2 Sang'weli 3 - Bibilia Ilagano Lya Kale 2015

Kaya ya ng'wa Daūdi

¹ Būkabiza ho būlūgū ikanza lya shikū ningī a ha gatī ya numba ya ng'wa Saulo nī ya ng'wa Daūdi. Gwike ū Daūdi ongeja kūpandīka nguzu, alīyo ī kaya ya ng'wa Saulo yongeja kūgogoloha.

² Aho alī mu Hebuloni ū Daūdi, akabyalīlwa baana bagosha aba: Ū myalwa wakwe wa kwandya walī Amunoni, ng'witūnja o ng'wa Ahinoamu ūyo walī muna Yezileeli.

³ Ū wa kabīlī Kileabu ng'witūnja o ng'wa Abigaili, ūyo walī nke o ng'wa Nabaali muna Kalimeli. Ū wa kadatū Abusalomu ng'witūnja o ng'wa Maaka, nshīke o ng'wa Talimai, ntemi wa Geshuli.

⁴ Ū wa kanè Adonia ng'witūnja o ng'wa Hagisi; ū wa katanò Shefatia ng'witūnja o ng'wa Abitaali.

⁵ Wa katandatū Isileamu ng'witūnja o ng'wa Egila, nke o ng'wa Daūdi. A benaba hū abo akabyalīlwa ū Daūdi aho alī Hebuloni.

Ishi-bosheti kwilemeelwa na Abuneeli

⁶ Ū mu shikū ja būlūgū a ha gatī ya numba ya ng'wa Saulo nī ya ng'wa Daūdi, gashi ū Abuneeli wizengaga wei ng'wenekīlī ū mu numba ya ng'wa Saulo.

⁷ Na lūūlū ū Saulo walī na nkīma ūngī, witanagwa Lizipa ng'wana Aiya. Lwise lūmò ū Ishi-bosheti ūmūja ū Abuneeli, “Nibūlī wandije kūlaala nū nke o ng'wa baba?”

⁸ Ū Abuneeli gūmpelanya no ū mhayo gwenūyo, ūyo akawīlwa na Ishi-bosheti; ūshosha alīhaya, “Bebe ū nene mmho gashi ī gete nalī ntwe gwa mvwa ya banhū ba lūganda lwa Yuda? Ī lelo yenīyī nalīyītīla wiza būtaale no ī kaya ya ng'wa so ū Saulo, na a badūgū bakwe, pye na a banwani biye; nataalī kūkūtūūla mu nkono go ng'wa Daūdi! Alīyo ū bebe hū walinhya kūnisola būbi kūlwa nguno ya nkīma ng'wenūyū!

⁹ Ū Mulungu ni antūlage hataale ū Abuneeli na kūtinda ho, ūlū natang'wītīlile ū Daūdi ū mhayo ūyo SEEBA wang'wisagīja mu kwilahīla,

¹⁰ ū gwa kūbūsaamya ū būtemi kwīnga ū mu numba ya ng'wa Saulo na kūlīguzuhya ī lisumbī lya ng'wa Daūdi wīsug'ī Isilaeli nī Yuda kwīngīīla Dani kūshisha Beeli-sheba.”

¹¹ Ū Ishi-bosheti atagimile kūnshokeja mhayo nūūlū gūmò ū Abuneeli, nguno walī ang'ogohile.

Abuneeli kūnkondela Daūdi

¹² Hūna ū Abuneeli ūtūma banhū baje ūko wikalaga ū Daūdi bakahooye nang'hwe bang'wīle, “Ī sī yenīyī ya ng'wa nani? Tūbeejage būlagane a ha gatī yako nū nene, nakūkūgunanha ū kwīnyamula ī Isilaeli ī yose īkūgalūkīle bebe.”

¹³ Ū Daūdi ūhaya, “Būgatū nakūbeeja nang'ho ū būlagane; alīyo gūlīho mhayo gūmò ūyo shikwigeleelilwe ūgūshikīlīje tame. Yaya ū kwiza ū kwibona nū nene ūlū ūtizile nang'hwe ū Mikali, ū nshīke o ng'wa Saulo.”

¹⁴ Hūna ū Daūdi ūtūma nhūng'wa ū kūlī Ishi-bosheti ū ng'witūnja o ng'wa Saulo; ūhaya, “Ninhage ū nke wane ū Mikali ūyo nakalomvwa kūfunya makoba igana ga Bafilisiti hū nūtoojiwa.”

¹⁵ Ū Ishi-bosheti ūlagīja ng'hana, ūīlwa ū Mikali ū kūlī ngoshi ū Palitieli ng'witūnja o ng'wa Laishi.

¹⁶ Ū ngoshi ūnkūūbīja; waja akūnīlīīlaga a ha numa, ūūkashika Bahulimu. Hūna ū Abuneeli ūng'wīla, “Bebe shokaga kaya lūūlū;” ūshoka kaya ng'hana.

¹⁷ Hanuma ya henaho ū Abuneeli ūhooya na a banamhala ba Isilaeli ūbawīla, “A makanza ga shikū ja kū numa ng'walī na ng'hūmbū ja kūng'wīta Daūdi kūbiza ntemi wing'we.

¹⁸ Gwītagi lūūlū ī haha, nguno ū SEEBA walī wang'haya ū Daūdi mu kwisagīja, A banhū bane a Baisilaeli nakūbapīja mu nzīla ya nkono gwa ntūmami wane Daūdi, ū kūfuma ū mu makono ga Bafilisiti, nū mu makono ga banishi babo a bose.”

¹⁹ Na a banhū ba lūganda lwa Benjamini ūhooya nabo būshū kū būshū ū Abuneeli; wahayīnga a henaho ūja ī Hebuloni, kūjūng'wīla ū Daūdi īyo baalī na ng'hūmbū ja kwīyīta a Baisilaeli a bose, na a ba numba ya ng'wa Benjamini.

²⁰ Aho alīja walī na banhū makūmi abīlī, wahayūshika ī Hebuloni ū kūlī Daūdi, ū Daūdi ūng'wītīla shigukulu ū Abuneeli na a banhū bakwe.

²¹ Hūna ū Abuneeli ūng'wīla ū Daūdi, “Īkī naje nīyo ī haha nakamilingīle ū baba būgonzo ū ntemi pye a Baisilaeli, babeeje ilagane nang'ho; ūbize ntemi wa mihayo yose gīt'ūmo ītogelilwe ng'holò yako.” Ū Daūdi ūnaga ū Abuneeli, ūja mu mhola.

Yoabu kūng'wibanga Abuneeli

²² Lītabītile ikanza a banhū ba ng'wa Daūdi būshoka nū Yoabu; baalī baja ipandī ilebe kwilwisha būlūgū, būshoka na nding'wa ja būyaga. Alīyo ū Abuneeli walī atī hamò nū Daūdi ū mu Hebuloni, nguno ū Daūdi walī wamala kūnaga ūja mu mhola.

²³ Ū Yoabu aho wiza na a bashilikale bakwe, ūwīlwa, “Ū Abuneeli ng'witūnja o ng'wa Neeli walī wizaga ū kūlī ntemi; ū ntemi ūnekela ūja, wajaga mu mhola.”

²⁴ Ū Yoabu ūja ū kūlī ntemi ūūkang'wīla, “Wītaga mhayo kī lūūlū ū gwenūyū? Ūlībona gīkī ū Abuneeli walī wiyenhaga ū kūlī bebe! Nibūlī walī waneka ūja? Wajaga lūūlū ng'hana ī haha!

²⁵ Ū bebe ūndeebile gete ū Abuneeli ū ng'witūnja o ng'wa Neeli; wakūkījaga masala, nguno walī wizaga kūkūlemba lemba, abone ūmo ūkūjīlaga, īmane īyo ūkwīyītaga.”

²⁶ Ū Yoabu ūfuma ūmo walūngalūngīlaga na Daūdi, aho wīnga ūtūma banhū būmpeeleela ū Abuneeli, būūkampandīkīla kū lwinzī lwa Sila būnshosha; alīyo ū Daūdi walī atamanile.

²⁷ Ū Abuneeli aho washoka, ū Yoabu ūmpūnja ha mhūjo, begeela ha gatī gatī ya mita, gītī alīhaya kūhoya nang'hwe mu mbisīla. Aho balī henaho, ū Yoabu ūnyugūūla ū Abuneeli līlūshū lwa mu nda, kūlwa kūmala shiilī nguno ya kūmūlaga nzunaye Asaheli, ū Abuneeli ūchīla henaho!

²⁸ Lītabītile ikanza ū Daūdi ūgwigwa ū mhayo gwenūyo; ūhaya, “Ū nene nū būtemi wane tūlī beela ū kū būtongi bo ng'wa SEEBA shikū jose ja welelo na welelo, tūtī na kwihīga ū mu mininga ga ng'wa Abuneeli ū ng'witūnja o ng'wa Neeli.

²⁹ A mininga gakwe ni gidīkīlage ha ntwe go ng'wa Yoabu, na kū banhū bose a ba mu numba ya ng'wa ise! Ū mu kaya ya ng'wa Yoabu atizūleka kwilonga mo munhū wa kūpandīka ilonda līmholela kū limu, nūūlū wa kūsaata mbiji, nūūlū wa kūlemehala ūyūshimīzīla nang'ha, nūūlū wa kūbūlagwa bo līlūshū, nūūlū wa kūkoyiwa nzala!”

³⁰ (Ū Yoabu nū nzunaye ū Abishai bakamūlaga ū Abuneeli kūlwa nguno walī wamūlaga nzuna wabo, ū Asaheli ū mu būlūgū wa Gibeoni.)

Banhū kūnīla Abuneeli

³¹ Hūna ū Daūdi ūng'wīla ū Yoabu na a banhū abo baalī hamò nang'hwe, “Tandūlagi ī shizwalo shing'we muzwaale magūnīla munīle ū Abuneeli.” Ū ntemi Daūdi ūshimīza na magūlū gakwe wei ng'wenekīlī akwīlondeelaga ī macheela īyo yalī ībūūkīgije mimba.

³² Būnjīka ū Abuneeli mu Hebuloni, ū ntemi ūlīla ng'hūngū n'ilaka lya higūlya, a ha shigila sha ng'wa Abuneeli; na a banhū a bangī pye a bose bakalīla no.

³³ Ū ntemi wīmba ī lyīmbo īlī kūlwa kūnīla ū Abuneeli; ūhaya: “Ni kinehe ū Abuneeli kūcha kachīle gītī ka mbūūlī?”

³⁴ A makono gako gaalī gatatungilwe, nūūlū a magūlū gako gaalī gatabohiwe. Ūmo munhū akagwīlaga kū būtongi wa bahūnga, nū bebe wagwaga gīko! A banhū būshokeja kūnīla hangī pye a bose!

³⁵ Hanuma ya henaho a banhū bose pye būng'wegeela ū Daūdi kūng'wikūmbīlīja, alye shilīlwa aho ītaalī līīmi. Alīyo ū Daūdi wilahīla alīhaya, “Ū Mulungu ni anitūlage hataale na kūtinda ho, ūlū nalaaloje ngatī nūūlū shilīwa shingī shose shose, aho līīmi lītaalī kūlibīla!”

³⁶ Pye a banhū būgūloleela ū mhayo gwenūyo būyega, nīyo būlī mhayo ūyo akagwīta ū ntemi gūkabayeja.

³⁷ Na lūūlū ū mu lūshikū lwenūlo a banhū būbona hape gīkī ū nkono gwa ntemi gwalī gūtīmo ū mu kūbūlagwa kwa ng'wa Abuneeli ng'witūnja o ng'wa Neeli.

³⁸ Hūna ū ntemi ūbawīla a batūmami bakwe alīhaya, “Mutūdeebaga gīkī ī lelo ū mu Isilaeli wagwaaga munhū ntaale na nkūjiwa?

³⁹ Ī lelo yenīyī ū nene natī na nguzu, nūūlū īkī nalī ng'witīīlwa maguta kūbiza ntemi; a ba ng'wana Seluya benaba balambu no ū kūlī nene. Ū SEEBA ni ang'wītīlage ū ng'hūbi kūlenganīla nī shītīle shakwe ī shabūbi!”