2 Batesalonike 2 - Bibilia Ilagano Lya Kale 2015

Kwiza kwa ngomi ntaale

¹ Hūna lūūlū badūgū, ū mhayo gwa kūshoka kwa ng'wa Seeba wise Yesu Kilisito, na a bise ū kwibilinga kūlī wei, tūlīmulomba

² mutizūlelengetiwa wangū wangū ū mu maganiko ging'we. Na hangī yaya ū kūzwanjiwa nūūlū na moyo nebe. Nūūlū īkabiza mihayo ya mbika kī, nūūlū yūbiza nyalūba īlīhayiwa angū yafumile kū bise, īlīyomba gīkī ū lūshikū lo ng'wa Seeba lwamalile kūshika!

³ Munhū ose ose atizūmulemba nūūlū hado; nguno shiigelile tame wilonge būkenaagūji būtaale, na ngomi ntaale iyooleche ha ng'wape. Ū wei alī ng'wana wa kūyagala,

⁴ ūyo ashilemile būlī shikolo īsho shikitanagwa mulungu, nūūlū īsho shikalamiagwa. Nīyo akwigūngūhya higūlya ya shose shenīsho. Nū mu hekalu ya ng'wa Mulungu akūja akigashe, kūnū akwigīmbaga gīkī ū wei hū Mulungu!

⁵ Ī gīsī mutizūkīlaga gīkī aho naalī hamò ning'we nakamuwīla ī mihayo yenīyo?

⁶ Nī haha mushimanile īsho shihangīgije, kūshisha līshike ī likanza lya kwiyoolecha kwakwe ha ng'wape.

⁷ Gwike ahene nūūlū ī haha ū būgomi būlīho būkūtūmamaga; alīyo mu mbika ya mbisīla, nguno shitaalī shilīho īsho shihangīgije. Ūlū shilīnjiwe,

⁸ akwiyoolecha ha ng'wape ū ngomi ng'wenūyo. Alīyo ū Seeba Yesu akūnkenaagūla bo myūyī ya mu nomo gokwe, anyagaje n'ikūjo lya kūshoka gokwe.

⁹ Ū kwiza kwa ngomi ng'wenūyo kūkwiyoolecha mu būdūla bose bo katūmamīle ka ng'wa Shetani, na mihayo mitaale ya kūkamaaja kūlwa kūlemba lemba;

¹⁰ na mu mbika jose ja mihayo yabūbi, ya kongeja kūbajimīīja a bajimīīji, nguno batatogilwe ū kwīyanukūla ī ng'hana gīkī bapījiwe.

¹¹ Kūlwa nguno yenīyo ū Mulungu akūbatūmīlaga nguzu jabūbi, bayūzunya ya būlomolomo.

¹² Ū mu gīko abo batīzunije ī ng'hana, abo bakayejiagwa na mihayo yabūbi, bakūgwīlwa nsango.

Abo babalīlilwe būpīji

¹³ Alīyo badūgū batogwa ba ng'wa Seeba, a bise shitwigeleelilwe kūnūmba Mulungu gwa gwa gwa kūlwa nguno ying'we, īkī ū Mulungu wamusola kūfuma ha wandījo gīkī mupījiwe mu nzīla ya kwejiwa na Moyo, na kūlwa kwīzunya ī ng'hana.

¹⁴ Akang'witana mu nzīla ya Ng'hūlū Jawiza ījo tūkūjilomeelaga, gīkī ng'wanukūle ikūjo lya ng'wa Seeba wise Yesu Kilisito.

¹⁵ Hūna lūūlū ī haha badūgū, handatīlagi, ng'wīdime ī mihayo īyo ng'wamala kūlangwa mu nzīla ya būlomeeji wise, nūūlū mu nyalūba jise.

¹⁶ Nang'hwe ū Yesu Kilisito, ū Seeba wise ng'wenekīlī nū Mulungu Sīswe ūyo atūtogilwe, ūyo hangī wamala kūtwinha būlūngūjiwa butashilaga, hamò na kwisagīlwa kwawiza kūlwa shigongo,

¹⁷ leki ayīlūngūje ī myoyo ying'we, hangī amuguzuhye mu kalūngalūngīle na mu katūmamīle kose, ako kalī kawiza.