2 Batemi 7 - Bibilia Ilagano Lya Kale 2015

¹ Alīyo ū Elisha ūhaya, “Gūdegelekage lūūlū ū mhayo go ng'wa SEEBA; ū SEEBA alīhaya gīkī, ‘Ī ntondo makanza gītī genaya a ha mita gwa Samalia būkūjinjiwa būsu; ngelekelo īmò gulamu ikūmi na īmò ja feza, na būsīga ngelekelo ibīlī gulamu ikūmi na īmò ja feza.’”

² Ū ntūmami wa ntemi ūyo walī hamò nang'hwe, ūng'wīla ū munhū o ng'wa Mulungu, “Mm bebe, ū mhayo gwenūyū gūdūlīkanile gete nūūlū SEEBA ng'wenekīlī akagalugūla a madilisha ga ng'wigūlū?” Ū Elisha ūnshokeja ūhaya, “Ūkūgūbona na miso gako bebe ng'wenekīlī, gwike ūtūshilya nūūlū hado!”

Ba mbiji kū ng'hambī ya Baalamu

³ Na lūūlū a ha mita gwa kwingīla mu nzengo, baalīho hoi banhū bane basaatile mbiji. A banhū benabo biwīla, “Ī gīsī ū kwikala aha kūshisha tūche, īlīho solobo kī?

⁴ Nguno ūlū tūhaya gīkī, ‘Tūjagi ū mu nzengo,’ īlīmo moi nzala; tūkūja tūkache dūhū. Hama nūūlū twikala aha naheene hū tūkūcha dūhū. Hambū hambū tūjagi ū kū ng'hambī ya Baalamu tūkagwe mu magūlū gabo; ūlū būtūlekeja, numho twapīla, ūlū būtūbūlaga numho hū gwashilaga!”

⁵ Na lūūlū aho kaatūja a ka būjikū, būbūūka bajile ū kū ng'hambī ya Baalamu, aho bashika a ha wandījo wa ng'hambī, batabonile munhū ose ose.

⁶ Gashinaga ū SEEBA walī wabenheleja a Baalamu kwigwa mitindo gītī y'ibità itaale līlī na falasa ningī, hamò na magogoteni ga būlūgū; aho bigwa gīko biwīla, “Bing'we ū ntemi wa Isilaeli wagoodishije batemi ba Bahītī na ba Misili, kwiza kūtūdumīla!”

⁷ Na lūūlū ū mu kabungubungu ng'wenūmo būpeela nhambo, būgaleka a maheema gabo, nī falasa pyī nī nzobe jabo. Būbuluguta ū kwīnga hoi, bīleka ī ng'hambī yabo īlī kili gīt'ūmo yalī, būlī munhū ūmana būpanga bokwe dūhū.

⁸ A basaatu ba mbiji benabo aho bashika a ha wandījo wa ng'hambī, bingīla ng'wiheema līmò lyaho. Būlya, nū kūng'wa būng'wa; hūna būbūūcha feza, zahabu, na shizwalo būūkabisa. Būshoka bingīla ng'wiheema līngī būsola shikolo hangī, nasho būūkashibisa.

⁹ Kwitulwa biwīla, “Bing'we ūmo tūlīītīla ng'wenūmu tūtūtūngīlījaga; ū lwenūlū lūlī lūshikū lwa ng'hūlū jawiza, alīyo hū tūlīīta mu būnugunugu, tūtūbawīlaga a banhū! Ūlū tūlindīīla kūshisha wele tūkūgwīlwa nsango. Tūjagi ī haha yenīyī ū kwikūlū tūkabawīle.”

¹⁰ Na lūūlū būja ng'hana būkabahamukīla a balang'hani ba ha mita gwa nzengo; būbawīla, “Twashika ū kū ng'hambī ya Baalamu, alīyo ndūhū ko munhū nūūlū ūmò, nūūlū kwigwa ilaka lya munhū ose ose ndūhū; twabona dūhū falasa na nzobe jitungilwe, na a maheema gaalekilwe gīko dūhū ūmo galī.”

¹¹ A balang'hani ba ha mita būjikumūcha ī mhola jenījo, jūtwalwa nū kwikūlū.

¹² Ū ntemi ūbūūka ī būjikū yenīyo ūbawīla a batūmami bakwe, “Leka namulanje īyo balītwītīla a Baalamu; badebile gete gīkī ī haha tūtī na shilīwa. Na lūūlū bīngaga a ha ng'hambī būūkibisa mu masaka, kūnū bakwiwīlaga gīkī, ‘Bakwiza dūhū, twize tūbadime balī bapanga, twingīle nū mu nzengo gwabo.’”

¹³ Gwike ūmò wa batūmami ba ntemi ūfunya iganiko alīhaya, “Kinehe ūlū kūsolanhya banhū basole falasa itanò ū mu falasa ījo jasaagile ū mu nzengo? Nguno īyo īlabilongele īkūbiza gītī h'īyo īkūbilongela dūhū na a Baisilaeli abo balī mu nzengo ūmu; tūbatūmagi baje ko bakabone ūmo īlī ī mihayo.”

¹⁴ Na lūūlū būsola magogoteni abīlī na falasa jago; ū ntemi ūbatūma a banhū benabo baje ū kwibità lya Baalamu. Ūbakomeleja a batongeeji ba magogoteni genayo alīhaya, “Jagi mukalole ūmo īlī ī mihayo.”

¹⁵ Būlondeja kūshisha kū mongo gwa Yolodani; pye a hose ū mu nzīla baaja bakūbonaga myenda na shikolo sha kūtūmamīla, īsho bashiponanjaga a Baalamu gīkī babbūūpīlwe bapeele chiza. Na lūūlū abo bakatūng'wa būshoka benha ī mhola ū kūlī ntemi.

Kūsola shikolo mu ng'hambī ya Baalamu

¹⁶ Hūna a banhū būja ū kū ng'hambī ya Baalamu būūkashisola ī shikolo īsho shalī shalekwa. Na ng'hana ī ngele īmò ya būsu īyūjinjiwa gulamu ikūmi n'īmò ja feza, ū būsīga ū wene ngele ibīlī kū gulamu ikūmi n'īmò ja feza, gīt'ūmo SEEBA walī wahayīla.

¹⁷ Ū ntemi ūntūūla ū ntūmami ūyo wikalaga hamò nang'hwe, kūbiza nang'hani wa ha mita; a banhū būmpandagīla ūchīla ha mita, gīt'ūmo munhū o ng'wa Mulungu walī wahayīla ī likanza lyene ū ntemi akiza kū ng'wakwe.

¹⁸ Īkashikīīla gīt'ūmo ū munhū o ng'wa Mulungu walī wang'wīlīla ū ntemi, “Ī ntondo makanza gītī genaya a ha mita gwa Samalia ngelekelo īmò ya būsu īkūjinjiwa gulamu ikūmi n'īmò ja feza, ī ngelekelo ibīlī ja būsīga jikūjinjiwa gulamu ikūmi n'īmò ja feza.”

¹⁹ Ū ntūmami wa ntemi ng'wenūyo akang'wīla ū munhū o ng'wa Mulungu, “Mm bebe, ū mhayo gwenūyū gūdūlīkanile gete nūūlū SEEBA ng'wenekīlī akagalugūla a madilisha ga ng'wigūlū?” Ū munhū o ng'wa Mulungu nang'hwe akanshokeja ūng'wīla, “Ūkūgūbona na miso gaako bebe ng'wenekīlī, gwike ūtūshilya nūūlū hado!”

²⁰ H'ūmo īkang'wilongela, nguno a banhū bakampandagīla ūchīla ha mita.