2 Sang'weli 23 - Bibilia Ilagano Lya Kale 2015

Mihayo ya kūmalīja ya ng'wa Daūdi

¹ Īyī yene mihayo ya kūmalīja ya ng'wa Daūdi: “Aka kalī kalūngalūngīle ka ng'wa Daūdi ng'witūnja o ng'wa Yese; būsombooji wa ngosha ūyo agūngūhiwe no no no. Munhū ūyo itīīlilwe maguta na Mulungu o ng'wa Yakobo, ng'wīmbi wa mīmbo ga kūyeja mu Isilaeli.

² Ū Moyo o ng'wa SEEBA akalūngalūnga mu nzīla yane; ū mhayo gwakwe gwalī ha lūlīmi lwane.

³ Ū Mulungu o ng'wa Isilaeli akayomba; ūyo alī Shiganga sha ng'wa Isilaeli ūniwīla gīkī, ‘Ū nsugi ūlū ūbasuga a banhū mu būtūngīlīja, ūlū akūbasuga mu logohano lwa ng'wa Mulungu;

⁴ ū ng'wenūyo alī gītī isana lya dilū, līīmi līkūfumaga mu lūshikū ūlo lūtī na malunde. Abange mbula īkwikaga chiza chiza mu būlembeezu, yagunanha sī kūzwa maswa managana.’

⁵ Angū, ī kaya yane ītī mu mbika yenīyo ū kūlī Mulungu? Atalaganile hamò nane ilagane lya welelo, Īlo līhelilwe chiza na kūlang'hanwa mu būlī mhayo? Atūnishikīlīgīja ū būpīji wane, na kūninha būlī mhayo ūyo nalī na ng'hūmbū nago?

⁶ Alīyo a babūbi pye babange gītī magwaata ga kūponyiwa; ayo gatīko kūding'wa na makono.

⁷ Būlī munhū ūyo akatūmamaga nīmo gwa kūdima magwaata, akatūmamīlaga shisīnza, nūūlū līntī lya mahagala; a magwaata gakapembagwa moto aho gūponejiwa.”

Bagosha ba mbagashūūla ba ng'wa Daūdi

⁸ Aya gene mina ga bagosha ba mbagashūūla ba ng'wa Daūdi, Yosheba-shebeti muna Takemoni; ū ng'wenūyo hū walī ntaale wabo a Badatū. Lwise lūmò akatūmamīla ichimu lyakwe ūbūlaga banhū magana anaane ng'wikanza līmò.

⁹ Hanuma yakwe ū ng'wenūyo walīho Elieza ng'witūnja o ng'wa Dodo, wa lūdūgū lwa ng'wa Ahohi. Ū ng'wenūyo walī hamò nū Daūdi lūshikū lwene Baisilaeli babasondagūlaga Bafilisiti aho baalī bibilinga Pasi-damimu kwilwisha būlūgū nabo. Hanuma ya henaho a Baisilaeli bīnga hoi;

¹⁰ alīyo ū wei wīmīīla nyagosha ūlwa nabo, būgwa Bafilisiti bingī, ū nkono gwakwe gūnoga kūshisha gūdamīīla a ha shipīndī sha lūshū lwakwe. Ū lūshikū lwenūlo ū SEEBA akabīītīla būtindi būtaale no. Hanuma y'ikanza, hū biza na a bashilikale a bangī ū kūlī Elieza, alīyo būsanga gwasaagaga nīmo gwa kūsola shikolo dūhū, kūfuma ū kū banhū abo baalī baacha.

¹¹ Hanuma ya ng'wenūyo walīho Shama, ng'witūnja o ng'wa Agee, muna Halaalī. Lwise lūmò a Bafilisiti bibilinga hamò ha mbūga ndebe, yalī īlīmilwe ndīngū; a Baisilaeli a bangī būpeela.

¹² Alīyo ū Shama wīmīīla nyagosha a ha ngūnda gwenūyo, ūbabūlaga no a Bafilisiti, ūbiza wagūpīja; ū lūshikū lwenūlo ū SEEBA ūbenhela būtindi būtaale.

¹³ Lwise lūmò mu makanza ga magesa, bagosha badatū ba mu banhū makūmi adatū abo baalī basanyiwe būja kūlī Daūdi, walī Adulamu ng'wipilinga lya kūpīlīla. Ū mu shikū jenījo ibità lya Bafilisiti lyalī lyatūūla ng'hambī mu sī ya ntubīlo gwa Lefaimu.

¹⁴ Ī likanza lyenīlo ū Daūdi walī ū ng'wipilinga lyenīlo, a Bafilisiti baalī na ng'hambī yabo ya bashilikale ipandī lya Betelehemu.

¹⁵ Kwimanīla ū Daūdi wiyigwa kūkolwa notà, hūna ūhaya, “Gīt'ūlū ni wigela munhū wa kūnenhela minzī kūfuma ū kū lwinzī ūlo lūlī hihī nū mita gwa Betelehemu!”

¹⁶ Na ng'hana a bagosha ba mbagashūūla a badatū būbatiinya a Bafilisiti, būja ū kū lwinzī ūlo lwalī hihī na Betelehemu būūkadaha a minzī būng'wenhela ū Daūdi. Alīyo aho genhwa ūlema ū kūgang'wa; ūgiita kū būtongi bo ng'wa SEEBA.

¹⁷ Ūhaya, “Ee SEEBA, ū nene ngilo gete ū kūgwīta ū mhayo gwenūyū! A genaya gatī mininga ga banhū abo baalī beegaga būpanga wabo?” H'ī nguno yene ū Daūdi ūlema ū kūgang'wa a minzī genayo. Ī yenīyo h'ī milīmo īyo bakīīta a bagosha ba mbagashūūla a badatū benabo.

¹⁸ Ū ntaale wa Badatū benabo walī Abishai ng'wanong'wawe o ng'wa Yoabu, ng'wana Seluya. Lwise lūmò akatūmamīla ichimu lyakwe ūbūlaga banhū magana adatū; na lūūlū ūpandīka lūkumo lwawiza, nang'hwe ūkumūka gīt'ūmo baalī a Badatū abo.

¹⁹ Gwike ū lūkumo lwakwe lūtalenganīlile nū lwa Badatū benabo, alīyo akīītwa kūbiza ntaale wabo; nūūlū īkī walī atabalagwa hamò nabo.

²⁰ Walīho na Benaya ng'witūnja o ng'wa Yehoyada muna Kazibeeli; nang'hwe walī ngosha apandile hasī, akīīta mihayo mitaale. Nguno akababūlaga bashilikale babīlī ba Bamoabu baalī basanyiwe no no no ū mu sī yabo. Na lūshikū lūmò lwa mbeho ng'halī akingīla ng'wichongo yalīmo shimba, ūkībūlaga.

²¹ Akalībūlaga n'idaaji lya kūfuma Misili. Ī lidaaji lyenīlo lyalī n'ichimu mu nkono, ū Benaya ūlīsanga alī na ng'hoome dūhū ū mu nkono. Ūshika ūlītaaja ī lī muna Misili ī lichimu īlo lyalī nalyo ū mu nkono gwalyo, hūna ūlībūlagīla ī lichimu lyalyo lyenīlo.

²² Ī milīmo yenīyo aho wīyīta ū Benaya ng'witūnja o ng'wa Yehoyada, nang'hwe ū lūkumo lwakwe lūkabiza gīt'ūmo lwalī ū lwa bagosha ba mbagashūūla a Badatū.

²³ Ū wei ū mu bagosha ba makaya pye a bose abo makūmi adatū walī akūjiwe no, alīyo ū mu bagosha ba mbagashūūla a Badatū walī atīmo. Ū Daūdi akantūūla kūbiza ntaale wa bashilikale ba kūnang'hana we.

²⁴ Ū mu bagosha ba mbagashūūla abo makūmi adatū baalīmo aba: Asaheli ng'wanong'wawe o ng'wa Yoabu, Elihanani ng'witūnja o ng'wa Dodo, muna Betelehemu;

²⁵ Shama muna Halodi, Elika muna Halodi;

²⁶ Helezi muna Paliti, Ila ng'witūnja o ng'wa Ikeshi, muna Tekoa;

²⁷ Abieza muna Anasosi, Mebunai muna Hushati;

²⁸ Zalimoni muna Ahohi, Mahalai muna Netofa;

²⁹ Heledi ng'witūnja o ng'wa Baana, muna Netofa; Itai ng'witūnja o ng'wa Libai, muna Gibea ya Benjamini;

³⁰ Benaya muna Pilasoni, Hidai wa kūfuma kū njonga ja Gaashi;

³¹ Abi-aliboni muna Alibati, Azimaveti muna Bahulimu;

³² Eliaba muna Sha-aliboni, bitūnja ba ng'wa Yasheni, Yonasani,

³³ Shama muna Halaalī, Ahiamu ng'witūnja o ng'wa Shaalalī, muna Halaalī;

³⁴ Elifeleti ng'witūnja o ng'wa Ahasibai muna Maaka, Eliamu ng'witūnja o ng'wa Ahisofeeli muna Gilo,

³⁵ Hezilo muna Kalimeli, Paalai muna Aliba,

³⁶ Igalī ng'witūnja o ng'wa Nasani muna Zoba, Bani muna Gadi,

³⁷ Zeleki muna Amoni, Nahalai muna Beeloti; walī mūūcha wa shilanga sha ng'wa Yoabu ng'wana Seluya,

³⁸ Ila muna Isila, Galebu muna Isila;

³⁹ na Ulia ū Ng'hītī. Ī lisaabu lyabo a bose baalī makūmi adatū na mpungatī.