2 Sang'weli 22 - Bibilia Ilagano Lya Kale 2015

Kūkumīlīja kwa ng'wa Daūdi

¹ Ū Daūdi ūng'wīmbīla ū SEEBA, aho ū SEEBA wampīja ū kū banishi bakwe bose pye, nū kūfuma ū mu nkono go ng'wa Saulo. Wīmba alīhaya mihayo īyī:

² “Ū SEEBA alī shiganga shane, hū ng'wene ipeelelo lyane na nkomooji wane;

³ Ū Mulungu wane h'ūyo alī shiganga shane, h'ūko nakapeelelaga; hū ng'wene ūyo alī lūmūda lwane na mhembe ya būpīji wane. Alī ibūngīlo lyane, hama alī ipeelelo lyane na mpīja wane; ūlī mpīja wane kūfuma mu nkono gwa biboneeji.

⁴ Ū SEEBA ūyo igeleelilwe kūkumīlījiwa hū ng'wene nakanīlīīlaga wanipīja ū kū banishi bane.

⁵ Mahuuli ga kūcha gaalī gaanipīndije, mihūūmo ya būkenaagūji yegeela kūnikundīkīja.

⁶ Ngoye ja kūlimu jūnibohya, mitego ya kūcha yūnikiimaalīla.

⁷ Aho naalī mu makoye nakanīlīīla SEEBA, nūng'witana ū Mulungu wane. Ūniigwa ī lilaka lyane kūfuma mu hekalu yakwe; ū kūlīla kwane kūshika ū mu matū gakwe.

⁸ Ī sī yūtingina, na kūyengeela, Ī misingi ya ng'wigūlū yūdetema; yūdetema nguno akasaaya no.

⁹ Ū mu mūūlū gakwe lyūfuma lyochi; nū mu nomo gwakwe gūfuma moto nkalī, makala gaaza gūfuma mo gakūbakaga.

¹⁰ Ūlīlugūla ī ligūlū wika hasī, Ī mhambala jakwe jīmīīla ha malunde gaapi.

¹¹ Hūna ūdamhīla makelubi ūlala ajile; wigasha ha manana ga lūyaga, ūlelema ajile.

¹² Giiti shūmpīndya, hūbiza wikalo wakwe, malunde ga mbula madito gūmpīndya.

¹³ Kūlwa nguno ya būng'weku w'ikūjo lyakwe, ndali ja moto jūng'weng'weeta.

¹⁴ Ū SEEBA ūpalalūka kūfuma ng'wilunde. Ūyo alī higūlya no ūtūma mihilimo yakwe.

¹⁵ Ūlasa masonga gakwe ūbasambaaja a banishi; ūtūma būpalalūki wa ng'hūba jakwe ūbakenaagūla.

¹⁶ Kūlwa kahamīle ka ng'wa SEEBA, alichene, kūlwa kafuulīle ka myūyī ya mūūlū gakwe, ī nzīla ja mu būjiba wa nyanza jiyeeleka ha ng'wape, nī misingi ya sī yūbiza hape.

¹⁷ Winama kūfuma ng'wigūlū ūnidima; ūnizubūla kūfuma mu būjiba wa minzī mashimu.

¹⁸ Ūnipīja kūfuma kūlī ng'wanishi wane ū wa nguzu ningī, kūfuma kūbo abo banikolilwe, abo nī nguzu baniheebile.

¹⁹ Bakiza kūnūbūkīla ng'wikanza lya makoye gane, alīyo ū SEEBA ūnigunanha.

²⁰ Ūnisola ūnitūūla h'ipandī lya ng'wanya ngalī; ūnipīja nguno aniyegelile.

²¹ Ū SEEBA wanītīlile yawiza kūlenganīla na būtūngīlīja wane; waninong'hile kūlenganīla na wela wa makono gane.

²² Nguno najidimile ī nzīla ja ng'wa SEEBA. Nataalī kwīta yabūbi kūlwa kūgalūka na kūneka ū Mulungu wane.

²³ Ī nzīla jakwe jose jilī kū būtongi wane; nataalī kūgalūka kūshileka ī shilagīlo shakwe.

²⁴ Ū kūlī we natī na shilingo; nū kū mihayo yabūbi nalī ng'wilang'hani.

²⁵ Ū SEEBA waninong'hile kūlenganīla na būtūngīlīja wane; kūlenganīla na wela wane kū būtongi wakwe.

²⁶ Ū kūlī nsanyiwa ūkiyoolechaga gīkī ūlī wa kūsanyiwa; ū kūlī we ūyo atī na shilingo ūkiyoolechaga ūtī na shilingo.

²⁷ Ū kūlī ng'wela ūkiyoolechaga ūlī ng'wela; alīyo ū kūlī nkenaagūji ūkiyoolechaga ūlī nkalī.

²⁸ A bidoohya ūkabapījaga; alīyo a miso gako gabalolile a bikumīlīja kūlwa kūbagwisha.

²⁹ SEEBA ūlī tala yane; ū SEEBA akashigalūchaga ī giiti shane lyabiza isana.

³⁰ Kūlwa būgunanhi wako nadūgije kūpyena'ibità lya bilwisha; kūlwa būgunanhi bo ng'wa Mulungu wane nakizwanukaga ndugu.

³¹ Ū SEEBA ū ng'wene ī nzīla yakwe ngololoku; ū mhayo go ng'wa SEEBA gūtī na būka. Ū wei alī lūmūda kū bose abo bakūpeelela kūlī we.

³² Angū, nani ūngī ū Mulungu ūlū atī SEEBA we wike? Nū Shiganga alīho nani ūlū atī ū Mulungu wise?

³³ Ū ng'winhi wane wa nguzu ng'wene Mulungu; nī nzīla yane hū wei akanigoloolelaga.

³⁴ Ī mhambala jane akajinhaga būdūla wa kūpeela gītī saala; akanigunanhaga kwīmīīla ha gūngūhu ha ngūlya.

³⁵ A makono gane akagalangaga mihayo ya būlūgū; nose nadūgije kūgoma nūūlū būta wa chūma sha shaba.

³⁶ Ūkaninhaga lūmūda lwa būtindi wako; ūkinamaga wanegeela gīkī ūnīte kūbiza nalī nkūjiwa.

³⁷ Ī nzīla yane ūkanigalīhījaga a ha kūpanda, Ī mhambala jane jitizūtala jikīnga ū mu nzīla.

³⁸ “A banishi bane nakaboolomya kūshisha nūbakenaagūla; natashokile kū numa kūshisha kūbamala gete.

³⁹ Nakabatobagūla gete batabūūkile hangī, bakagwa hasī kū mhambala jane.

⁴⁰ Ūkaninha nguzu ja kūlwīla mu būlūgū; a banishi bane ūbinamya kū mhambala jane.

⁴¹ A banishi bane ūkabīīta kūninhīla ngongo būpeela; abo banikolilwe nūbakenaagūla.

⁴² Bakalīla no balīkooba wa kūbagunanha, alīyo atigelile ū wa kūbapīja; būnīlīīla ū SEEBA, alīyo atabashokegije mhayo gose gose.

⁴³ Nakabatobagūla, nūbashigina gītī lūbuubu lwa hasī; nūbapandagīla na kūbatobanga gītī tembe mu makūūwa.

⁴⁴ “Nū mu kūgomelwa na banhū bane wanipīgije bebe; ūnilang'hana ūnīta kūbiza ntwe higūlya ya mahanga; na a babo naalī natabamanile balī ha sīlīlī ya būsugi wane.

⁴⁵ Banhū bageni bakwizaga mu wibeeleleja wa higūlya gūlya; ūlū baalwigwa ū lūkumo lwane bakūgalūkaga wangū babiza bigwi.

⁴⁶ Pye gete bakūgwaga ng'holò; bakwizaga kūnū bakūdetemaga kūfuma ū kū wibisīlo wabo.

⁴⁷ “Ū SEEBA alī mpanga! Akumīlījiwe ūyo alī Shiganga shane! Agūngūhiwe ū Mulungu ūyo alī Shiganga, ū Mpīja wane!

⁴⁸ Ū ng'wenūyo alī Mulungu ūyo akanilīpīlaga shiilī; hū ng'wene ūyo akūgatūūlaga mahanga ha sīlīlī yane,

⁴⁹ hū ng'wene ūyo akūnīnjaga mu makono ga banishi bane. Ūkūnigūngūhyaga higūlya ya banhū abo banikolilwe; nū kūfuma ū mu nkono gwa ng'wiboneeji ūkūnipījaga bebe.

⁵⁰ Na lūūlū nakūkūkumīlīja SEEBA ū mu mahanga; nakwīmba mīmbo ga kūlīgongoola ī lina lyako.

⁵¹ Akang'winhaga būtindi būtaale ū ntemi wakwe; ū ng'witīīlwa maguta wakwe akang'olekejaga wiza būtī wa kūkalīka, ū Daūdi nī shibyalīlwe shakwe kūshisha welelo bose.”