Ayubu 17 - Bibilia Ilagano Lya Kale 2015

Kūtīho kwisagīlwa kose kose

¹ Ū moyo gwane gūtī na kwisagīlwa, ī shikū jane jashilile, shinilindīīlile shigila dūhū ī haha.

² Hama banhū b'ibengwe banipīndije kose kose, a miso gane gakūbūbonaga gwa ū wanishi wabo.

³ Nalīkūlomba ūnilwīlīīle bebe, wiyeege bebe ng'wenekīlī; numho nani ūngī ūyo akūniguna?

⁴ Ū witegeleja wabūlugalīlile hanze ya masala gabo, hūna lūūlū ūtūūbaleka bapyene.

⁵ Ū wa kūnodeela ng'wiye gīkī apandīke mheela, a miso ga baana bakwe gakūjimīīja ū būdūla bo kūbona.

⁶ Ū Mulungu wanīītile kūbiza wa kūhooyelwa mu banhū bose, wa kūswīlwa na mate mu būshū.

⁷ A miso gane gaabbopomile kūlwa būpīna; pyī ū mīlī gwane gwabizile gītī ng'wengeeji.

⁸ Ū gwenūyū gūkūbajinjimajaga a ba nhūngwa jigoloolile; abo batī na shilingo bakūzanzamuka kwilwisha nabo a batī na logohano kūlī Mulungu.

⁹ Gwike a batūngīlīja bakwīmīīla ū mu nzīla jabo, abo balī beela mu makono gabo bakongejaga kūpandīka nguzu.

¹⁰ Alīyo ūlū a bing'we, gemagi hangī! Gwike ū mu bing'we natūbonaga ntengeke nūūlū ūmò.

¹¹ Ī shikū jane ū nene jashilaga, Īyo naalī nīhelile kwīyīta yabipile, pyī nī ng'hūmbū ja ng'holò yane.

¹² A banhū benaba balībūgalūcha ū būjikū kūbiza līīmi. Nūūlū shilīho giiti a boi bakūhayaga, “Isana līlī hihī.”

¹³ Ī gīsī ū kūlimu ūlū h'ī kaya Īyo nalīyisagīlwa, nī ndaalo yane īkūbiza mu giiti,

¹⁴ ū būkenaagūku ūlū nakūbūhayaga gīkī, “Ū bebe ūlī baba!” Ī ngino najo, “Mulī bamayū,” nūūlū, “Mulī balūmbū bane;”

¹⁵ numho kūlī halī ū kwisagīlwa kwane? Nani ū wa kūkūbona ū kwisagīlwa kūlwa nguno yane?

¹⁶ Ū kwisagīlwa kūkwīmīīla ū mu būtongi wa kūlimu? Nū mu lūbuubu tūkwika tūlī dege?