2 Batemi 3 - Bibilia Ilagano Lya Kale 2015

Yolamu kūbilinga mabità

¹ Ū Yolamu ng'witūnja o ng'wa Ahabu ūbiza ntemi wa Isilaeli mu ng'waka gw'ikūmi n'īnaane go būtemi bo ng'wa Yehoshafati ū ntemi wa Yuda; ūsuga ikanza lya myaka ikūmi n'ībīlī alī mu Samalia.

² Wīta yabūbi ū mu miso ga ng'wa SEEBA; gwike ītī gīt'ūmo baalī bīītīla a ba ise nū nina. Ū wei akalyīnja ī liwe lya ng'wa Baalī, īlo walī walībeeja ū ise kūlwa kwilamilīgīja.

³ Alīyo naheene akikala adimanile nū būhūbi bo ng'wa Yeloboamu ng'witūnja o ng'wa Nebati, ūbo walī wabeenhelaja Baisilaeli kūwīta; atalekanile nabo.

⁴ Ū ntemi Mesha wa Moabu walī nsabi wa ng'holo; na lūūlū walī wahelelwa kūyūtwala būlī ng'waka ū kūlī ntemi wa Isilaeli baana ba ng'holo shihūmbī igana, hamò na booya bo ng'ondi ja ng'holo shihūmbī igana līmò.

⁵ Alīyo ū Ahabu aho waacha, ū ntemi wa Moabu ūlema ū kwikala alī ha sīlīlī ya būsugi wa ntemi wa Isilaeli.

⁶ Ū ng'wikanza lyenīlo ū Yolamu wīnga ī Samalia, ūja akūbayeelelaga pye a Baisilaeli akūbabilingaga.

⁷ Nū kūlī Yehoshafati ū ntemi wa Yuda ūtūma nhūng'wa alīhaya, “Ū ntemi wa Moabu wanigomelile, kinehe, ūdūgije ū kūja hamò nane ū kwilwisha būlūgū nang'hwe ū ntemi wa Moabu?” Ū Yehoshafati ūshosha alīhaya, “Nakūja hamò nang'ho, nguno ū nene nalī gīt'ūmo ūlī ū bebe, a banhū bane balī bako, nī falasa jane jilī jako.”

⁸ Gwike ūbūūja, “Alīyo ūlū tūlīja tūkūbītīla nzīla kī?” Ūshosha, “Tūkūbītīla nzīla ya kwitogolo lya Edomu.”

⁹ Na lūūlū ū ntemi wa Isilaeli nū ntemi wa Yuda būja hamò, būmītīla nū ntemi wa Edomu. Būbīta nzīla ya kwipīndīīla, būmala shikū gītī mpungatī gīko, būbona batī na minzī ga kūng'wa a boi nī ndamhī jabo nī mitugo ījo baalī najo.

¹⁰ Ū ntemi wa Isilaeli ūkumya alīhaya, “Mhayo kī nago ū gwenūyū! Ū SEEBA hū watūkumingile hamò batemi būdatū wise kwiza kūdūtūūla mu makono ga ntemi wa Moabu gete?”

¹¹ Alīyo ū Yehoshafati ūbūūja, “Atīho ng'hangibo ng'wa SEEBA ū kūūnū tūmūje ū SEEBA kūbītīla mulī we?” Ūmò wa bataale ba bashilikale ba Isilaeli ūhaya, “Ū ng'wenūmu alīho Elisha ng'witūnja o ng'wa Shafati, ūyo walī ngunanhi o ng'wa Eliya.”

¹² Ū Yehoshafati ūhaya, “Ū ng'wenūyo alī nago ū mhayo go ng'wa SEEBA.” Na lūūlū a batemi būdatū wabo, ū ntemi wa Isilaeli, nū Yehoshafati nū ntemi wa Edomu, būja ū kūlī Elisha.

Ishosho lya ng'wa Elisha

¹³ Ū Elisha ūnshokeja ū ntemi wa Isilaeli, “A ha gatī yako ū bebe nū nene būlīho būsangī kī? Angū jaga ū kū bahangi ba ng'wa so, na a bahangi ba ng'wa noko.” Alīyo ū ntemi wa Isilaeli ūshosha, “Ītī chene, nguno ū SEEBA hū ng'wene ūyo watwitanile a bise batemi būdatū wise; gashi nīyo kwiza kūtūtūūla dūhū mu nkono gwa ntemi wa Moabu!”

¹⁴ Hūna ū Elisha ūhaya, “Ūmo SEEBA wa būdūla bose alī mpanga, ūyo nalī ntūmami wakwe, ūlū ni ītī kūng'winha ikūjo Yehoshafati ntemi wa Yuda, ū bebe ni natakūlolile, nūūlū kwibona nang'ho dūhū yaya.

¹⁵ Na lūūlū ī haha ī yenīyo yashilaga, nenhelagi ndono.” Ū ntūji wa ndono aho wandya kwītūla, ū nkono go ng'wa SEEBA gūng'wizīīla ū Elisha;

¹⁶ ūhaya, “Ū SEEBA alīhaya gīkī, ‘Ī sī ya ntubīlo yenīyī yokajagi machongo machongo.’”

¹⁷ Nguno ū SEEBA alīhaya gīkī: Mutūbona nyaga nūūlū mbula, alīyo ī sī ya ntubīlo yenīyī īkokala minzī; na lūūlū mukūng'wa a bing'we benekīlī nī mitugo jing'we, nī ndamhī jing'we.

¹⁸ Ū mhayo gwenūyū ū kūlī SEEBA gūlī nogu no; nīyo nū ntemi wa Moabu akūntūūla mu makono ging'we.

¹⁹ Mukwīkenaagūla pyī ī mizengo īyo īpīndīlījiwe ndugu, nī mizengo mitaale ī yose. Mukwībbutagūla pyī ī mitī ī yawiza, nī nzwinzī ja minzī ī jose mukūjikandīīla; na a malaale a gawiza pye a gose mukūgookaja mawe gakenaagūke.”

²⁰ Na ng'hana ha ntondo yaho makanza ga kūfunya shitambò, kwimanīla minzī gaaseesa gizile kūfuma kū magūlya ga Edomu; ī sī yookala minzī pa!

Yolamu kwilwisha būlūgū na Moabu

²¹ A bana Moabu aho bigwa gīkī a batemi benabo bizile kūbadumīla balwe būlūgū nabo, bikobya pye abo baalī badūgije kūbūūcha shilanga, kwandīja bado, pye na a banamhala; būyoolela shilanga būūkihela kū lūbīmbī.

²² Aho bamisha ī dilū būgabona a minzī gakūlabangīlaga kūlwa nguno ya līīmi; a bana Moabu bagaloleelaga a minzī ū kūfuma ū kū ntambūko gwabo galī gaaza gītī mininga.

²³ Būhaya, “Bing'we mininga gete a genaya; tambala machimu a batemi benabo bikenyaga bitandagūla shū. Alilūūlū bana Moabu, tūjagi kūdima nding'wa!”

²⁴ Alīyo a bana Moabu aho bashika ū kū ng'hambī ja Baisilaeli, a Baisilaeli būpuluka kūlwa nabo būlūgū, kūshisha būpeela. A Baisilaeli bingīla ū mu sī ya Moabu būbabūlaga banhū bingī no.

²⁵ Ī mizengo bīkenaagūla, na a malaale a gawiza būgookaja mawe pye a gose gūkenaagūka, nguno būlī munhū waaponejaga mawe moi. Pyī nī nzwinzī ja minzī būjikandīīla, nī mitī yawiza pyī ī yose bībbutagūla. Gūsaaga nzengo gwa Kili-haleseti dūhū ūyo mawe gago gataholomolilwe; naheene nū gwene bigela banhū ba nhaago būyūgūponda mawe.

²⁶ Ū ntemi wa Moabu aho wabona gīkī ū būlūgū wandidohela, ūsola banhū magana mpungatī bamani ba kūlwīla shū, gīkī alītwinye ī libità lya bashilikale, aje akibone nū ntemi wa Edomu; alīyo ūlemeelwa.

²⁷ Hūna ūnsola ng'witūnja wakwe myalwa wa kwandya, ūyo walī wa kwingīla ha būtemi a ha numa yakwe; ū nsūmba ng'wenūyo ūmūlagīla ha ndugu, ūmfunya kūbiza shitambò. A Baisilaeli būbona yabipa no ī mihayo, bīnga būshoka kū sī yabo.