2 Sang'weli 5 - Bibilia Ilagano Lya Kale 2015

Daūdi kūbiza ntemi wa Isilaeli yose

¹ Hanuma ya henaho, a Baisilaeli būja balī ng'anda jabo jose, būūkashika ī Hebuloni ū kūlī Daūdi; aho bashika būng'wīla, “A bise tūlī mīlī na mininga gako gete.

² Ī shikū ījo Saulo walī ntemi wise, ū bebe h'ūyo wagatongeelaga a mabità ga Baisilaeli ū mu makanza ga kūja kū būlūgū na kūshoka. Nīyo ū SEEBA wakūwīla hape gīkī, ‘Ū bebe hū ūkūbadīīma a banhū bane a Baisilseli, hama ūkūbiza nsugi wabo.’”

³ Na lūūlū a banamhala bose ba Baisilaeli aho biza ī Hebuloni ū kūlī ntemi Daūdi, ū ntemi ūbeeja būlagane hamò nabo ī Hebuloni kū būtongi bo ng'wa SEEBA; būng'witīīla maguta ū Daūdi kūbiza ntemi wa Isilaeli.

⁴ Ū Daūdi aho alandya kūbiza ntemi walī na myaka makūmi adatū; ūsuga ikanza lya myaka makūmi anè.

⁵ Ī Hebuloni akikala ikanza lya myaka mpungatī na myeji ītandatū alī nsugi wa Yuda; ī Yelusalemu wikala myaka makūmi adatū na idatū abasugile a Baisilaeli a bose nī Yuda.

Daūdi kūgūdima nzengo gwa Yelusalemu

⁶ Hūna ū ntemi ūja na a bashilikale bakwe kūjūgūdumīla ū nzengo gwa Yelusalemu, kwilwisha būlūgū na a Bayebusi a bazengi baamo. A Bayebusi būng'wīla ū Daūdi, “Ūtūdūla ū kūshika ū ng'wenūmu, nguno nūūlū babboku dūhū na balemehazu bakūkūhangīja!” A boi biganikaga, “Ū Daūdi atūdūla ū kwingīla ū ng'wenūmu.”

⁷ Alīyo naheene ū Daūdi akīdima ī ng'hambī ya kūpīlīla ī ya mu Sayuni, gūbiza nzengo go ng'wa Daūdi.

⁸ Ū lūshikū lwenūlo ū Daūdi ūhaya, “Ose ose ūyo atogilwe kūbaheeba a Bayebusi, shing'wigeleelilwe abītīle ī nzīla īyo badahi ba minzī bakabītīlaga, alinhe ko abasange a ‘balemehazu na a babboku’ abo ng'holò ya ng'wa Daūdi ībakolilwe.” H'ī nguno yene lūlīho lūsumo lūhayile, “A babboku na a balemehazu batīko ū kwingīla ū ng'wikūlū.”

⁹ Na lūūlū ū Daūdi ūbiza ng'wikaji wamo ū mu ng'hambī ya kūpīlīla, wīyitana “Nzengo go ng'wa Daūdi.” Ūzenga ho chiza a h'ipandī lyenīlo, kwandīja ipandī lya Milo, kwingīīla mu gatī.

¹⁰ Hūna wiseema kūbiza na būdūla, nguno ū SEEBA Mulungu wa Būdūla bose walī hamò nang'hwe.

¹¹ Lītabītile ikanza ntemi Hilamu wa Tulo ūntūmīla ū Daūdi banhū; būja na mitī ya ng'wininga, hamò na baselemala na bazengi ba numba, būūkanzengela ū Daūdi numba y'ikūlū.

¹² Ū Daūdi ūbona hape gīkī ū SEEBA wantūūlaga a ha būtemi wa Isilaeli, na gīkī ū būtemi wakwe wabūgūngūhyaga kūlwa nguno ya banhū bakwe a Baisilaeli.

¹³ Ū Daūdi aho wīnga ī Hebuloni, akongeja kūtoola bakīma bangī ū mu Yelusalemu; ūbyalīlwa baana bangī bagosha na bakīma.

¹⁴ A mina ga baana abo bakabyalīlwa kwenūko gaya aha: Shamua, Shobabu, Nasani, Solomoni,

¹⁵ Ibuhaali, Elishua, Nefegi, Yafia,

¹⁶ Elishama, Eliada, na Elifeleti.

Daūdi Kūbapyena Bafilisiti

¹⁷ A Bafilisiti aho bigwa gīkī ū Daūdi witīīlilwe maguta kūbiza ntemi wa Baisilaeli, būja koi pye a bose kūjūnkooba; alīyo ū Daūdi wigwa, wika mu ng'hambī ya kūpīlīla ūkibisa ng'wenūmo.

¹⁸ A Bafilisti aho bashika, biyiita kū ntulumenho gwa Lefaimu;

¹⁹ hūna ū Daūdi ūmūja ū SEEBA, “Nabasange koi a Bafilisiti nakabadumīle? Ūkūbatūūla ū mu nkono gwane?” Ū SEEBA ūnshokeja, “Jaga koi ng'hana, nguno a Bafilisiti nakūbatūūla mu nkono gwako.”

²⁰ Hūna ū Daūdi ūja Baali-pelazimu, ūūkabapyenela kwenūko; ūhaya, “Ūmo ihūūma lya minzī līkapyagūlīlaga, h'ūmo wabapyagūlīla ū SEEBA a banishi bane ū kū būtongi wane.” Na lūūlū ī lipandī lyenīlo litanwa Baali-pelazimu.

²¹ A Bafilisiti būpeela, būleka henaho mashikolo gabo ga kwitongelegeja; ū Daūdi na a banhū bakwe biza būgasola būgajana.

²² A Bafilisiti batadīīlile biza hangī biyita ū kū ntulumenho gwa Lefaimu;

²³ ū Daūdi ūmūja hangī ū SEEBA. Ūng'wīla, “Yaya ū kūja wabisongaga, pīndaga ūkabizīīle kū numa yabo, ūlabadumīle wishīkīgije mu mitī ya mifolosadi.

²⁴ Na lūūlū ūlū wigwa mishaadūko kwigūlya ya matambī ga mifolosaadi gītī banhū bingī bakūshimīzaga, a henaho kalaganaga lūūlū wandye milīmo; nguno numho ū SEEBA watongelaga ū kū būtongi wako, akūlītūlaga ī libità lya Bafilisiti.”

²⁵ Ng'hana ū Daūdi wīta gīt'ūmo SEEBA akanagīīlīla; ūbatūlagūla a Bafilisiti nzīla ngima kwandīja Geba kūshisha Gezeeli.