2 Sang'weli 1 - Bibilia Ilagano Lya Kale 2015

Daūdi kwigwa ng'hūlū ja lūfu lo ng'wa Saulo

¹ Ū Saulo aho alīcha, ū Daūdi akasangwa alī na shikū ibīlī wizile ī Zikilagi, kūfuma ūko akajūūlwa na Baamaleki ūbapyeena.

² Ha lūshikū lwa kadatū lwaho wiza munhū kūfuma ū kū ng'hambī ya ng'wa Saulo; ī shizwalo shakwe shitandagūkile, nū kū ntwe okalaga lūbuubu. Aho washika a halī Daūdi ūgwa ū kū būtongi wakwe ūntugīja mazwi ng'wikūjo.

³ Ū Daūdi ūmūūja, “Wafuma halī?” Nang'hwe ūshosha, “Napūlūgūka kūfuma kū ng'hambī ya Baisilaeli.”

⁴ Ū Daūdi ūbūūja hangī, “Aliniwīlage yaja ko kinehe?” Sūmba ūhaya, “A banhū babūpeela ū būlūgū, babūlagwa bingī no; nīyo nū Saulo wachaaga, nū ng'witūnja wakwe ū Yonasani.”

⁵ Hūna ū Daūdi ūmūja ū nsūmba ūyo akang'wīla ī mihayo yenīyo, “Bebe wadeeba kinehe ī gīkī ū Saulo nū Yonasani bachaaga?”

⁶ Ū nsūmba ng'wenūyo ūhaya, “Naalī nasangwa nalī kū lūgūlū lwa Giliboa, hūna numona ū Saulo wichimaga ichimu lyakwe lyūpulung'hanya; a bashilikale ba magogoteni nabo nūbabona bang'wegeelaga gete.

⁷ Ū mu kwilalangīja kwakwe ūnibona ūnitana; nane niidīka, ‘Nene ūūyū baba.’

⁸ Ūnibūūja, ‘Ūlī nani ū bebe?’ Nūng'wīla, ‘Nalī ūmò wa Baamaleki.’

⁹ Hūna ūniwīla, ‘Egeelaga aha ūnimalīje nache, nguno nalumīlaga kībi no, hama nalīsaatwa kīngī nasho, alīyo hangī nataalī nalīmpanga!’

¹⁰ Ng'hana nūng'wegeela nūmūlaga, nguno naalī nabona gīkī ūmo wagwīlaga ng'wenūmo atūdūla ū kūpīla; hūna nīsola ī ngikili īyo yalī ū kū ntwe gwakwe, nī ndeji īyo yalī ū mu nkono gwakwe, shiish'aha nakwenhela baba būgonzo.”

¹¹ Ū Daūdi na a banhū bakwe būshidima ī shizwalo shabo būshitandūla kūlwa būpīna.

¹² Būlīla ng'hūngū bakūnīlaga ū Saulo nū ng'witūnja wakwe ū Yonasani, nī libità lya ng'wa SEEBA, pyī nī numba ya Isilaeli, nguno ya kūgwishiwa na līlūshū; ū lūshikū lwenūlo būfunga kūshisha mhīndī.

¹³ Ū Daūdi ūnshokeela kūmūja hangī ū nsūmba ūyo akang'wenhela ī mhola jenījo; ūng'wīla, “Bebe ūlī muna halī?” Ūhaya, “Nalī ng'witūnja wa nobeji, muna Amaleki.”

¹⁴ Ū Daūdi ūmūja, “Ni kinehe walī waleka kogoha kūbūūcha nkono gwako kūnyagaja ū ng'witīīlwa magūta o ng'wa SEEBA?”

¹⁵ A henaho ū Daūdi witana ūmò wa banhū bakwe ūng'wīla, “Nsangage hoi ūkamūlage!” Ng'hana ūntūla ū munhū ng'wenūyo ūmūlaga.

¹⁶ Ū Daūdi numho wamalaga kūng'wīla, “A mininga gako gidīkīle ha ntwe gwako bebe ng'wenekīlī. Nguno wikaanīla bebe ng'wenekīlī na nomo gwako ūlīyomba gīkī, ‘Namūlagaga ū ng'witīīlwa maguta o ng'wa SEEBA.’”

Daūdi kūnīla Saulo na Yonasani

¹⁷ Hanuma ya henaho ū Daūdi ūlīla ng'hūngū akūnīlaga ū Saulo nū ng'witūnja wakwe ū Yonasani,

¹⁸ ūlagīla gīkī a banhū ba Yuda balangwe ī mihayo ya ng'hūngū yenīyī, (yandīkilwe mu shitabo sha ng'wa Yashaali). Ūhaya:

¹⁹ “Ee Isilaeli, abo baalī shingilima yako balambalalaga kū magūlya ga sī yako, būchīla kwenūko! Aī mandūgūlū, bagosha ba makaya bagwaga būlī!

²⁰ Yaya gete ū kwīkumūcha ī yenīyī ū mu Gaasi, yaya ū kwīsambaaja nū mu mapanda ga Ashikeloni; bashīke ba Bafilisiti batizūyega, batizūdoosa a bashīke ba banhū abo batasaalilwe benabo.

²¹ “Ee bing'we ngūlū ja Giliboa, ni lūtizagūgwa lūme nūūlū kūtūla mbula a ha bing'we; nūūlū gatizūbiza ho matongo kūlwa matwajo ga shakwinha. Nguno a henaho h'aho lwasosohagījiagwa ū lūmūda lwakwe ū wa nguzu; ū lūmūda lwa ng'wa Saulo, lūtīko kūbilwa maguta hangī!

²² Ū būta bo ng'wa Yonasani walī būtashokaga numa ū kū mininga ga babūlagwa; nūūlū ī līlūshū lya ng'wa Saulo lyalī lītashokaga dalali ū kū mibimba ya bagosha ba nguzu.

²³ Ū Saulo nū Yonasani baalī bawiza no, na ba kūyeja no ū mu būpanga wabo; baalī batalekanaga, nūūlū ī licha lītabalekanije. Baalī bapeeji kūtinda kalalīle ka ng'hoonà; hama baalī na nguzu kūtinda ja shimba.

²⁴ Bing'we bashīke ba Isilaeli, nīlagi ū Saulo; ū munhū ūyo walūmuzwīkaga shizwalo shaza sha būbeeleji; ūyo wayītūūlīlaga myenda ying'we būlenji wa zahabu.

²⁵ Aī mandūgūlū, bagosha ba makaya bagwaaga mu būlūgū! Ū Yonasani walambalalaga kū magūlya ga sī yako ūchīla kwenūko!

²⁶ “Napīnīhalaga no kūlwa nguno yako Yonasani ng'wanong'wise; ū kūlī nene walī munhū wa mpango ntaale. Ū būtogwa wako ū kūlī nene walī būtaale no, walī būtaale kūtinda būtogwa wa bakīma.

²⁷ Aī mandūgūlū, bagosha ba makaya bagwaaga būlī! Shajimīlaga gete ī shilanga sha būlūgū!”