2 Timoteo 4 - Bibilia Ilagano Lya Kale 2015

¹ Nalīkūkomeleja kū būtongi bo ng'wa Mulungu na bo ng'wa Kilisito Yesu, ūyo akūbalamula pye a banhū, a bapanga na a bafu, ū ng'wikanza lya kwilonga kwakwe mu būtemi bokwe.

² Gūlomeelage ū mhayo, bizaga ūmalīīlile būlī ikanza, lībize ūlīhelile nūūlū īlo ūtalīhelile; hamaga, hūgūlaga, ganikīlaga mu wiyūmīlīja na kalangīle kose.

³ Nguno līkūshika ikanza bakoya ū kūdegeleka a malange a masoga, bakūyikala bakwalīlījaga balangi ba būlī mbika, ba kūyūbabaabaata ū kū matū na mihayo ya kūlenganīla na kwikūmva kwabo!

⁴ Nīyo bakūgasaamya a matū gabo ū kū ya ng'hana, bagagalūche gabize ga kūdegelekela sūūsū dūhū!

⁵ Alīyo ū bebe bizaga na masala madeekanu mu būlī mhayo; ūbize ng'wiyūmīlīja nūūlū mu makoye; gūtūmamage ū nīmo gwa kūjilomeela ī Ng'hūlū Jawiza, ūgūshikīlīje ū nīmo gwako.

Paulo kūsomboola mihayo yakwe

⁶ Nguno ū nene naamalile kūfunyiwa gītī shitambo, ī likanza lya kwīnga kwane lyashikaga.

⁷ Naabūlwishije chiza ū būlūgū mu kūkūlang'hana ū kūzunya, naalūkalīchaga ū lūdīīma lwane.

⁸ Ū kū ng'halīlo ya yose ū mu lūshikū lwenūlo, īlīho mheela ya būtūngīlīja, īyo natūūlīlilwe; ngikili ya nyatemi, īyo akūninha ū Seeba, ū Namuji ntūngīlīja. Hangī nīyo ītī nene dūhū, alīyo pye na a bangī abo bakūyegelile ū kwilonga kwakwe.

⁹ Ītaga wize ū kūūnū wangū,

¹⁰ nguno ū Dema wanilekile, watogilwe ya mu sī, wajile Tesalonike. Ū Kulesite wajile Galatia, ū Tito nang'hwe Dalimatia.

¹¹ Luka dūhū h'ūyo alī hamò nane. Ūlū ūlabūūke kwiza ng'wizanage nū Maliko, nguno akūnigunanha hataale ū mu nīmo.

¹² Ū Tikiko nantūmile Efeso.

¹³ Ī kabbuudi ya mbeho īyo nakīleka Tiloa ha ng'wa Kalipo yenhanījage ūlū ūliza, pyī nī shitabo, ī no no no ī sha ndīlī.

¹⁴ Ū Isikanda ū nsuji wa chūma wanīītīla mihayo mingī ī yabūbi, ū Seeba akūng'winha mheela ya kwigeleelwa shītwa shakwe.

¹⁵ Nū bebe nkangūkage, nguno a bise watwihalalījaga kībi no īyo twīhayaga!

¹⁶ A ha būsombooji wa kwandya ū ng'wikanza lya būbūūlwa bone, atigelile nūūlū ūmò wa kwīmīīla hamò nane, pye bakanileka; ū Seeba ni atizagūbabalīla būbi ū mu mhayo gwenūyo.

¹⁷ Gwike ū Seeba akīmīīla hamò nane ūniguzuhya, kūlwa gīkī ū būlomeeji wa Ng'hūlū Jawiza būshikīlījiwe kūbītīla mulī nene, pye a banhū ba mahanga bigwe, h'ī chene nakapījiwa kūfuma ū mu nomo gwa shimba.

¹⁸ Nīyo ū Seeba akongeja ū kūnipīja kūfuma mu būlī nīmo gwabūbi, na akūnishisha mhola ū mu būtemi bokwe ū bo ng'wigūlū. Ikūjo lībize kūlī we shiku jose: Alichene.

Būgīsha bo kūmalīja

¹⁹ Ngīshage ū Piliska nū Akula, hamò nī kaya ya ng'wa Onesifolo.

²⁰ Ū Elasto akasaaga Kolinto, alīyo ū Tulofimo ū ng'wene akasaata nūneka Mileto.

²¹ Angūhaga ū kwiza kūko ī mbeho ya mu shiyaga ītaalī kwandya. Alīkūgīsha ū Eubulo nū Pude, nū Lino, nū Kilaudio, pye na a badūgū a bangī.

²² Seeba abize hamò na moyo gwako. Shigongo shibize hamò nang'ho: Alichene.