Amosi 5 - Bibilia Ilagano Lya Kale 2015

Ng'hūngū na kūkomigwa kūgalūka

¹ Gwigwagi ū mhayo ūyū bing'we numba ya Isilaeli; nalīīlīla kūlwa nguno ying'we,

² Ū munhya ū Isilaeli wagwile, atīko kūbūūka hangī, alī mu sī yakwe walekanījiwe, atī na wa kūngūngūmūla gete.

³ Ū Seeba MULUNGU alīhaya, “Ū nzengo gwa kūfuma na bagosha ba mbagashūūla shihūmbī shimò ū mu Isilaeli, gūkūlekeelelwa igana līmò dūhū; ū nzengo gwa kūfuma nabo igana gūkūlekeelelwa ikūmi līmò.”

⁴ Ū SEEBA alīyīwīla ī numba ya Isilaeli gīkī, “Nikoobagi nene mukūpīla;

⁵ mutīkoobagi Beeseli, yaya ū kūja Giligali. Yaya nū kūkīla nkīlo mujile Belisheba. Nguno ī Giligali īkūtwalwa mu būding'wa, nī Beeseli īkūlekwa dalali.”

⁶ Nkoobagi ū SEEBA mukūpīla, ūlū ītī chene akūbīta gītī būpī ū mu numba ya ng'wa Yosefu; būkūshilambīla būlī shikolo, na atigela wa kūbūjimya ū mu Beeseli.

⁷ Angalīlagi a bing'we abo mukagalūchaga būlamuji bo wīmà kūbiza būlūlū, na mukabūpandagīlaga hasī ū būtūngīlīja!

⁸ Ū meeja wa Ndīmīla ī ng'hīma nī ng'hosha, ūyo na giiti akashigalūchaga kūbiza dilū, nī likanza lya līīmi akalīgalūchaga kūbiza būjikū, na a minzī ga mu nyanza akagitanaga hūna wagiita higūlya ya sī; ū ng'wenūyo ī lina lyakwe SEEBA.

⁹ A ba nguzu hū ng'wene akabenhelaga ya kūbakenaagūla, akakenaagūlaga nūūlū nzengo gūpīndīlīgije būlang'hani būtaale.

¹⁰ A bing'we munkolilwe ūyo akafunyaga būhūgūji mu mabanza, nū ng'hayi wa mihayo ya ng'hana mundalahile.

¹¹ Ū ng'habī mundalahile no, alīyo hangī mukang'hadīkaga amuhonge shilīwa. Hūna lūūlū nūūlū īkī ng'wizengela numba nhaale ja mawe, mutikala mo; nūūlū īkī ng'walīma migūnda misoga ya mizabibu, ī divai yamo mutīng'wa.

¹² Nguno nabūmanile ū wingī wa būkenaagūji wing'we ūmo būlī, nū būtaale wa shibi shing'we. Mukahongagwa ng'wayūbiboneela a batūngīlīja, nū mu mabanza a bahabī mukabīngījaga a kalamulīlwe ka wīmà.

¹³ Hūna lūūlū ū mu makanza genayo ū munhū ntengeke akahuumūlaga, nguno galī makanza gabūbi.

¹⁴ Būkoobagi ū wiza, yaya ū būbi, hū mukūpīla. Hūna ū SEEBA Mulungu wa Būdūla bose akūbiza hamò ning'we, gīt'ūmo mukūhayīlaga, gīkī alī hamò ning'we.

¹⁵ Ū būbi būkolagwi mutogwe yawiza, ū mu mabanza būlang'hanagi ū būtūngīlīja. Hamo ū SEEBA Mulungu wa Būdūla bose akūbūchīla shigongo ū būshiigo bo ng'wa Yosefu.

¹⁶ Alilūūlū, ū Seeba, ū SEEBA Mulungu wa Būdūla bose alīhaya gīkī, Kūkūbiza ho kūlīla ng'hūngū hose pye ū mu mapanda, kalīlīle ka būpīna būtaale būlī kwene ū mu gwalugwa ja mu nzengo. Ū nīmi akūkomigwa kūlīla, ū mani wa kūtūla ng'hūngū kūlīla n'ilaka lya higūlya.

¹⁷ Hose pyī ū mu migūnda ya mizabibu hakūbiza ng'hūngū dūhū, nguno nakūbīta mo ū mu bing'we; alīhaya SEEBA.

Lūshikū lwa ng'wa SEEBA

¹⁸ Mulī mu kwihīga a bing'we abo mukūlūkūmbūlaga lūshikū lo SEEBA! Nibūlī mulūkūmbūlile ū lūshikū lo SEEBA? Ū lūshikū lwenūlo lūkūbiza lo giiti, ndūhū ī lisana.

¹⁹ Īkūbiza gīt'ūmo munhū wa kūshiga shimba alīyo ūmanhya na ndūba, nūūlū gītī munhū kwingīla mu numba gīkī ifuule, wakūhayishindaalīja ha ndugu ūlung'wa ng'hoboko ha nkono.

²⁰ Na ng'hana ū lūshikū lwa ng'wa SEEBA lūlī giiti, lūt'isana; giiti sha gamha, ndūhū nūūlū ka būpe kado na kado.

²¹ A mashigukulu ging'we ga dini nagakolilwe, nīyo nagadalahile no; natūdūla ū kwikala niyūmīlījaga nago a malibilinga ging'we.

²² Nūūlū munehele shitambò sha kūpemvwa na shitambò sha būsu, natūshanukūla. Nūūlū ng'wenhe shitambò sha būsangī shawiza na kinehe, natūshilola nūūlū ū kūshilola.

²³ Yīnjagi ī yoge ya mīmbo ging'we a henaha! Na a malaka ga shikolo shing'we Īsho mukūtūlaga natūgadegeleka.

²⁴ Alīyo a kalamulīle ka wīmà ni kahūūmage gītī mongo, ū būtūngīlīja būyūsela gītī mongo gūtakamaga minzī!

²⁵ Bing'we numba ya Isilaeli, Ī likanza lya myaka makūmi anè aho ng'walī kū matogolo, ng'wanifunījaga shitambò ū nene, nūūlū shakwinha shose shose?

²⁶ Tūhaya ng'wabūūchaga iheema lya ntemi wing'we, wigasho wa shiikolile shing'we, na sonda ya ng'wa mulungu wing'we; h'ī shikolo īsho ng'wibeegejaga!

²⁷ Nakūmuponya muje kūle kūkīla Damasiko, alīhaya SEEBA, ūyo lina lyakwe alī Mulungu wa Būdūla bose.