2 Sang'weli 24 - Bibilia Ilagano Lya Kale 2015

Daūdi kūbabala bashilikale

¹ Ū SEEBA ūbapelanīla hangī a Baisilaeli, hūna ūnsoosela ū Daūdi kūlwa nguno yabo; ūng'wīla, “Jaga ūkababale a banhū ba Isilaeli na a ba Yuda.”

² Na lūūlū ū Daūdi ūng'wīla ū Yoabu na a bataale ba mabità ga bashilikale abo walī nabo; ūng'wīla, “Jaga ūkūbītaga pye a hose ū mu ng'anda ja Baisilaeli, kwandīja Dani kūshisha Beeli-sheba, muje ng'ūbabala a bashilikale, nabamane ū wingī wabo balī banga.”

³ Alīyo ū Yoabu ūnshokeja ū ntemi, “Ū SEEBA Mulungu wako ni abongejage a bashilikale ng'hangala magana na magana; na a miso ga ng'wa baba būgonzo ū ntemi gagūbone ū mhayo gwenūyū! Ī gīsī ng'hana īlīho nguno kī ī ya kūng'wenheleja nose ū baba būgonzo ū ntemi akoobe kwīta mhayo gūlī gīko?”

⁴ Alīyo ū ntemi ūtūmamīla nguzu ū mu kūng'wīla ū Yoabu na a bataale ba mabità. Na lūūlū bīnga ū kū būtongi wa ntemi, būja ū kūbabala a bashilikale ba mu sī ya Isilaeli.

⁵ Būgūkīla ū mongo gwa Yolodani būūkandīja Aloeli, dakama ya nzengo gwalī mu sī ya ntubīlo, hūna būbīta hose pye ū mu Gadi, būūkashika Yazeeli.

⁶ Hama būlola Gileadi na kū sī ya Tatimu-hodishi; būbīta Dani-yaani, hanuma būtula kuluba bajile Sidoni.

⁷ Ū kūfuma ū kwenūko būja Tulo, kū ng'hambī ya bashilikale na kū mizengo ya Bahīvī na Bakanaani. Aho bīnga ū kwenūko būūkamalīīgīja Beeli-sheba kwitogolo lya Negevu ya Yuda.

⁸ Bahayūmala ū kwībītīla pyī ī sī būshoka Yelusalemu; ū lūgendo ū lose lūbasola myeji kenda na shikū makūmi abīlī.

⁹ Ū Yoabu wiza ūng'winha ū ntemi ī lisaabu lya bashilikale: Ū mu Isilaeli dūhū baalīmo bashilikale shihūmbī magana anaane, abo baalī na nguzu ja kūdūla kūdima shilanga; ū mu Yuda baalīmo bashilikale shihūmbī magana atanò.

Daūdi kūwitegeleja būhūbi bokwe

¹⁰ Ū Daūdi aho wamala kūbabala a bashilikale yandya kūnkoya ī ng'holò yakwe, ūnomba ū SEEBA alīhaya, “Naahūbile no ū kwīta ū mhayo gwenūyo. Nalīkwikūmbīlīja SEEBA ūwīnje ū būkenaagūji wa ntūmami wako; nītile mhayo gwa nyachilū no!”

¹¹ Ha ntondo yaho ī dilū aho ataalī kūfuma ū Daūdi, mhayo go ng'wa Seba gūng'wizīīla ū ng'hangi Gadi, ūyo walī mmona o ng'wa Daūdi; gūhaya,

¹² “Jaga ūkang'wīle ū Daūdi, ‘Ū SEEBA alīhaya gīkī, Nalīkwinha mihayo idatū ūsole gūmò gwaho, ūniwīle nakwītīle īyo natogilwe kūkwītīla.’”

¹³ Na lūūlū ū Gadi ūja ū kūlī Daūdi ūūkang'wīla, “Ūlīzunya ībize ho myaka mpungatī ya nzala ū mu sī yako? Nūūlū līkwizīīle ikanza lya kūbapeela banishi bako bakūkūkūūbīlījaga kūshisha myeji idatū ībīte? Nūūlū ihūūya lyīgwīle ī sī yako ikanza lya shikū idatū? Alilūūlū, iganikage ūninhe ū būlamuji wako nantwaalīle ūyo wanitūmaga!”

¹⁴ Ū Daūdi ūng'wīla ū Gadi, “Nalī mu makoye madito no ī haha; hambū hambū tūgwe mu makono ga ng'wa SEEBA, nguno ū ng'wene ī shigongo shakwe shilī shitaale. Yaya ū kūnileka nagwe mu makono ga banhū.”

¹⁵ Na lūūlū ū SEEBA ūtūma ihūūya ū mu sī ya Isilaeli, kwandīja lūshikū lwenūlo kūshisha ī likanza īlo lyalī līhelilwe; ū kūfuma ī Dani kūshika Beeli-sheba būcha banhū shihūmbī makūmi mpungatī.

¹⁶ Ū malaika aho waagūgoloola ū nkono gwakwe gīkī īītūle nī Yelusalemu, ū SEEBA ūsaatwa no kūlwa nguno ya būkenaagūji wenūbo, ūng'wīla ū malaika ūyo wababūlagaga a banhū, “Wigejaga lūūlū! Gwichage ū nkono gwako.” Ī likanza lyenīlo ū malaika akasangwa washika ha lūbūūga lwa kūtūlīla, lwa ng'wa Alauna ūmò wa Bayebusi.

¹⁷ Ū Daūdi aho wamona ū malaika ūyo wababūlagaga a banhū, ūng'wīla ū SEEBA, “Ū nene h'ūyo nalī ng'hūbi kūlwa būkenaagūji wane, al'a banhū aba, abo balī ng'holo jako, a bene baahūbile mhayo kī? Ū nkono gwako ni gūnigwīlage nene hamò na kaya yane!”

Daūdi kūzenga ng'walīlo

¹⁸ Ū lūshikū lwenūo ū Gadi ūja ū kūlī Daūdi ūūkang'wīla, “Būūkaga ūje ūkanzegele ng'walīlo ū SEEBA a ha lūbūūga lwa kūtūlīla ū lwa ng'wa Alauna ū Nyebusi.”

¹⁹ Ng'hana ū Daūdi ūja koi gīt'ūmo SEEBA akalagīīlīla mu nzīla ya ng'wa Gadi.

²⁰ Ū Alauna aho waponya a miso ūmona ū ntemi aliza ha ng'wakwe na banhū bakwe, ūfuma hanze kūnsūng'wanha, ūshika ūntugīja mazwi ū ntemi winama kūshisha ū būshū būkuumya hasī.

²¹ Ū Alauna ūbūūja, “Ni mhayo kī ūyo gwang'wenha ha ng'wane ū baba būgonzo ū ntemi?” Ū ntemi ūshosha, “Niza kūlūgūla ū lūbūūga lwako lwa kūtūlīla, nazenge ho ng'walīlo kūlwa ng'wa SEEBA, līhangījiwe ī lihūūya ū kūbamala a banhū.”

²² Ū Alauna ūng'wīla ū Daūdi, “Ū baba būgonzo ū ntemi ni asolage shose shose īsho alītogwa kūfunya gīt'ūmo alabonele. Jiiji na nzīkū solaga ja kūfunya shitambò sha kūpemvwa, a matūlīlo ga būsīga na a majooki gakūbiza ng'hwi ja kūpemba.

²³ Baba ntemi, ū Alauna alīng'winha dalali ū ntemi pyī ī shenīshi.” Ū Alauna ūng'wīla na, “Ū SEEBA Mulungu wako ni akwanukūlage ū kūlomba kwako.”

²⁴ Alīyo ū ntemi ūnshokeja ū Alauna, “Yaya ītī gīko, ū nene nalītogwa kūshigūla ī shikolo shenīshi ū kūfuma ū kūlī bebe. Natīko kūmfunīja shitambò ū SEEBA Mulungu wane kūfuma mu shikolo sha kwinhwa dalali. Hūna lūūlū ū Daūdi ūlūgūla ū lūbūūga lwa ng'wa Alauna nī nzīkū; ūjifunīja shekeeli makūmi atanò ja feza.

²⁵ Ū Daūdi ūzenga ho ng'walīlo kūlwa nguno ya ng'wa SEEBA, ūfunya hoi shitambò sha kūpemvwa na shakwinha sha būsangī. Hūna ū SEEBA ūzunya ū kūdegeleka ū būlombi ūbo yalombelagwa ī sī; lyīnga ī lihūūya ū mu sī ya Isilaeli.”