2 Batemi 17 - Bibilia Ilagano Lya Kale 2015

Hoshea ntemi wa Isilaeli wa kūmalīja

¹ Mu ng'waka gw'ikūmi na ībīlī aho Ahazi alī ntemi wa Yuda, Hoshea ng'witūnja o ng'wa Ela ūbiza ntemi wa Isilaeli mu Samalia, ūsuga ikanza lya myaka kenda.

² Nang'hwe akīīta yabūbi ū mu miso ga ng'wa SEEBA; gwike ītī gīt'ūmo baalī bīītīla a batemi ba Isilaeli abo baalī batongi bakwe.

³ Hūna ū mu shikū jenījo ntemi Shalimanesa wa Ashulu wiza kūndumīla ū Hoshea; nguno ū Hoshea walī ha sīlīlī ya būsugi bo ng'wa Shalimanesa, na watobaga goodi būlī ng'waka.

⁴ Alīyo kwimanīla ū ntemi wa Ashulu wabona gīkī ū Hoshea wagalūkile; nguno akatūma banhū kūja kūlī ntemi So wa Misili, na goodi watwalaga būlī ng'waka ū kūlī ntemi wa Ashulu, nī yene ooya ū kūng'winha, ūmo wītīlaga nakale. Na lūūlū ū Shalimanesa ūndima ū Hoshea ūmponya mu jeela.

⁵ Hūna ū ntemi wa Ashulu wīdumīla ī sī ya Isilaeli pyī ī yose; ū nzengo gwa Samalia ūgūpīndīlīja ikanza lya myaka idatū na mabità ga bashilikale.

⁶ Mu ng'waka gwa kenda go ng'wa Hoshea aho alī ntemi, ū ntemi wa Ashulu ūgūdima ū nzengo gwa Samalia, ūbasaamīja Ashulu a Baisilaeli, ūūkabatūūla Hala na Gozani bbihī na mongo gwa Haboli, bangī mu mizengo ya kū sī ya Bamede.

Isilaeli kūsaamiwa nguno ya būhūbi

⁷ Ī yose yenīyī īkabilongela a Baisilaeli kūlwa nguno ya būhūbi wabo kūlī SEEBA Mulungu wabo, ūyo walī wabafunya mu sī ya Misili, ūbīnja ha sīlīlī ya būsugi bo ng'wa Falao ū ntemi wa Misili; bandya kūlamya bamulungu bangī,

⁸ na kūlondeela nhūngwa ja mahanga ayo SEEBA walī wagapeeja gīkī gabīngīle, na kūshimīzīla mu shīmīle īsho batemi ba Isilaeli bakashingīja ū mu sī.

⁹ A Baisilaeli būyūbeeja mu mbisīla mihayo yabūbi īyo yalī ītanyejaga ū SEEBA Mulungu wabo. Bizengela mapandī ga higūlya hose hose ū mu mizengo yabo, ībize īpīndīlījiwe ndugu nūūlū yaya; pye a hose, nose būyūzenga na kwigūlya ya numba ndīhu ja balang'hani.

¹⁰ Būtūūla mawe ga kūlamiwa, na ng'hīngī ja Maashela hose pye ū kwigūlya ya ngūlū, nū mu mbeho ja mitī ya madūūtū manīlīzu.

¹¹ Būyūzuukīja būbbani būlī heene a h'ipandī lya higūlya, gīt'ūmo gīītīlaga a mahanga ayo SEEBA walī wagapeeja gabīngīle a boi. Ī mihayo īyo bīītaga yalī yabūbi no, ya kūmpelanya ū SEEBA.

¹² Būyūlamya shiikolile nūūlū īkī ū SEEBA walī wabawīla, “A bing'we yaya ū kwīta ī yenīyī.”

¹³ Ū SEEBA wabahūgūlaga būlī makanza a Baisilaeli na a banhū ba Yuda mu nzīla ya bahangi bakwe na baboni abo wabatūmīlaga; wabawīlaga, “Galūkagi mujileke ī nzīla jiing'we ī jabūbi; shimīzīlagi mu kahelele na malange gane, kūlenganīla nī shilagīlo ī shose īsho naabalagīla bakūlūgenji bing'we kūshidima, nī mihayo īyo nang'wenhela mu nzīla ya batūmami bane a bahangi.”

¹⁴ Alīyo batazunije ū kwigwa; nīyo baalī na mitwe midiimu gīt'ūmo baalī a bakūlūgenji babo, abo baalī batansanije ū SEEBA Mulungu wabo.

¹⁵ Būgalema a malange gakwe, nī lilagane īlo walī walagana na bakūlūgenji babo, pyī nū ū būhūgūji ūbo walī wabinha. Būbiza balondeeji ba shiikolile īsho shilī shikolo shitī na ngofyoolo, nabo būbiza batī na ngofyoolo. Būyūlondeela nhūngwa ja mahanga ayo gaalī gabapīndīlīgije, nūūlū īkī ū SEEBA walī wabakomeleja ūbawīla, “Yaya a bing'we ū kwīta ūmo bakīītīlaga a benabo.” Īyo walī wabalemeja ū SEEBA kwīyīta hū būbiza bīīti bayo.

¹⁶ Būshīība pye gete ī shilagīlo sha ng'wa SEEBA Mulungu wabo, bibeegeja shiikolile shibīlī sha kūsula, sha kūbiza gītī ndama; na ng'hīngī ya ng'wa Ashela. Būyūgiinamīla mabità ga sonda ja ng'wigūlū, na lī Baalī būyūlīlamya.

¹⁷ Kūshisha būyūbapemba mu moto na baana babo bagosha na bakīma, kūlwa kūbafunya shitambò. Būbiza bīīti ba mihayo ya būlogi, na kūshimīzīla mu nhūngwa ja būchūja; bijinja boi benekīlī mu kwīta mihayo yabūbi ū miso ga ng'wa SEEBA; būnsaayīcha no.

¹⁸ Kūlwa yose yenīyo ū SEEBA ūbapelanīla no a Baisilaeli, kūshisha ūbaponya bīnga ū kū būtongi bokwe. Lūlekeelwa lūganda lwa ng'wa Yuda dūhū.

¹⁹ Alīyo na a banhū ba lūganda lwa ng'wa Yuda batashidiimile ī shilagīlo sha ng'wa SEEBA Mulungu wabo. Nabo būyūshimīzīla ū mu shītīle īsho Baisilaeli bakashingīja ū mu sī.

²⁰ Na lūūlū ū SEEBA ūbalema a banhū ba shibyalīlwe sha ng'wa Isilaeli a bose; ūbalūhya na kūbatūūla mu makono ga biboneeji, būyūbasoja ī shikolo; kūshisha lyūshika ikanza lya kūbaponya gete na kwīnga ū kū būtongi wakwe.

²¹ Ū SEEBA aho wabalekanya a Baisilaeli, ūbīnja ū mu numba ya ng'wa Daūdi, būntūūla Yeloboamu ng'witūnja o ng'wa Nebati kūbiza ntemi wabo. Ū Yeloboamu ūbahūmbūla a Baisilaeli, ūbīnja ū mu nzīla ya kūnondeela SEEBA; ūbenheleja kūgwa mu būhūbi būtaale no.

²² A Baisilaeli būdimana nabo ū būhūbi ūbo akabalanga kwīta ū Yeloboamu; batagalūkile gīkī babūleke.

²³ Nose ū SEEBA ūbīnja ū kū būtongi bokwe, gīt'ūmo walī wabahūgūlīla mu nzīla ya batūmami bakwe a bahangi a bose. Na lūūlū a Baisilaeli būbiza bīnjiwa ū mu sī yabo būsaamījiwa Ashulu, h'ūko balī nī lelo yīnīyī.

Samalia kwenhelwa banhū bangī

²⁴ Ū ntemi wa Ashulu wenha banhū bangī kūfuma sī ja Kusa, Ava, Hamasi, Shefavaimu; wiza ūbatūūla ū mu mizengo ya Samalia a ha ng'wanya gwa Baisilaeli. Bīdima ī Samalia yūbiza yabo, būzenga ū mu mizengo yamo.

²⁵ Aho balandya ū kwikala moi, baalī batī na logohano ū kūlī SEEBA, na lūūlū ūbatūmīla shimba jūyūbabūlaga bamò babo.

²⁶ Ū ntemi wa Ashulu ūwīlwa, “A banhū abo wabasaamije ūbatwala kū mizengo ya Samalia batagamanile a majīle ga ng'wa mulungu wa sī yenīyo. Na lūūlū wabatūmīlile shimba jilīyūbabūlaga, nguno batagamanile gete a majīle gakwe.”

²⁷ Hūna ū ntemi wa Ashulu ūlagīja ūhaya, “Twalagi koi ūmò wa bagabīji abo ng'wabasaamije kūfuma ī Samalia, aje akikale kwenūko, ayūbalanga a banhū a majīle ga ng'wa mulungu wa kwenūko.”

²⁸ Na ng'hana ūmò wa bagabīji abo baalī bading'wa būsaamiwa kūfuma ī Samalia, wiza kwikala Beeseli; ūbalanga ī mbika ya koolecha logohano ū kūlī SEEBA.

Kūnamya SEEBA hamò na shiikolile

²⁹ Alīyo nahene būl'ihanga lya banhū ū kū mizengo īyo baalī batūūlwa kwikala, baalī bibeegeja bamulungu; a bamulungu benabo būbatūūla ū mu maduku ayo baalī bagabeeja a Baisilseli ū mu mapandī ga higūlya.

³⁰ A bana Babuloni būbeeja mulungu wabo Sukoti-benoti, a bana Kuti būbeeja Neliga, a banhū ba Hamasi būbeeja Ashima.

³¹ A bana Ava būbeeja Nibuhazi na Talitaki, a bana Shefavaimu būyūbapemba mu moto a baana babo balībafunīja shitambò bamulungu babo ba Adulameleki na Anameleki, a bamulungu ba mu sī ya Shefavaimu.

³² A hene banamyaga ū SEEBA, alīyo hangī bisolelaga na banhū ba būlī mbika kūlwa kūbeeja myanya ya būgabīji ū mu maduku ayo gaalī kū mapandī ga higūlya.

³³ Ū SEEBA banamyaga, alīyo na a bamulungu babo babalamyaga kūlenganīla nī shīmīle sha kū mahanga ga kūko baalī bīnjiwa.

³⁴ Kūshisha nī lelo īyī bataalī bashidaamīīlile ī shītīle shabo ī sha kale. Balemile ū kūnamya ū SEEBA, nūūlū ū kūdimana na a malange gakwe na a katongeelele kakwe, pyī nī shilagīlo shakwe na a kahelele ako walī wabinha a banhū ba shibyalīlwe sha ng'wa Yakobo, ūyo akang'winha lina lya Isilaeli.

³⁵ Ū SEEBA aho alībeeja ilagane nabo a Baisilaeli walī wabakomeleja ūbawīla, “A bing'we yaya ū kūlamya bamulungu bangī, nūūlū kwinama kū būtongi wabo, yaya kūbatūmamīla, nūūlū kūbafunīja shitambò.

³⁶ Alīyo ū SEEBA ūyo akagoloola nkono ūng'wīnja mu sī ya Misili na būdūla būtaale, ū ng'wenūyo h'ūyo shiigelelile munamye na kūntūmamīla, nū kūmfunīja ī shitambò.

³⁷ Ilang'hanagi gete, būlī makanza mushimīzīle ū mihayo īyo wang'wandīkīla, ū mu malange gakwe na a katongeelele kakwe, nī shilagīlo shakwe, na a kahelele kakwe. Yaya ū kūlamya bamulungu bangī.

³⁸ Mutizūlyība ī lilagane īlo nabeegije ning'hwe, mutizūgema kūlamya bamulungu bangī.

³⁹ Alīyo a bing'we shing'wigelelile kūnamya SEEBA Mulungu wing'we dūhū; ū ng'wenūyo hū ng'wene akūmupīja ū mu makono ga banishi bing'we.”

⁴⁰ Alīyo naheene batigwiile nūūlū hado, bakikala mo dūhū ū mu nhūngwa jabo ja shikū jose.

⁴¹ Na lūūlū a banhū benaba nūūlū īkī banamyaga ū SEEBA, alīyo nī shiikolile shabo bashilamyaga. Kūshisha lelo īy'a baana babo na a bizūkūlū babo bataalī bakwītaga gīt'ūmo bīītīlaga a bakūlūgenji babo.