namanile a ha kūmpandīkīla, nūshika aho akikalaga! 4 Ni nansomboolela īyo īlīnikoya, ū nomo gwane ni gwakwīja no a malang'wa. 5 Ni nīdeeba ī mihayo īyo atogilwe kūnishokeja; nīyitegeleja īyo alīniwīla. 6 Ū wei ni wabūtūmamīla ū būdūla bokwe kūnifīīkīlīja gete? Ītī gīko yaya, ni wanidegeleka. 7 Munhū ntūngīlīja ni wang'wibūūlīla nang'hwe ū kwenūko; hūna ū nene ni nīnjiwa ū mu nkono gwa namuji wane nūpīla ilalī. 8 Alīyo nalihamba ū kūja ī kīya nangayiwa, nūūlū naaja ī ng'weli natūmonaga. 9 Ūlū alītūmama kū lwandī lwa sukuma natūmonaga, nūūlū wagalūkīla dakama ndūhū kūng'wilabya nūūlū hado. 10 Alīyo ayīmanīle ī nzīla yane, ūlū ūmala ū kūnigema nakūfuma nalī ng'wiza no gītī zahabu. 11 Ī mhambala jane jikūbītīlaga mu kashimīzīle kakwe, nalī mu nzīla yakwe gwa, nataalī ū kwīleka. 12 Ī shilagīlo sha kūfuma mu nomo gwakwe nataalī ū kūlekana nasho; ī mihayo ya nomo gwakwe nīlang'hanile no, kūtinda shilīwa shane sha būlī lūshikū. 13 Gwike ū wei alī iyene, nani adūgije kūng'halalīja? Akīītaga gīt'ūmo atogelilwe. 14 Nguno hū ng'wene ū nshikīlīja wayo īyo anihelelile, nīyo alī nayo mingī ī ya mbika yenīyo abīkile. 15 H'ī chene nalī na boobà būtaale ū kū būtongi bokwe; ūlū nayizūkwa pyī ī yenīyī nakūng'ogohaga no. 16 Ū Mulungu wanigwishije ng'holò, ū Ndūji wa shose wanogohije no. 17 Alīyo ū kūhuumūjiwa na giiti yaya, Ī giiti sha gamha īsho shinikundīkīgije kū būshū wane.” |
Sukuma Bible © Bible Society of Tanzania, 2019.
Bible Society of Tanzania