2 Bakolinto 8 - Bibilia Ilagano Lya Kale 2015

Kafunīje ka bana Makedonia

¹ Ali lūūlū bang'wise, leki tūmuwīle ī ya shigongo sha ng'wa Mulungu, īsho binhwa ba mu kanisa ja Makedonia.

² Nūūlū īkī baalī mu būgeng'wa wabūbi, nguno ya būluhi kūlwa būhabī būtaale, alīyo nahene ū būyegi wabo waseesekelaga kūlwa wiza ng'holò wabo.

³ Nguno nalībakaanīla gīkī bakīīta kūlwa būtogwa wabo benekīlī; gīt'ūmo boolī ū būdūla wabo, na hangī nīyo na kūkīla ho a ha būdūla wabo.

⁴ Būtūlomba mu kūtwikūmbīlīja no no no gīkī nabo basangīle ū mu būfunya, nū mu nīmo gwa kūbagunanha a beela.

⁵ Hama nīyo ū kwifunya kwabo kwalī kūtī gīt'ūmo twiganikīlaga, alīyo baalī bifunya kūlī Seeba tame, hūna nū kū bise bifunya kūlwa nguno ya būtogwa bo ng'wa Mulungu.

⁶ Ali lūūlū, īkī ū Tito wagwandya kale ū nīmo gwa shigongo shenīshi ū kū bing'we, tūkang'wikūmbīlīja agūshikīlīje nū kūgūshikīlīja.

⁷ Nose īkī mulī basabi mu yose, gītī mu kūzunya, mu kalūngalūngīle, mu witegeleja, mu būkomeezu wa mbika jose, nū mu kūtūtogwa; hadīkījagi musabe nū mu nīmo gwenūyū.

⁸ Ū mu kūmuwīla gīko natūng'winhaga shilagīlo, alīyo natogilwe kwīlenganīja ī ng'hana ya būtogwa wing'we nū būkomeezu wa bangī.

⁹ Nguno mushimanile ī shigongo sha ng'wa Seeba wise Yesu Kilisito, ī gīkī nūūlū īkī nsabi, alīyo akihabīpya wei ng'wenekīlī kūlwa nguno ying'we, gīkī ū mu būhabī bokwe a bing'we mubize basabi.

¹⁰ Hūna lūūlū leki nang'winhe līīlī iganiko; gīkī, ū mhayo gwenūyū shiigelile mugūshikīlīje īkī ng'wagwandya kwīngīīla ng'wakīzo; nguno ī ng'hūmbū jing'we jitagelelile ng'wiganiko dūhū, alīyo nū būtogwa wenekīlī mulī nabo.

¹¹ Hū kūhaya īkī ū būtogwa mulī nabo, ī haha shikīlījagi nī shītwa, ītagi gīt'ūmo būdūla wing'we būlī.

¹² Nguno ū būkalalwa ūlū būlīho, ū munhū akanukūlagwa mu shikolo īsho alī nasho, ītī kūlwa shikolo īsho atī nasho.

¹³ Yaya ī gīkī mubabbūpīje nigo banhū bangī, lelo a bing'we ng'witūūle mu makoye; ī mihayo īje mu būlenganīja dūhū.

¹⁴ Ī likanza īlī, ū būsabi wing'we būbize bo kūbagunanha ū mu būhabī wabo, hama a ha ntondo ū būsabi wabo būlamugunanhe ning'we ū mu būgayiwa wing'we; ū būlenganīja wigele mu gīko.

¹⁵ Gīt'ūmo gwandīkilwe gīkī, “Ūyo akakuminga shingī atapandīkile sha kūkīlanīja, nū yūyo akakuminga shigehu nang'hwe shitang'wilebile.”

Tito na biye

¹⁶ Hūna lūūlū, ū Mulungu alūmve, ūyo akang'winha ū Tito moyo gwa kwifunya kūlwa nguno ying'we.

¹⁷ Nguno ī chene ng'hana tūkanomba ize ko ū kū bing'we, alīyo īkī amuyegelile no, ūūyo aliza ko mu būtogwa bokwe wei ng'wenekīlī.

¹⁸ Ūūyo na ndūgū ūngī twantūmile hamò nang'hwe, būlī kwene ū mu kanisa akūkumīlījiagwa no ū mu nīmo gwa Ng'hūlū Jawiza.

¹⁹ Hama nīyo ītī gīko dūhū, alīyo pyī ī kanisa jikansola gīkī ashimīze hamò nise, abize ng'wichiswi ū mu nīmo gwa būtūmami wenūbū, ūyo tūkūjaga tūgwīta mu welwa ng'holò kūlw'ikūjo lya ng'wa Seeba.

²⁰ Tūtogilwe kūbīngīja mahane hane a banhū, atizigela nūūlū ūmò wa kūgūhaya kībi ū nīmo gwise ūyo tūkūgwītaga ū mu shakwinha shenīshi.

²¹ Nguno tūkūgemaga no no no kūbeeja yawiza, ītī kūlī Mulungu dūhū, alīyo nū kū banhū.

²² Hama hangī na ndūgū wise ūngī ūūyo aliza ko, nang'hwe twantūmile hamò nabo. Twanolile makanza malīhu mu mihayo mingī, tūmona gīkī alī na kwifunya; nīyo ī haha īkī wamusanije, ū kwifunya kwakwe kongegije no.

²³ Ū Tito ntūmami ng'wichane kūlwa nguno ying'we, lelo a badūgū a bangī, a bene batūng'wa ba kanisa, alīyo ī likūjo līlī lya ng'wa Kilisito!

²⁴ Hūna lūūlū a banhū benabo boolekejagi ū būtogwa wing'we, ī nguno ya kwikumīlīja kwise īje īkūbonagwa mu kanisa jose.