2 Sang'weli 20 - Bibilia Ilagano Lya Kale 2015

Sheba kūngomela Daūdi

¹ Ūsangwa alīho hoi ngosha ūmò ng'wangū kūpelana būpelanu būtī na solobo, lina lyakwe Sheba ng'witūnja o ng'wa Bikili, wa lūganda lwa Benjamini. Ū munhū ng'wenūyo ūng'ang'aaja mhembe; hūna ūhamuka n'ilaka lya higūlya alīhaya, “A bise tūtī na ngabo gete gashi ū mulī Daūdi, tūtī na wingīji nūūlū hado ū mulī ng'witūnja o ng'wa Yese! Bebe Isilaeli, būlī munhū kwiheema lyakwe!”

² Na ng'hana a Baisilaeli būneka ū Daūdi, būnkūūbīja Sheba ng'witūnja o ng'wa Bikili. Alīyo a banhū ba lūganda lwa Yuda bikala hamò nū ntemi wabo, bīnga nang'hwe ū kū mongo gwa Yolodani būkashika nang'hwe ī Yelusalemu.

³ Ū Daūdi aho washika ū kū kaya yakwe ī Yelusalemu, ūbasola a bake bakwe a bado ab'ikūmi, abo walī wabalekela nīmo gwa kūlīlang'hana ī likūlū; ūbatūūla mu numba yabo ya helegeeko balang'hanwe ng'wenūmo. Ūyūbinha ī shiigunaanīlo, alīyo atalaalile nabo hangī, būbiza gītī bachīlwa; bakikala gīko bakūlang'hanagwa shikū jose ja būlamu wabo.

Abishai kūgatongeela mabità

⁴ Hūna ū Daūdi ūng'wīla ū Amasa, “Nitanīlage pye a bashilikale ba mu lūganda lwa Yuda, mu shikū idatū babize bashikaga aha; nū bebe ūbize ūlīho.”

⁵ Alīyo ū Amasa aho waja, ūmala ko ikanza ilīhu kūtinda īlo walī wahelelwa nū ntemi.

⁶ Nose ū Daūdi ūng'wīla Abishai, “Alilūūlū ū Sheba ng'wana Bikili ng'wenūyū akūtwītīla yabūbi kūtinda ūmo walī watwītīlile Abusalomu. Basolage a batūmami ba ng'wa so būgonzo ūnkūūbīje, nguno nose akūpeelela kū mizengo īgītīlījiwe ndugu apūlūgūke.”

⁷ Na lūūlū a banhū ba ng'wa Yoabu, na a Bakeleeti na a Bapeleeti, hamò na a bagosha ba mbagashūūla pye a bose būbūūka bajile, balī ha sīlīlī ya būtongeeji bo ng'wa Abishai. Bīnga ī Yelusalemu balīnkūūbīja ū Sheba ng'witūnja o ng'wa Bikili.

Amasa kūbūlagwa na Yoabu

⁸ Būshika Gibeoni ipandī ilebe lyalīho iwe itaale, hūna ū Amasa wiza nang'hwe alībasūng'wanha. Ī likanza lyenīlo ū Yoabu walī azwalile shizwalo shakwe sha mu būlūgū, hūna ū mu nkīmbīlī witunga nshipi gwa nyashilikale, na lūshū mu shilaalo shalo; kwimanīla lwalagala hasī aho alīshimīza.

⁹ Hūna ū Yoabu ūndima ū Amasa kū ndezu na nkono gwakwe gwa būlyo gītī alīhaya kūmbipa.

¹⁰ Alīyo ū Amasa wikala atalūdīlīlile ū lūshū ūlo lwalī ū mu nkono go ng'wa Yoabu; hūna ū Yoabu ūng'ohoola mu nda, widīka hasī ū būla. Ū Amasa ūchīla henaho, atachimilwe lūkangala lwa kabīlī. Hūna ū Yoabu nū ng'wanong'wawe ū Abishai būduta bajile bakūnkūūbījaga ū Sheba ū ng'witūnja o ng'wa Bikili.

¹¹ Ūmò wa banhū ba ng'wa Yoabu wīmīīla hihī nū Amasa ūyūbawīla a banhū, “Ūyo ang'hayile Yoabu, nū yūyo alī kū lwandī lwa ng'wa Daūdi anondeele Yoabu!”

¹² Ū Amasa walī alambalalile hasī ha gatī gatī y'ikūūwa akūgalagalaga mu mininga gakwe; ū munhū ūyo wabawīlaga a banhū ūbona bayīmīīla henaho. Aho wabona gīkī būlī ng'wene alīyūshika a halī Amasa wīmīīla, ūmveveenya ang'wīngije a h'ikūūwa, ūntwala ng'witongo ūūkantūūla ng'wenūmo ūmponegeja līng'wenda ūnkundīkīja.

¹³ Ū Amasa aho wīnjiwa a h'ikūūwa, pye a banhū būja na lūgendo lwabo, balīnondeela ū Yoabu, kūnkūūbīja ū Sheba ū ng'witūnja o ng'wa Bikili.

Kūbūlagwa kwa ng'wa Sheba

¹⁴ Ū Sheba ūjiyeeleela pyī ī ng'anda ja mu Isilaeli, ūūkashika Abeli ya Beti-maaka, nī Belilti ī yose; bibilinga kūnondeela.

¹⁵ A mabità ga ng'wa Yoabu aho gashika ī Abeli ya Beti-maaka gūgūtinganīla ū nzengo gwenūyo. Būzenga ikīgo lya kūgūpīndya ū nzengo, lyūkandīkīja a ha ndugu īyo yalī īgūpīndīlīgije ū nzengo, hūna bandya kwīpūūlīīla ī ndugu īgwe.

¹⁶ Nkīma ūmò nchagūku ūhīlīka kūfuma ū mu gatī ya nzengo alīhaya, “Bing'we bababa, degelekagi! Nidegeleki! Ng'wīlagi ū Yoabu egeele aha nayombe nang'hwe.”

¹⁷ Aho wegeela hoi, ū nkīma ūbūūja, “Ū bebe h'ūlī ng'wene ū Yoabu?” Nang'hwe ūshosha, “Na nene ng'hana!” Ū nkīma ūhaya, “Baba degelekaga ūmo alīhayīla ū ntūmami wako.” Ūhaya, “Naadegelekaga.”

¹⁸ Ū nkīma ūhaya, “Ī kale biwīlaga gīkī, ‘Ūlū mutogilwe kūganikīlwa chiza, jagi Abeli; na ng'hana yagololokaga ī mihayo.’

¹⁹ A bise tūlī banhū ba mhola na ba kūsanyiwa ū mu Isilaeli. Baba ūlīhaya kūkenaagūla nzengo ūyo gūlī ninaabo ū mu Isilaeli. Ni kinehe ūlīhaya kūbūgabbula ū wingīji bo ng'wa SEEBA?”

²⁰ Ū Yoabu ūshosha ūhaya, “Ī liganiko lyenīlo lītī lyane ū nene, nīyo ī liganiko lya kūgabbula nūūlū kūkenaagūla ni līkachīlage kūle!

²¹ Ītī gīko na hado yaya; alīho munhū ūmò, lina lyakwe Sheba ng'witūnja o ng'wa Bikili, wa kū sī ja magūlya ga Efalimu. Ū munhū ng'wenūyo wagoloolile nkono gwakwe kūng'ūbūkīla ū ntemi Daūdi. Ūlū ng'ūmfunya ū munhū ng'wenūyo, ū nene nīnga na kwīnga a ha nzengo gwing'we.” Ū nkīma ūng'wīla ū Yoabu, “Lenda lendagi hado lūūlū mukūponegejiwa ū ntwe gwakwe kūfuma kwigūlya ya ndugu.”

²² Ū nkīma ng'wenūyo aho wīnga a henaho, ūūkatūmamīla masala gakwe, ūlūngalūnga nabo pye a banhū, būntīna ū ntwe gwakwe ū Sheba ū ng'witūnja o ng'wa Bikili; būgūponeja hanze ū kūlī Yoabu. Yoabu nang'hwe ūlīja na kūlīja mhembe yakwe, bīnga a banhū bakwe a ha ndugu ya nzengo, būshoka kaya būlī ng'wene kū ng'wakwe. Ū Yoabu nang'hwe ūshoka Yelusalemu kūlī ntemi.

²³ Ū Yoabu ng'wenūyo hū walī ntaale walyo pyī ī libità lya Baisilaeli. Ū ntaale wa Bakeleeti na a Bapeleeti walī Benaya ng'witūnja o ng'wa Yehoyada.

²⁴ Ū ntaale wa milīmo y'ihadīke walī Adonilamu. Ū ng'wandīki wa mihayo ya būsugi walī Yehoshafati ng'witūnja o ng'wa Ahiludi.

²⁵ Ū kalani ntaale walī Sheva; a bagabīji baalī ba Sadoki na Abiasaali;

²⁶ ū ngabījibo ng'wa Daūdi walī Ila muna Yaili.