2 Batemi 1 - Bibilia Ilagano Lya Kale 2015

Ahazia kūtūlwa na SEEBA

¹ Aho waacha ū Ahabu, ī sī ya Moabu yūlema ū kūbiza ha sīlīlī ya būsugi wa Baisilaeli.

² Ū mu shikū jenījo ū Ahazia akagwa kūfuma kwigūlya ya būkangala bo kaano ya chumba sha numba yakwe, ūlabūka. Hūna ūlagīja banhū ūbawīla, “Jagi mukanibūgīje ū kūlī Belizebuli, mulungu wa Ekuloni ūlū nakūpīla ū kūfuma ū būlabūki wenūbū nūūlū kinehe.”

³ Alīyo malaika o ng'wa SEEBA ūng'wīla ū Eliya ū muna Tishibe, “Jaga ūkamanhye na banhū batūmagwa na ntemi wa Samalia; ūkababūje gīkī, ‘Ū Mulungu atīmo ū mu Isilaeli, h'ī nguno yene mulīja kūbūūja kūlī Belizebuli, mulungu wa Ekuloni?’

⁴ Na lūūlū ū SEEBA alīhaya gīkī, ‘Ūtūbūūka a ha būlīīlī ūbo ūbūlalīlile, ūkūcha gete.’” Ū Eliya wīta ūmo akawīlīlwa.

⁵ Abo baalī baatūng'wa būshoka; aho bashika ūbabūūja ū ntemi, “Ni kinehe ng'washoka?”

⁶ Nabo būshosha balīhaya, “Twamanhya na munhū nebe ūtūwīla, ‘Shokagi ū kūlī ntemi ūyo wamutūmaga; mukang'wīle, Ū SEEBA alīhaya gīkī: Ū Mulungu atīmo ū mu Isilaeli, h'ī nguno yene watūmaga banhū kūja kūbūūja kūlī Belizebuli, mulungu wa Ekuloni? Na lūūlū ūtūbūūka a ha būlīīlī ūbo ūbūlalīlile, ūkūcha gete!’”

⁷ Ū ntemi ūbabūūja, “Ū munhū ūyo ng'walī ng'wamanhya nang'hwe ng'wenūyo, ūmuwīla ī mihayo yenīyī walī kinehe?”

⁸ Būng'wīla, “Walī azwalile shizwalo sha booya, na ngwasho gwa ndīlī ū mu nkīmbīlī gwakwe.” Ū ntemi ūhaya, “Ū ng'wenūyo Eliya muna Tishibe.”

Ahazia kūkooba kūndima Eliya

⁹ Na lūūlū ū ntemi ūtūma ū kūlī Eliya ntaale wa bashilikale makūmi atanò, hamò na banhū bakwe makūmi atanò. Ū ntaale wa bashilikale ng'wenūyo ūlinha ūko walī ū Eliya, walī iigashije higūlya ya kalūgūlū; hūna ūng'wīla, “Munhū o ng'wa Mulungu, ū ntemi alīlagīja gīkī, ‘Ikaga!’”

¹⁰ Ū Eliya ūnshokeja ū ntaale wa bashilikale ng'wenūyo ūhaya, “Ūlū nalī munhū o ng'wa Mulungu, ni gwikage moto kūfuma ng'wigūlū gūkūbūlage ū bebe hamò na a banhū bako abo makūmi atanò benabo!” Ng'hana gwika moto kūfuma ng'wigūlū gūmūlaga ū ntaale wa bashilikale hamò na a banhū bakwe abo makūmi atanò.

¹¹ Ū ntemi ūntūmīla ū Eliya ntaale ūngī wa bashilikale makūmi atanò, na banhū bakwe makūmi atanò. Ū ntaale wa bashilikale ng'wenūyo ūshikīla kūng'wīla, “Bebe munhū o ng'wa Mulungu, ū ntemi alīlagīja gīkī, ‘Ikaga wangū ī haha yenīyī!’”

¹² Ū Eliya ūshosha ūhaya, “Ūlū nalī munhū o ng'wa Mulungu, ni gwikage moto kūfuma ng'wigūlū gūkūbūlage ū bebe hamò na a banhū bako abo makūmi atanò benabo!” Ng'hana gwika moto kūfuma ng'wigūlū gūmūlaga ū ntaale wa bashilikale hamò na a banhū bakwe abo makūmi atanò.

¹³ Ū ntemi ūtūma lwa kadatū, nang'hwe ntaale wa bashilikale makūmi atanò, na banhū bakwe makūmi atanò. Lelo ū ntaale wa bashilikale ng'wenūyo ūlinha ūko walī ū Eliya; ūshika ūgwa ū kū būtongi wakwe ūndaayīīla alīhaya, “Munhū o ng'wa Mulungu, nalīkwikūmbīlīja ūbūsaatwe ū būpanga wane nū būpanga wa batūmami bako makūmi atanò aba!

¹⁴ Moto kūfuma ng'wigūlū gwashisha ng'hangal'ibīlī gūliika gwabayagaja a bataale ba bashilikale a babīlī abo na a banhū babo. Ī haha nalīkwikūmbīlīja ūnisaatwe ū būpanga wane!”

¹⁵ Hūna ū malaika o ng'wa SEEBA ūng'wīla ū Eliya, “Ikaga ūje hamò nang'hwe, yaya ū kūng'ogoha.” Ūbūūka ho ng'hana ū Eliya, wika ūja nang'hwe ū kūlī ntemi.

¹⁶ Ūūkang'wīla ū ntemi, “Ū SEEBA alīhaya gīkī, ‘Ū Mulungu atīmo ū mu Isilaeli, h'ī nguno yene watūmaga banhū kūja kūbūūja kūlī Belizebuli, mulungu wa Ekuloni? Īkī wītaga mhayo gūlī gīko ūtūbūūka a ha būlīīlī ūbo ūbūlalīlile, ūkūcha gete!’”

Yolamu ntemi wa Isilaeli

¹⁷ Ū Ahazia ūcha ng'hana, kūlenganīlīa nū mhayo go ng'wa SEEBA ūyo akagūhaya Eliya. Na lūūlū īkī ū wei walī atī na ng'witūnja, mu ng'waka gwa kabīlī go ng'wa Yehoshafati ntemi wa Yuda, nzunaye Yolamu akabiza ntemi a ha ng'wanya gwakwe.

¹⁸ Mihayo yīngī ī ya mu shikū ja būtemi bo ng'wa Ahazia, nī yose īyo wīta yandīkilwe mu shitabo sha ng'hūlū ja batemi ba Isilaeli.