Ayubu 20 - Bibilia Ilagano Lya Kale 2015

¹ Ū Zofali, ū muna Namatī ūshosha hangī gīkī,

² “Bebe a maganiko gane galīnikoya, nose nabona nakwangūhīle ū kūkūshokeja.

³ Naliigwa kahūgūlīle kasangije na būdūkani mo, na lūūlū ū būmani bone bonilaka laka nakūshokeje.

⁴ Ū bebe ūgwitegelegije gete ū mhayo gwenūyū kūfuma kale, ī gīkī kwīngīīla aho munhū akasūmvwa ūtūūlwa ū mu sī,

⁵ ū būzalabanu bo munhū wabūbi būkabizaga bo kwilabaacha dūhū, ū būyegi bokwe ūyo atī na logohano kūlī Mulungu bo kakanza kado no.

⁶ Ū wikumīlīja bokwe nūūlū būkashika kwigūlū, nū ntwe gwakwe gūyikuumya na malunde,

⁷ nahene akūyagaala ajimīīle welelo bose ūmo maashi gakwe gakajimīīlīlaga! Abo bamonaga bakūyiwīla ‘Wajile halī ū ng'wing'wana?’

⁸ Akalalaga wajimīīla gītī shilooti, numho hū wajaga atalilonga hangī na hado yaya, akapamagwa wīnga gītī shilooti sha būjikū.

⁹ Ī liso īlo lyamonaga lītalamona hangī; nūūlū ū wikalo bokwe atibona nabo hangī.

¹⁰ A baana bakwe bakūyūlīpa magasa ū kū bahabī, ī sabo yabo akwīshosha na makono gakwe wei.

¹¹ Ū būgīlīng'hanu ūbo alī nabo mu magūha gakwe ha būdinha, akūlambalala nabo mu lūbuubu.

¹² Nūūlū īkī ū būbi būnonu ū mu nomo gakwe, hama akikalaga abūbisile mu lūlīmi lwakwe;

¹³ nūūlū īkī atūdūla ū kwiyūmīlīja alekane nabo, akikalaga abūbaladile mu nomo gwakwe,

¹⁴ alīyo nahene ī shilīwa shikūngaasīla ū mu nda yakwe; shikūbiza būsūngū gītī bo nzoka ū mulī we.

¹⁵ Ī sabo ījo wajimila akūjilūka, ū Mulungu akwīsībūcha ī nda yakwe ashilūke shifume.

¹⁶ Akong'ha būsūngū bo nzoka, akūbūlagwa mino ga ng'hoboko.

¹⁷ Ī myongo atalīyegela hangī, ndūhū a mahululu ayo gakaselaga būūkī na mashishanga.

¹⁸ Īsho walī washinoga nogela akūshishosha ataalī nū kūshilya, ī solobo ya kūfuma mu būsūlūja wakwe atīlūmba.

¹⁹ Nguno wabiboneelaga a bahabī, wayūbaleka balī mu makoye; wadaatyaga na numba ījo walī atajizengile wei.

²⁰ Ū mu shikolo īsho ashiikūmbilwe shitilonga sha kūng'wifuuja nūūlū sha ngota, ū mu shose īsho ashihahaalīlile atūpīja nūūlū shimò.

²¹ Atūlekeelelwa shose shose īsho adūgije kūlya, ū būsabi bokwe būtūshinga ho.

²² Ū mu wingī bo sabo ījo alī najo, akūbiza na makoye, ū būdito bo mayanga pyī ū bose būkūnsheedekeja.

²³ Ū ng'wikanza lya kwiyanga yangīla gīkī andye kwigūtya nda yakwe, ū Mulungu akūng'holeela būpelanu bokwe būtaale, būng'widīkīle gītī alītūlwa mbula.

²⁴ Nūūlū akapūlūgūka ūshipeela Ī shilanga sha chūma, ī lisonga lya shaba līkūnasa bo mhulung'hanya

²⁵ Akūlīduta lyūfumīla kū ngongo gwakwe, ī shaba ya kūteemagīla īkūfuma ū ng'witīma lyakwe. A henaho boobà būtaale būkūndima;

²⁶ giiti sha gamha shijilindīīlile Ī sabo jakwe, akūgabbulwa moto gūtī gwa kūfuulwa, gūkūshipyagūla pyī īsho shilalekeelwe ng'wiheema lyakwe.

²⁷ Ī ligūlū līkūbūtenda hape ū būbi bokwe, nī sī īkūnsalīla īng'ūūbūkīle.

²⁸ Ī sabo ja ha ng'wakwe pyī ī jose jikūja n'ihūūma mu lūshikū lwa būpelanu bo ng'wa Mulungu.

²⁹ Ū gwenūyū hū ngabo ūyo Mulungu ababīkīlile a babūbi, hū wene ū wingīji ūbo Mulungu abahelelile.”