2 Sang'weli 2 - Bibilia Ilagano Lya Kale 2015

Daūdi kūbiza ntemi wa Yuda

¹ Ū mu shikū jenīlo ū Daūdi ūmūja ū SEEBA, “Naje kū nzengo gūmò gwaho ū mu sī ya Yuda?” Ū SEEBA ūng'wīla, “Jaga.” Ū Daūdi ūbūūja hangī, “Halī ūko naje?” Ū SEEBA ūng'wīla, “Jaga Hebuloni.”

² Na lūūlū ū Daūdi ūja ko ng'hana, na a bake bakwe a babīlī, ū Ahinoamu wa Yezileeli nū Abigaili ūyo walī nke o ng'wa Nabaali muna Kalimeli.

³ Ū Daūdi ūbasola na a banhū abo bajaga hose hose hamò nang'hwe; būlī ng'wene na kaya yakwe, ūja nabo būūkabiza bikaji ba kū mizengo ya Hebuloni.

⁴ Hūna a banhū ba Yuda biza ī Hebuloni, būng'witīīla maguta ū Daūdi gīkī abize ntemi wa numba ya Yuda. Aho bang'winha ī mhola ū Daūdi gīkī a bana Yabeshi-gileadi hū bene abo bakanjīka ū Saulo,

⁵ ūbatūmīla nhūng'wa a banhū ba Yabeshi-gileadi; ūbawīla, “Ū SEEBA ang'wīlūkīle a bing'we kūlwa nguno ya kūng'wītīla ū wiza wenūbo ū sīng'we būgonzo ū Saulo, ng'ūnjīka na kūnjīka.

⁶ Nīyo ū SEEBA leki ang'olekeje wiza na būtogwa būtaale; nū nene nakūng'olekeja wiza bo mbika yenīyo kūlwa nguno ng'wagwītile ū mhayo gwenūyo.

⁷ Alilūūlū, īmagi hīgīyī na mubize bashisha ng'holò; nguno a banhū ba numba ya Yuda banītile ū nene kūbiza ntemi wabo, aho waacha ū sīng'we būgonzo ū Saulo.”

Ishi-boshesi kūbiza ntemi wa Isilaeli

⁸ Ū ng'wikanza lyenīlo ū Abuneeli, ng'witūnja o ng'wa Neeli, ūyo walī ntaale wa mabità ga ng'wa Saulo, ūsangwa wansolile ū Ishi-boshesi ū ng'witūnja o ng'wa Saulo, ūntwala Mahanaimu.

⁹ Ūūkang'wīta kūbiza ntemi wa banhū ba Gileadi, Ashuli, Yezileeli, na a banhū ba Efulaimu, Benjamini nī Isilaeli ī yose.

¹⁰ Ū Ishi-boshesi ng'witūnja o ng'wa Saulo aho alītūūlwa kūbiza ntemi wa Isilaeli walī na myaka makūmi anè, ūsuga ikanza lya myaka ībīlī. Alīyo ī numba ya ng'wa Yuda ī yene yūnondeela Daūdi.

¹¹ Ī likanza ī lyose īlo walī Hebuloni ū Daūdi aho alī ntemi wa Yuda, lyalī myaka mpungatī na myeji ītandatū.

¹² Ū Abuneeli ng'witūnja o ng'wa Neeli ūbūūka ī Mahanaimu kūja Gibeoni, hamò na banhū ba ng'wa Ishi-bosheti ū ng'witūnja o ng'wa Saulo.

¹³ Ū Yoabu ng'wana Seluya nang'hwe ūja koi na banhū ba ng'wa Daūdi; būūkamanhīja kwilambo lya Gibeoni. Ibità līmò ligasha kū lwandī ūlū ū lwilambo lyenīlo, nī libità ī līngī ligasha ū kū lwandī ū lūngī; gikimaalīla.

¹⁴ Kwimanīla ū Abuneeli wang'wīla ū Yoabu, “Ni babūkage a bayanda bigushe tūlole!” Yoabu nang'hwe ūzunya alīhaya, “Būgatū ni babūkage.”

¹⁵ Būbūūka ng'hana, būbalwa ikūmi na babīlī a ba lwandī lwa Benjamini, ū kūlī Ishi-boshesi ng'witūnja o ng'wa Saulo; na a ba lwandī lwa ng'wa Daūdi ikūmi na babīlī.

¹⁶ Hūna būlī ng'wene ūndima ū ng'wilwisha wakwe kū ntwe, na kūnchima lūshū ū mu lūbazu kūshisha lūlibīla; a bose būgwa hasī! Na lūūlū ī lipandī lya henaho ī Gibeoni litanwa Helikati-hazulimu.

¹⁷ Ū būlūgū wa lūshikū lwenūlo būkabiza būkalī no; ū Abuneeli na a banhū bakwe a Baisilaeli būpyenwa na a banhū ba ng'wa Daūdi.

Abuneeli Kūmūlaga Asaheli

¹⁸ A bitūnja ba ng'wana Seluya baalīho hoi būdatū wabo, ū Yoabu, Abishai nū Asaheli. Ū Asaheli ū ng'wene walī mpeeji no, gītī laala ya kū matogolo.

¹⁹ Ūng'wisonja ū Abuneeli; atagalūkile kū būlyo nūūlū kū lūmoso aho alīmpeeja.

²⁰ Ū Abuneeli aho wikībūka ū kū numa ūmona ū Asaheli, ūbūūja; “Gashinaga ūlī bebe Asaheli?” Sūmba nang'hwe ūshosha, “Nene ng'hana!”

²¹ Ū Abuneeli ūng'wīla, “Galūkaga kū nkono gwa būlyo nūūlū gwa lūmoso, ūnsole ūmò wa bayanda ūntaagīje ng'wenūyo ī shilanga shakwe.” Alīyo ū Asaheli atalekile ū kūng'widomha.

²² Ū Abuneeli ūng'hūgūla hangī ū Asaheli, “Bebe lekaga ū kūniidomha gīko ū nene; nibūlī ūnenheleje kūkūbūlaga? Ī gīsī nakwilola kinehe nū nkūlūyo ū Yoabu?”

²³ Gwike ū Asaheli atazunije ūkūleka ū kūmpeeja ū Abuneeli; nose ū Abuneeli ūlīponya ī lichimu lyakwe lyūkantūla munda ū Asaheli, lyūntūlīla kū someke yalyo lyūpulung'hanya kū ngongo. Ūgwa ūchīla henaho; būlī munhū ūyūshika wīma aho akagwīla ū Asaheli ūcha.

²⁴ Alīyo ū Yoabu nū Abishai būng'wisonja ū Abuneeli; ī līīmi aho lyayūlengeela kūhaya kūlibīla, būshika kū ngūlya gwa Ama, bbihī na Gia, kwikūūwa lya kūja kwitogolo lya Gibeoni.

²⁵ Hūna a banhū ba Benjamini bibilinga hamò, kūlondeela būtongeeji bo ng'wa Abuneeli; būbeeja ibità bīmīīla ha ka ngūlya kalebe, bīma nyagosha kwilwīlīīla.

²⁶ Ū Abuneeli ūng'hīlīka ū Yoabu ūng'wīla, “Ī līlūshū līkwikala līkūlyaga banhū ilalī? Ūtamanile gīkī ū mhayo gwenūyū ū kū ng'halīlo yaho būkūbiza ho būpīna būtaale? A banhū bako bakūbakūūbīja a badūgū babo kūshisha nanalī hū ūbawīle booye?”

²⁷ Ū Yoabu ūhaya, “Nalīkwilahīlīla mu lina lya ng'wa Mulungu mpanga gīkī, ūlū ni ūtahayile mhayo, a bagosha beneba ni babakūūbīlīja a badūgū babo kūshisha kwela ū būjikū.”

²⁸ Na lūūlū ū Yoabu wīlīja ī ndūūlilū yakwe, pye a banhū bīma booya ū kūbakūūbīlīja a Baisilaeli; nū būlūgū batalwile hangī.

²⁹ Ū būjikū wenūbo bose ū Abuneeli na a banhū bakwe būshimīza kūlītīna ī litogolo lya Alaba. Būūkagūkīla ū mongo gwa Yolodani, būshimīza ī likanza lya līīmi lya dilū ī lyose, kūshisha būshika Mahanaimu.

³⁰ Ū Yoabu nang'hwe ūshoka ū kūfuma ū kūnkūūbīja ū Abuneeli, wiza kūbakuminga a banhū bakwe. Aho babalwa yūmanika gīkī a banhū ba ng'wa Daūdi abo bakabiza batīho baalī ikūmi na kenda, kūleka kūng'wisaaba ū Asaheli.

³¹ Alīyo a banhū ba ng'wa Daūdi baalī babūlaga banhū magana adatū na makūmi atandatū a ba Benjamini, abo baalī nū Abuneeli.

³² Būnsola ū Asaheli būūkanjīka Betelehemu mu shigila sha ng'wa ise. Hūna ū Yoabu na a banhū bakwe būshoka Hebuloni, būkeeyula bakūshimīzaga; būūkashika ko būleela ū būjikū.