2 Batemi 12 - Bibilia Ilagano Lya Kale 2015

Yoashi kwībeegeleja hekalu

¹ Mu ng'waka gwa mpungtī go būtemi bo ng'wa Yehu, Yoashi wandya kūbiza ntemi, ūsuga ikanza lya myaka makūmi anè alī mu Yelusalemu; ū nina witanagwa Zibia, muna Beeli-sheba.

² Ū Yoashi walī ntūngīlīja ū miso ga ng'wa SEEBA ū mu shikū jose ījo ngabīji Yehoyada wanganikīlaga.

³ Gwike a mapandī ga higūlya gatīnjiwe; a banhū baalī bataalī būja koi kūfunya shitambò na kūzuukīja būbbani.

⁴ Hūna ū Yoashi ūbawīla a bagabīji, “Andyagi kūyūjikuminga pyī ī hela ījo jikwenhagwa mu hekalu ya ng'wa SEEBA, jafunyiwa kūbiza shakwinha sheela, ījo banhū bakafunyaga ng'wikanza lya kūbalwa, nī jijo banhū bakafunyaga kūlwa kwisagīja kwa kūlahīla kwabo, nī jijo bakenhaga kūlwa wiyaabī wabo, biza bafunya mu hekalu ya ng'wa SEEBA.

⁵ Ī hela jenījo būlī ngabīji akūyūjanukūla kūfuma ū kūlī nang'hani wa sabo ūyo biideebile, jagūtūmama ū nīmo gwa kwībeegeleja ī hekalu ūmo ībiipile.”

⁶ Alīyo nose ū ntemi Yoashi ūshisha myaka makūmi abīlī n'idatū alīho a ha būtemi, ī hekalu ndūhū nūūlū kūbeegelejiwa.

⁷ Na lūūlū ū ntemi Yoashi ūng'witana ū ngabīji Yehoyada, na a bagabīji a bangī; ūbabūūja, “Nibūlī mutībeejaga ī hekalu ū mu mapandī ayo ībiipile? Hambū hambū oyagi lūūlū ū kūsola ī hela ū kūfuma ū kūbalang'hani ba sabo abo ng'wideebile nabo, jilekagi jigūtūmame ū nīmo gwa kwībeegeleja ī hekalu.”

⁸ A bagabīji būzunya gīkī booyaga ū kūjisola ī hela jenījo ū kūfuma ū kū banhū, na gīkī ū nīmo gwa kwībeegeleja ī hekalu batūgwīta boi hangī.

⁹ Ū ngabīji Yehoyada ūpandīka isandīko lya mbawa, ūlīchibūla ipūndū, hūna ūlītūūla ū mu hekalu, bbihī na ng'walīlo; kū lwandī lwa būlyo ūlū ūlingīla ū mu hekalu. A bagabīji abo balang'hana a ha nyango būyūjitūūla ng'wenūmo pyī ī hela ījo banhū bajeenhaga ū mu hekalu ya ng'wa SEEBA.

¹⁰ Būl'ikanza ūlū babona gīkī jakwīla ī hela ū ng'wisandīko, ū ng'wandīki wa ng'wikūlū nū ngabīji ntaale bizaga bajibala ī hela ījo jenhagwa ū mu hekalu ya ng'wa SEEBA, hūna bajitūūla mu mifuko.

¹¹ Ūlū jamanīka ī lisaabu lyaajo, babinhaga a banhū abo baalī batūūlwa kūlwa nguno ya kūgwīmīīla ū nīmo gwa kwībeegeleja ī hekalu ya ng'wa SEEBA. A banhū benabo bajigabanhyaga mu magelè magelè; jimò babalīpaga baselemala na a banhū abo batūmamaga a ha hekalu ya ng'wa SEEBA.

¹² Jingī babalīpaga bazengi na batūji ba mawe, na kūgūla mbawa na mawe ayo gaalī gabeejiwe ng'hana ng'hana kūlwa kwībeegeleja ī hekalu ya ng'wa SEEBA, na kūbeeja milīmo yangī īyo yalī yigeleelile kūbeejiwa ū mu nīmo gwa hekalu.

¹³ Ī hela jenījo jalī jitatūmamīlagwa kūbeeja shitūmamīlo shose shose sha mu hekalu; gītī masahani ga feza, majimījo ga tala, mabbakuli ga kūseeseebelela, nūūlū mhembe, nūūlū shikolo sha zahabu shingī nasho sha kūtūmamīlwa mu hekalu yang'wa SEEBA.

¹⁴ A batūmami abo binhagwa ī hela jenījo bajitūmamīlaga mu nīmo gwa kwībeegeleja ī hekalu.

¹⁵ A binhi bajo ī hela jenījo baalī batī na nguno ya kwikala bakūbabūgīlījaga abo babinhaga gīkī babalīpe a batūmami, nguno bajitūmamīlaga mu būtūngīlīja no no no.

¹⁶ Alīyo ī hela ījo jaafunyiagwa kūlwa nguno ya shakwinha sha kwihīga, na shakwinha kūlwa nguno ya būhūbi, jalī jitenhagwa ū mu hekalu ya ng'wa SEEBA, ī jene jalī ja bagabīji.

Yoashi kūng'winha sabo Hazaeli

¹⁷ Ū mu shikū jenījo ū Hazaeli ntemi wa Alamu ūja Gaasi, kwilwisha būlūgū nago ū nzengo gwenūyo; ūgūdima; hanuma ya henaho wīgalūkīla nī Yelusalemu.

¹⁸ Alīyo ū Yoashi ū ntemi wa Yuda ūshisola pyī ī shikolo īsho batemi ba Yuda a bataale bakwe, ba Yehoshafati, Yeholamu, Ahazia baalī bashitūūla kūlī SEEBA; nī shisho wei ng'wenekīlī walī washitūūla kūlī SEEBA, nī zahabu ī jose ījo bakapandīka kūfuma mu chumba sha mu hekalu ya ng'wa SEEBA ī sha kūlang'hanīla sabo, nī sha mu numba y'ikūlū; ī shose shenīsho ūntwalīla ū Hazaeli ntemi wa Alamu, hūna wīyīngīla ī Yelusalemu.

¹⁹ Mihayo yīngī ī ya mu shikū ja būtemi bo ng'wa Yoashi, nī yose īyo wīyīta yandīkilwe mu shitabo sha ng'hūlū ja batemi ba Yuda.

²⁰ Batūmami ba mu selekali yakwe būnīīla gwīnda aho atamanile, būmūlagīla Milo alī mu lūgendo lwa kūja Sila.

²¹ A batūmami ba mu būsugi bokwe abo bakamūlaga baalī ba Yozabadi ng'witūnja o ng'wa Shimeati, na Yehozabadi ng'witūnja o ng'wa Shoa. Aho waacha ūjīkwa hamò na bakūlūgenji bakwe mu nzengo go ng'wa Daūdi. Amazia ng'witūnja wakwe wingīla a ha ng'wanya gwakwe, ūbiza ntemi.