Ayubu 16 - Bibilia Ilagano Lya Kale 2015

Ayubu kūhaya batī banwani balūngūja

¹ Hūna ū Ayubu ūshosha ūhaya,

² “Ī mihayo ya mbika yenīyī nīyigwile kwīngīīla kale; a bing'we pye a bose mulī balūngūja ba sagala no.

³ Nibūlī ītūshilaga ī mihayo ying'we Ī midūhū gītī lūyaga yenīyī? Īsho shilīmubaba ī gete kī, nose ng'wikale ng'wakwījaga mihayo gīko?

⁴ Nūūlū a bing'we ūlū ni mulī mu mbika īyo nalī nayo ī haha, ū nene nane ni nalīyomba gīt'ūmo mulīyombela a bing'we; ni nalīmulomeela kīngī nasho nīyo, kūnū nakūshingishaga na ntwe.

⁵ Gwike ī mihayo yane ni īlīmulūngūja, ū nomo gwane ni gūlīng'wenhela ya kūmugeeheja a makoye ging'we.”

Ayubu kūhaya Mulungu ampelanīlile

⁶ Alīyo ī haha ūlū nayomba ū būsaatu bone būtūgeehaga; nūūlū nahuumūla būtūnīngīlaga.

⁷ Ee Mulungu, ī haha waniseedechaga, wanikenaagūgije lūbanza.

⁸ Ū mīlī gwane wagūgandije no, ū mhayo gwenūyū gūlīnikaanīlīja ī haha; ū būkondu bone bonikīlīīlile; būlī būkaanīji bo kūniminya.

⁹ Ū Mulungu wanūūbūkīlile, alīyūnisaasagūla mu būpelanu wakwe, aniikanilwe na kūnisheelanīja mino; ū nuhya wane anigoomhile na liso lyakwe lyūgī.

¹⁰ Banhū balīyikobya kwiza kūnilola, baayūnikumya baasamaga milomo, bīīta baayūnipaala mapī mu wibonya.

¹¹ Ū Mulungu wanitūūlile mu makono ga banhū babūbi, ūniponya mu maala ga banhū ba malofu.

¹² Naalikalaga nalembeelile mu mhola, naahayilimanīla onihaja mu nhingo, wandya kūnibīnzagūla na kūnitobagūla, hūna ūnitūūla ha welekele bo kūyūnilīngīsīīla wanilasa na masonga gakwe;

¹³ Ī haha a balasi bakwe banipīndije pye hose hose. Alīyūnichima ndūhū na kūnisaatwa, akūjilasaga ī mhīgo jane jatandūka, nī ndūlū yane akwīyītaga hasī.

¹⁴ Ng'hangala na ng'hangala akūnisakamīlaga, wanitalūkīla gītī nshilikale apelanīlile.

¹⁵ Naasumile magūnīla kūlwa kūgūzwīka ū mīlī gwane; ī likūjo lyane nabizilikala nakūlībbukaga mu lūbuubu!

¹⁶ Ū būshū bone botiginhīlile no kūlwa kwikala nakūlīlaga, a miso gane gaakongobelile mu gatī,

¹⁷ alīyo a makono gane galī kūle nī shītīle sha wibonya, na a kalombele kane kalī keela.

¹⁸ Ee sī, ūtizūgakundīkīja a mininga gane, nū kūlīla kwane ni kūtizagūūcha mpandagīlo!

¹⁹ Nguno nūūlū nī haha ū nkaanīji wane alī ng'wigūlū; ū Ngunīja wane alī kwigūlya.

²⁰ A banwani bichane bakūniibengelejaga, alīyo a miso gane gakwitaga shisoji kūnīlīīla Mulungu.

²¹ Hambū hambū ūlū ni wilonga wa kūnīlīīla Mulungu, gītī munhū akūdaayaga kūlwa nguno ya nzenganwa ng'wiye.

²² Yasaagaga myaka migehu no, nane nakūja ū lūgendo ūlo lūtī lwa kūshokanya.