2 Sang'weli 10 - Bibilia Ilagano Lya Kale 2015

Hanunu kūbadimya minala banhū ba ng'wa Daūdi

¹ Ū mu shikū jenījo ū ntemi wa Baamoni ūcha, ng'witūnja wakwe Hanunu ūbiza ntemi a ha ng'wanya gwakwe.

² Ū Daūdi wiganika, “Leka nang'wītīle yawiza ū Hanunu ū ng'witūnja o ng'wa Nahashi, gīt'ūmo ise wanītīlaga yawiza ū nene.” Na lūūlū ū Daūdi ūtūma banhū ū kūlī Hanunu, bakangīshe kūlwa kūchīlwa na ise. A banhū ba ng'wa Daūdi aho bashika ū mu sī ya Baamoni,

³ a bana ng'oma ba Baamoni būng'wīla ū Hanunu ū saabo būgonzo, “Ū bebe ūliganika gīkī ū Daūdi alīnkūja so, īkī watūmile banhū kwiza kūkūgīsha kūlwa kūchīlwa? Ūtūmanaga gīkī ū Daūdi wakūtūmīlile a banhū benaba kwiza kūgūdat'ū nzengo bagūlole chiza ūmo gūlī balize bagūdumīle bagūsole?”

⁴ Na lūūlū ū Hanunu ūbadima a banhū ba ng'wa Daūdi, būlī ng'wene ūmooga ī ndezu jakwe ipandī līmò, ī ng'hanjo jabo ūjitandūla a ha gatī gatī, hama ūjichibūla ū kū madako; hūna ūbaleka būja.

⁵ Ū Daūdi aho wawīlwa ū mhayo gwenūyo, ūtūma banhū bakabasūng'wanhe, nguno bakīītīlwa mhayo gwa kūbadimya minala no. Ū ntemi ūbawīla, “Lembeelagi Yeliko ng'wikale kwenūko kūshisha ī ndezu jing'we jikūle, hanuma ya henaho hū mukwiza.”

Baamoni na Baalamu kūpyenwa

⁶ A Baamoni aho badeeba gīkī banung'ha inyema lyabūbi ū kūlī Daūdi, būsola hela būja Alamu būūkagoodisha bashilikale shihūmbī makūmi abīlī ba kūshimīza bo magūlū, kūfuma kū mizengo ya Betilehobu na Zoba. Ntemi wa Maaka, nang'hwe wiza na banhū shihūmbī; na bangī shihūmbī ikūmi na shibīlī biza kūfuma Tobu.

⁷ Ū Daūdi aho wigwa ī yenīyo ūntūma ū Yoabu nī libità lya bashilikale bose abo baalī basanyiwe ū mu mihayo ya būlūgū.

⁸ A Baamoni biza ha mita gwa nzengo gwabo bihela henaho kwamba būlūgū; a bichaabo a Baalamu ba Zoba na Lehobu, na a bana Tobu na Maaka, a bene bikala kū mbūga.

⁹ Ū Yoabu ūbona gīkī wakīngagwa būlūgū, ū kū būtongi nū kū numa; na lūūlū ūbasolanhya a bashilikale abo baalī basanyiwe no no no ū mu Isilaeli, ūbahela kwilwisha na a Baalamu.

¹⁰ Abo bakasaagīīla ūbatūūla ha sīlīlī ya būtongeeji bo ng'wa Abishai ū ng'wanong'wawe; a bene ūbahela kwilwisha na a Baamoni.

¹¹ Ū Yoabu ūhaya, “A Baalamu ūlū būnilebya ī nguzu ū nene, ūkūnangūhīla; alīyo ūlū būkūlebya ū bebe a Baamoni numho ū nene nakūkwangūhīla.

¹² Ipandage chanda tūlwe nyagosha, tūbalwīlīīle a banhū bise nū nzengo go ng'wa Mulungu wise. Ū SEEBA akwīta īyo īlī yawiza ū mu miso gakwe.”

¹³ Hūna ū Yoabu na banhū bakwe ūbasanga a Baalamu kūjūbadumīla; būhūūma nhambo kūmpeela.

¹⁴ A Baamoni aho babona gīkī a Baalamu baapeela, nabo būduta nhambo kūmpeela ū Abishai, būpeelela mu gatī ya nzengo. Hūna ū Yoabu wīnga ū kū būlūgū wa kwilwisha nabo a Baamoni, ūshoka Yelusalemu.

Kūpyenwa kwa Baalamu

¹⁵ A Baalamu aho babona gīkī bapyenwa na a Baisilaeli, bikuminga hangī.

¹⁶ Ū Hadadeza ūtūma Baalamu bangī kūfuma kū nkīlo gwa Mongo; ū Shobaki ūyo walī ntaale wa mabità ga ng'wa Hadadeza hū ūbiza ntongeeji wabo, būja būūkashika Helamu.

¹⁷ Ū Daūdi aho wawīlwa ū mhayo gwenūyo, ūgabilinga pye a mabità ga Baisilaeli ūgūkīla ū mongo gwa Yolodani ūja koi ī Helamu. A Baalamu bihela kwamba būlūgū, kwilwisha nang'hwe ū Daūdi; na ng'hana bandya ū kūlwa nang'hwe.

¹⁸ Alīyo būpeela ū kū būtongi wa Baisilaeli; ū Daūdi ūbūlaga banhū babo magana mpungatī ū mu bendeesha ba magogoteni, na shihūmbī makūmi anè ū mu bashilikale ba kūpeelela ha falasa. Nū Shobaki ū ntaale wa mabità gabo ūntūla, ūchīla kwenūko.

¹⁹ A batemi abo baalī ha sīlīlī ya ng'wa Hadadeza aho babona gīkī bapyenwa na a Baisilaeli, pye a bose būbeeja mhola na a Baisilaeli, būbiza ha sīlīlī ya būsugi wabo. Na lūūlū a Baalamu bogoha ū kūbagunanha hangī a Baamoni.