2 Sang'weli 16 - Bibilia Ilagano Lya Kale 2015

Ziba kūng'wilembekeja Mefi-boshesi

¹ Ū Daūdi aho wegeela kūbīta a ha gatī gatī ya lūgūlū, būng'wipumūkīja Ziba, ū nang'hani wa kaya ya ng'wa Mefi-boshesi; walī wabīīma nzīla na nzobe jakwe jilī na myendya ya kwigasīja a ha migongo, hama jabbakīlījiagwa migatī magana abīlī, na keki igana ja mizabibu, na keki jingī igana ja tiini, na shisaabo sha divai.

² Ū ntemi ūmūja ū Ziba, “Ni sha kinehe ī shose shenīshi?” Ū Ziba ūshosha, “Ī nzobe jilī ja kūdamhīla banhū ba ng'wikūlū, ī migatī na a matwajo sha kūlya a banhū benaba, ī divai ī yene ya kūyūng'wa a banhū ūlū bageehelwa nguzu ū kwikūngū.”

³ Hūna ū ntemi ūbūūja, “Alī halī ū ng'wizūkūlū o ng'wa so būgonzo?” Ū Ziba ūng'wīla, “Ū ng'wene wikalaga Yelusalemu, nguno aliganika gīkī, ‘Ī lelo ī numba ya Isilaeli īkūnishokeja ū būtemi ūbo walī o ng'wa gūkū.’”

⁴ Hūna ū ntemi ūng'wīla ū Ziba, “Kūfuma haha ī shose ī sha ng'wa Mefi-boshesi shabizaga shako.” Ū Ziba ūhaya, “Ni nanukūlagwe ū mu makono ga ng'wa baba būgonzo ū ntemi.”

Shimei kūndūkagūla Daūdi

⁵ Ū Daūdi aho wegeela Bahulimu, munhū nebe wa lūdūgū lūmò nī kaya ya ng'wa Saulo ūbasanga. Ī lina lyakwe walī Shimei, ng'witūnja o ng'wa Gela; aho aliza gīko wandya kūdūkana.

⁶ Ūyūmponda na mawe ū Daūdi na a batūmami ba ntemi, nūūlū īkī a bashilikale a balang'hani bakwe ū ntemi baalī bantingatile ha gatī, ū kū būlyo nū kū lūmoso.

⁷ Ū Shimei aho alīdūkana wahayaga, “Jaga nīyo wīnge gete bebe ibūlagi lya banhū, nū gwa kūpya ūtī nago!

⁸ Ū SEEBA wakūlīpaga kūlwa mininga ayo wagiita mu numba ya ng'wa Saulo, numba īyo wasola būsugi wayo. Ū SEEBA wang'winhaga ū būsugi ng'witūnja wako Abusalomu. Ī ngelelo yako yashikaga nguno ūl'ibūlagi!”

⁹ Ū Abishai ūng'wīla ū ntemi, “Ni kinehe ī mvwa īyo īchile īyī īkwikalaga yūndondomela ū baba būgonzo ū ntemi? Nizunīlījage naje nakagūtīne ū ntwe gwakwe!”

¹⁰ Alīyo ū ntemi ūshosha alīhaya, “Bing'we ba ng'wana Seluya, mulī na mhayo kī shi ū kūlī nene? Ī gīsī ū ng'wenūyū ūlū ūbiza akūnidūkaga gīko īkī wawīlagwa na SEEBA gīkī, ‘Ndūkage ū Daūdi,’ numho nani ūyo akūbūūja gīkī, ‘Nibūlī ūlīta gīko?’”

¹¹ Hūna ū Daūdi ūng'wīla ū Abishai na a batūmami bakwe a bangī, “Ū ng'witūnja wane, ū wa kūfuma mu mīlī gwane gete alīkooba kūnīngīja būpanga wane. Sumvwa nū munhū wa lūganda lwa Benjamini ūyū! Nekagi gīt'ūmo alī; nekagi adūkane ūmo atogelilwe, nguno ū SEEBA wang'wīlaga kwīta gīko.

¹² Hamo ū mu gīko ū SEEBA akūbūbona ū wiboneelwa wane, anilīpe yawiza a ha ng'wanya gwa shidūki īsho nalanukūla lelo īyī.”

¹³ Na lūūlū ū Daūdi na a banhū bakwe būja nalo ū lūgendo lwabo ū ng'wikūūwa īlo babītīlaga. Ū Shimei nang'hwe walīko ū kū ntambūko, ū kū ntulumenho gwa lūgūlū, akūbapondanga mawe, na kūbalulumīja malindo.

¹⁴ Nose ū ntemi na a banhū abo baalī hamò nang'hwe būshika ūko bajaga, alīyo baalī banoga kīngī nasho; ūlembeela hoi wifuula.

Abusalomu kūndegeleka Ahisofeeli na Hushai

¹⁵ Ū ng'wikanza lyenīlo ū Abusalomu na a Baisilaeli a bose būbiza bashikaga ī Yelusalemu; nū Ahisofeeli walī hamò nabo.

¹⁶ Hūna ū Hushai ū nwani ng'wiye o ng'wa Daūdi ūja a halī Abusalomu ūūkashikīla kūngīsha alīhaya, “Kūlaga ūhangame baba ntemi! Hangamaga baba ntemi!”

¹⁷ Ū Abusalomu ūmūja ū Hushai, “Bebe ī yenīyī hū yene ī mbika ya koolecha būtogwa kūlī nwani ng'wiyo? Nibūlī ūtajile nang'hwe ū nwani ng'wiyo?”

¹⁸ Ū Hushai ūnshokeja, “Mm yaya baba, ū nene nakūbiza nang'hwe dūhū ū nsolwa o ng'wa SEEBA; ūyo bansolile a banhū aba, na a Baisilaeli a bose, ū ng'wenūyo hū ūyo nakūdimana nang'hwe ū nene!

¹⁹ Hama nīyo a higūlya ya henaho, nani ūyo shiniigelile kūntūmamīla? Ītaniigeleelilwe kūntūmamīla ū ng'witūnja? Ū nene nakūkūtūmamīla ū bebe gīt'ūmo nantūmamīlaga dūhū ū so.”

²⁰ Hūna ū Abusalomu ūng'wīla ū Ahisofeeli, “Alitwinhage lūūlū a maganiko gako. Twīte kī ī haha?”

²¹ Ū Ahisofeeli ūng'wīla ū Abusalomu, “Bingīlage a bake ba ng'wa so a bado, abo wabalekaga kūlwa kūlang'hana ikūlū; babize bake bako. A henaho a Baisilaeli bakwigwa gīkī ī haha ū bebe wanung'haga inyema lyabūbi ū kūlī so, ūlī kūle nang'hwe gete; a henaho a makono ga banhū abo balī hamò nang'ho gakūguzuhiwa.”

²² Na ng'hana būkoma iheema higūlya ya numba, ū Abusalomu ūlaala na a bake ba ng'wa ise mu būtongi wa Baisilaeli bose.

²³ Alilūūlū ū mu shikū jenījo, ū būganikīji ūlū būfunyiwa na Ahisofeeli boolī gītī bofunyiagwa na munhū obūūjaga kūlī Mulungu. Ū Daūdi nū Abusalomu baalī bawitegelegije gīko ū būganikīji bo ng'wa Ahisofeeli.