2 Petro 1 - Bibilia Ilagano Lya Kale 2015

Kūgīsha

¹ Nene Simioni Petelo, nsese na ntūng'wa o ng'wa Yesu Kilisito; kū banhū abo kūlwa būtūngīlīja bo ng'wa Mulungu na Mpīja wise Seeba Yesu Kilisito, bamala kwanukūla kūzunya gītī kwise, ūyo gūlī mhayo gwa mpango ntaale.

² Shigongo na mhola shibize hamò ning'we mu wingī bo kūseesekela, kūlwa kūng'witegeleja mu būshikanu bose ū Mulungu nū Yesu Seeba wise.

Kwitanwa na kūsolwa kwa nzunya

³ Ū būdūla bo ng'wa Mulungu, watwinhile pyī īyo ītwigeleelilwe kūbiza nayo kūlwa būpanga na wela, tūng'witegeleje mu būshikanu bose; tūmane gīkī hū wei ū ng'witani wise kwingīla ng'wikūjo na mu wiza bokwe.

⁴ Ū mu mihayo yenīyo watwinhile kwisagīlwa kwawiza na kwa mpango ntaale, gīkī ū muyo, mubize na būsangī ū mu nhūngwa ja wela bo ng'wa Mulungu, mupīle ng'wīnge ū mu būsoso bo mu sī ūbo būlī kūlwa kwikūmva.

⁵ Hūna lūūlū, gemagi no no no kongeja wiza a ha kūzunya kwing'we, a ha wiza ng'ongeje witegeleja.

⁶ A ha witegeleja wilang'hani, a ha wilang'hani wiyūmīlīja, a ha wiyūmīlīja wela,

⁷ a ha wela kwitogwa kwa nyadūgū, a ha kwitogwa kwa nyadūgū, būtogwa.

⁸ Nguno ī mihayo yenīyī ūlū ng'ūbiza nayo mutūbiza binogolelwa; nīyo ūlū ng'wīkwīja mutūgayiwa matwajo ū mu kūng'witegeleja ū Seeba wise Yesu Kilisito.

⁹ Ū munhū ūyo atī nayo ī mihayo yenīyo mboku, atabonaga ī kūle; ū ng'wenūyo wība ī gīkī wamala kwejiwa ī shibi shakwe.

¹⁰ Hūna lūūlū badūgū, īlī yawiza mukomeele no no no ū kūbūguzuhya ū witanwa nū būsolwa wing'we; ūlū ng'ūyīta ī mihayo yenīyī, mutūgwa na hado yaya.

¹¹ Nguno ū mu gīko, mukūlugūlīlwa mita ngalī gwa kwingīla mo ū mu būtemi butashilaga, ū bo ng'wa Seeba na Mpīja wise Yesu Kilisito.

¹² H'ī nguno yene ī ng'hūmbū jane ū nene jilī kūng'wizūkīja gwa ī mihayo yenīyī nūūlū īkī ng'wīmanile, nū būtūngīlīja ūbo mulī nabo ī haha mubūdimile na nguzu.

¹³ Na hangī ū nene ūlū nataalī mo ū ng'wiheema lya mīlī gwenūyū, naliganika īlī chiza ū kūmanūmusatūla kūlwa kūng'wizūkīja.

¹⁴ Nguno ū Seeba wise Yesu Kilisito wanoolekegije hape gīkī lyegeelaga ī likanza lya kūlīzuula ī liheema lyenīlī.

¹⁵ Hūna lūūlū, nalī na ng'hūmbū no no no gīkī, nūūlū nalīnge, ī mihayo yenīyī muyūyizūkwa būlī gwa.

Kūhangwa kwa ng'wa Kilisito n'ikūjo lyakwe

¹⁶ Nguno aho twamulangaga ī mihayo ya būdūla bo ng'wa Seeba wise Yesu Kilisito nī ya kūshoka kwakwe, twalī tūtalondeelaga ngano ja nyasala sala, bise benekīlī gete tūlī bambona bago a magaka gakwe genayo.

¹⁷ Ū wei akanukūla ikūjo na būgūngūhiwa būtaale kūfuma kūlī Mulungu Sīswe, aho ilaka līkang'wizīīla ng'wikūjo no no no; līlīhaya gīkī, “Ūyū ng'wene Ng'wana wane Ntogwa ūyo aniyegije hataale.”

¹⁸ A bise twalī nang'hwe ū mu lūgūlū lwela, tūkaliigwa nī lilaka lyenīlo aho lyenhwa kūfuma ū ng'wigūlū.

¹⁹ Hū kūhaya ū mhayo gwa būhangi ūyo tūlī nago, gūlī gwa ng'hana gete. Hūna lūūlū mukūtūngīlīja no ūlū ng'ūgūdīlīla gītī tala īyo īkwaakaga ng'wipandī lya giiti, kūshisha wangalūke; kūshisha ī sonda ya dilū īng'wakīīle ū mu myoyo ying'we.

²⁰ Gwike gūmanagi tame ū mhayo ūyū; gīkī, pyī ū būhangi ūbo būlī mu shandīkwa būtīko kūshomelejiwa gīt'ūmo munhū atogelilwe wei ng'wenekīlī.

²¹ Nguno ū būhangi būtenhilwe ikanza lyose lyose kūlwa kūlondeela katogelwe ka ng'wa munhū, alīyo būkenhwa na Moyo Ng'wela kūbītīla mu banhū, abo basomboolaga ya kūfuma kūlī Mulungu.