2 Batemi 11 - Bibilia Ilagano Lya Kale 2015

Asalia kūbiza nsugi wa Yuda

¹ Ū Asalia ū nina o ng'wa Ahazia aho wabona gīkī ū ng'witūnja wakwe waacha, nang'hwe wandya kūbakenaagūla pye a banhū ba shibyalīlwe sha ntemi.

² Alīyo walīho nshīke wa ntemi Yolamu, ūyo wal'ilūmbūye wa Ahazia, witanagwa Yehosheba; ū nshīke ng'wenūyo ūnsola nīgīnī ūmò ng'witūnja o ng'wa Ahazia, lina lyakwe Yoashi, ūng'wīnja ū mu baana ba ntemi abo baalī bahelilwe kūbūlagwa, ūntolocha ūūkamisa hamò na neji wakwe mu chumba sha kūlaala, ūmo walī atadūgije kūmona ū Asalia; ūpīla ū kūbūlagwa.

³ Hanuma ya henaho ūūkabiswa mu hekalu hamò nū neji wakwe, bikala ng'wenūmo ikanza lya myaka ītandatū; ī likanza ī lyose īlo Asalia walī ayīdiimile ī sī.

Yehoyada kūntūūla Yoashi ha būtemi

⁴ Ū mu ng'waka gwa mpungatī, ū ngabīji Yehoyada ūbalagīlīja a bataale ba mabità ga bashilikale igana igana, na a Bakalite, na a balang'hani ba h'ikūlū. Biza ū kū hekalu ya ng'wa SEEBA ūko walī ū wei. Ūlomana na kwiyigwa nabo; hanuma ūbilahīja ū mu hekalu ya ng'wa SEEBA ng'wenūmo; hūna ūboolekeja ū ng'witūnja wa ntemi.

⁵ Ūbalagīja, “Na lūūlū yīyī īyo shiigelile ngwīyīte ū mu magelè ging'we būdatū wago; ī ligelè īlo līkabizaga na lūdīīma ha lūshikū lwa Sabato līkūgabanhīka mu magelè adatū, igelè līmò bakūlang'hana a h'ikūlū,

⁶ igelè līngī būlang'hana ha mita gwa Sūlū, hanuma ī ligelè ī lya kadatū būbiza ū kū mita gwa kū numa ya balang'hani ba h'ikūlū; abo bakibalīīlagwa kwīlang'hana ī hekalu.

⁷ A magelè ayo abīlī ayo gakifuulaga ha lūshikū lwa Sabato, a gose gakūbiza na nīmo gwa kūlang'hana ha hekalū kūlwa nguno ya ntemi.

⁸ Shiigelile kwīmīīla hīgīyī, ng'wikale miso munang'hanile ū ntemi; būlī ng'wene abize na shilanga shakwe mu nkono. Ose ose ūyo wenha yakwe ya nkūla abūlagwe haho na haho; shiigelile ng'wikale bbihī nū ntemi būlī kwene ūko alīja.”

⁹ A bataale ba mabità ga bashilikale igana igana bīīta ng'hana gīt'ūmo bakalagīīlīlwa nū ngabīji Yehoyada. Būlī ng'wene ūbasola a banhū bakwe, abo bandyaga lūdīīma a ha lūshikū lwa Sabato na a babo baamalaga ū lūdīīma, a bose biza ū kūlī ngabīji Yehoyada.

¹⁰ Hūna ū ngabīji Yehoyada ūbinha a machimu nī mūda; ī shilanga shenīsho shiikalaga mu hekalu ya ng'wa SEEBA, shalī sha ntemi Daūdi.

¹¹ Hanuma a balang'hani benabo bīmīīla hīgīyī ū mu hekalu, būmpīndya ha gatī ū ntemi kūnang'hana; būlī ng'wene walī na shilanga shakwe mu nkono, baalī bbihī nū ng'walīlo, na bangī bihela kwandīja lwandī lwa dakama ya hekalu kūshisha sukuma.

¹² Na lūūlū ū Yehoyada ūmfunya ū ng'witūnja wa ntemi, wiza ūntūūlīla ū kū ntwe ī ngikili ya nyatemi; hūna ūng'winha shitabo sh'ilagane, ha numa ūhamuka n'ilaka lya higūlya alībawīla gīkī, hū ng'wene ū ntemi. Hūna ūng'witīīla maguta; a banhū būtūla ng'hūbi kūnū bakūlījaga mhūndū bigwaga ū kūyega; balīhaya, “Kūlaga ūhangame ntemi.”

Kūbūlagwa kwa ng'wa Asalia

¹³ Ū Asalia aho wigwa ī yoge ya kūfuma ū kū balang'hani na a banhū, ūja ū kū hekalu ya ng'wa SEEBA ūko baalī a banhū.

¹⁴ Kūlola ū mu hekalu ūmona ū ntemi wīmīīlaga bbihī na ng'hīngī gīt'ūmo shalī ī shīmīle shaho na kale. A basugi ba sī na a bafuuji ba mhembe baalī bihela haho nang'hw'ū ntemi; pye a banhū ba mu sī baalī bayega no, bakūlījaga mbiilūlū dūhū. Ī likanza lyenīlo ū Asalia ūtandūla shizwalo shakwe, ūyoganya akūhayaga, “Wijomboki! Ū wenūbū wijomboki!”

¹⁵ Hūna ū Yehoyada ūbalagīja abo baalī na lūdīīma lwa kūlang'hana, a bataale ba mabità ga bashilikale igana igana; ūbawīla, “Ng'wīnjagi hoi mumfunye hanze, ose ose ūyo alihambe kūnkūbīja mūlagagi.” Ū ngabīji ongeja kūhaya, “Yaya ū kūbūlagīlwa mu hekalu ya ng'wa SEEBA.”

¹⁶ Na lūūlū būndima būmfunya hanze, aho bashika h'ipandī īlo falasa jikingīlīlaga mu gwalugwa ya h'ikūlū, būmūlaga.

Ntemi kwigasha h'isumbī lya būtemi

¹⁷ Hūna ū Yehoyada ūbeeja ilagane a ha gatī ya ng'wa SEEBA nū ntemi hamò na a banhū, gīkī bakūbiza banhū ba ng'wa SEEBA. Ūbeeja n'ilagane a ha gatī ya ntemi na a banhū.

¹⁸ Hanuma ya henaho pye a banhū ba sī yenīyo būja ū kū hekalu ya ng'wa Baalī būūkīkambagūla. Ī myalīlo bīsagambūla nī shiikolile shaho būshibelagūla. Walīho ngabījibo ng'wa Baalī witanagwa Matani, būmūlaga; būmūlagīla ū kū būtongi wa myalīlo yenīyo. Hūna ū ngabīji ū Yehoyada ūtūūla balang'hani ba kwīlang'hana ī hekalu ya ng'wa SEEBA.

¹⁹ Ūbasola a bataale ba mabità ga bashilikale igana igana, na a Bakalite, na balang'hani, na a banhū bose a ba sī yenīyo būkūūbīja. Pye a bose mu būsangī būmò būng'wīnja ū ntemi ū mu hekalu ya ng'wa SEEBA, būntwala mu numba y'ikūlū; būkingīlīla kū mita gwa balang'hani. Ī likanza lyenīlo ū ntemi hū ūligasīja ī lisumba lya būtemi.

²⁰ Na lūūlū pye a banhū ba sī yenīyo būyega no; nīyo ū Asalia aho wabūlagwa bo līlūshū bbihī nī numba y'ikūlū, ū nzengo gūkayega no.

²¹ Ū Yoashi aho alandya kūtema walī na myaka mpungatī.