Ayubu 19 - Bibilia Ilagano Lya Kale 2015

Ayubu kūluhiwa mihayo

¹ Hūna ū Ayubu nang'hwe ūshosha,

² Bing'we, mukūniluhya na kūnipondagūla bo mihayo ying'we gīko kūshisha nanalī?

³ Ī haha ng'washisha ng'hangala ikūmi mukūmanagūnisondagūla, mukūniyugūūlaga na minala yaya.

⁴ Nūūlū īkabiza ng'hana gīkī ū nene naafumīlaga hanze, ū būhūbi wenūbo būlī wane nene ng'wenekele.

⁵ Ūlū mubize muligūngūhya higūlya yane na kūnisondagūla kūlwa kūgatūmamīla a mayanga ayo ganigwīlile,

⁶ shiigelile ng'witegeleje gīkī Mulungu h'ūyo wanihūbije, wanitaligīngije na ntego gwakwe pyī ī mhandī jane.

⁷ Nūūlū naalīla kūnū nūhaya, “Naliboneelwa!” Alīyo natūlonjiagwa. H'ūmo nalīlīle nakūkoobaga kūgunanhwa, būtīho būlamulwa bo ng'hana.

⁸ Wei wanichibīīlile ī nzīla yane, natūdūla ū kūbīta; wajibisile mu giiti ī nzīla jane.

⁹ Wanizuugije ī likūjo lyane, nī shingilima ūnīngīja ū kū ntwe gwane.

¹⁰ Akūnipondagūlaga pye hose hose kūshisha nose naashilile gete, nū kwisagīlwa kwane alīkūdubbūla gītī līntī.

¹¹ Ū būpelanu bokwe būnipembekelile, nīyo akūnibalaga gītī nalī ūmò wa banishi bakwe.

¹² A mabità gakwe ga būlūgū gakūnidumīlaga bo nguzu, gaanipīndīlīgije ngītīli, hūna gūūkoma ng'hambī jago gūūnigobanīja kose kose.

¹³ Wenhelegije būnisegenela a badūgū bane, a bimane bane pye baabizile gītī bageni ū kūlī nene.

¹⁴ A badūgū bane bīngile būja, a banwani bichane nabo baanībile.

¹⁵ Abo biza kwisuga ha ng'wane na a batūmani bane a bakīma balīniisaaba gītī nalī ngeni; ū mu miso gabo balinibona gītī nalī wa kūngī.

¹⁶ Ūlū nang'witana ū ntūmami wane ndūhū ū kūniidīka, yaya nūūlū nūng'wikūmbīlīja na nomo gwane.

¹⁷ Ī myūyī yane īkūūnung'hīlaga kībi ū nke wane, ū kū baana ba ng'wise nalī wa malofu no ī haha.

¹⁸ Na a banīgīnī a bado bado baanidalahile no, ūlū naapumūka dūhū ī gīkī, bandya kūniineenelegeja.

¹⁹ A banwani bichane a ba bbihī na nene, pye batūnitogagwa, abo nabatogilwe baaniigalūkile.

²⁰ Ī haha nūmile kūlū kūlū nasaagije maguha dūhū; naashilile no, naasaagije gwa kwikala naafunyaga būūyū dūhū!

²¹ Nichīlagi shigongo banwani bichane, nichīlagi shigongo ū nene; nguno gwanitūlile ū nkono go ng'wa Mulungu.

²² Nibūlī mulikala ng'ūnikūūbīlīja gīt'ūmo akwītīlaga ū Mulungu? Ni kinehe gatūmufujaga a makoye ga mīlī gwane?

²³ Hambū hambū ūlū kwandīkwa Ī mihayo yane ī haha, yūtūūlwa mu mbapūla ja shitabo,

²⁴ ūlū koolwa h'itale na kalamu ya chūma, yikala henaho shikū jose ilalī!

²⁵ Nguno namanile gīkī ū Nkomoji wane alīho mpanga; nīyo ū mu lūshikū lwa kū būkalīkījo akwīmīīla higūlya ya sī.

²⁶ Nūūlū īkī ī likūnza lya mīlī gwane līkūkenaagūka, alīyo nahene nakūmona ū Mulungu nalī mu mīlī gwane.

²⁷ Nene ng'wenekīlī nakūmona na miso gane, nene g'wenūyū, atī ūngī yaya; Ī haha nalī na ng'hūmbū no ū mu ng'holò yane!

²⁸ A bing'we mushikile kwiwīla, “Tūkūngwasha dūhū, nguno ī mbūūkī ya makoye Īlī mulī we;”

²⁹ alīyo a bing'we benekīlī lyogohagi ī līlūshū, nguno ū būpelanu būkenhelejaga nsango gwa līlūshū, hū mukūmana gīkī gūlīho nsango.