2 Bakolinto 2 - Bibilia Ilagano Lya Kale 2015

¹ Hūna lūūlū ū nene nakabona ītī yawiza nize ū kū bing'we nalī mu būpīna.

² Ī gīsī ūlū nūmupīnīhaja a bing'we, numho nani ūyo alaniyeje, ūlū īt'ūyo nalampīnīhaje dūhū ū nene?

³ H'ī chene nakagwandīka ū mhayo gwenūyū, ībize gīkī ūlū nūshika ko, batizūnipīnīhaja a banhū abo shiigelile baniyeje. Nguno naalī nasanije gīkī, ū būyegi bone būlī wing'we na a bing'we.

⁴ Aho nang'wandīkīlaga naalī mu shisoji shingī no, kūlwa kūluha kūtaale na kūtawa tawa mu ng'holò; naalī natī na ng'hūmbū ja kūmupīnīhaja, alīyo naalī natogilwe mubūbone ū būtogwa ūbo nalī nabo kūlwa nguno ying'we, nguno būlī būtaale no!

Kūnekeja ng'hūbi

⁵ Nose ūlū munhū wenhelegije būpīna, atanipīnīhagije nene, (natizūmubuna no), alīyo ī lipandī wamupīnīhagije na a bing'we pye a bose.

⁶ Ū munhū ng'wenūyo gwang'wigelile lūūlū ū nsango ūyo winhilwe na bingī.

⁷ Īlī hambū hambū mumonele shigongo na kūnūngūja, atizūminyiwa būdito wa būpīna, nose agwe ng'holò.

⁸ Ali lūūlū, nalīng'wikūmbīlīja mung'oolekeje ū būtogwa wing'we ūbo mulī nabo kūlwakwe.

⁹ Nakang'wandīkīla nguno naalī natogilwe kūmumana ūlū mulī bigwi mu yose.

¹⁰ Alīyo ī haha, būlī ng'wene ūyo ng'ūnekeja mhayo gose gose, nū nene nanekejaga. Ūlū alī na mhayo gose gose, nanekejaga mu būtongi bo ng'wa Kilisito kūlwa nguno ying'we.

¹¹ Tūtatogilwe ū Shetani atwibange nose atūheebe, nguno tūtījimīīlilwe ī nyasala sala yakwe!

Kūdidohelwa mu moyo ha numa kwifuula

¹² Aho nashika Tiloa kūjilomeela ī Ng'hūlū Jawiza ja ng'wa Kilisito, ū Seeba ūnilugūlīla nyango.

¹³ Alīyo nahene nakabiza natī na kwifuula ū mu moyo gone, nguno natansangile koi ū ndūgū one ū Tito; nūkalīla kūbalaga dūhū, nūbūūka kūja Makedonia.

¹⁴ Gwike ū Mulungu alūmve, ūyo akatwinhaga būtindi gwa gwa gwa mulī Kilisito, nīyo hangī būlī kwene ūko tūkūbītaga akūjaga ūtūūla ng'waso gwa kūmana wei.

¹⁵ Ū kūlī Mulungu tūlī ng'waso gwawiza kūlwa nguno ya ng'wa Kilisito, ībize kū bapījiwa nūūlū kū bajimīīji.

¹⁶ Ū kū bajimīīji tūlī inyema lya lūfu, lya kwenha icha! Lelo ū kū bapījiwa tūlī ng'waso gwa būpanga, gwa kwenha būpanga! Nani ūyo igeleelilwe ū kwīyīta ī yenīyo?

¹⁷ A bise tūtī gīt'ūmo bingī bakwītīlaga, abo bakūgūtūmamīlaga ū mhayo go ng'wa Mulungu kwikoobela nīīlo; alīyo tūkūsomboolaga mu ng'hana kū būtongi bo ng'wa Mulungu, gīt'ūmo shibigelile banhū ba ng'wa Mulungu mulī Kilisito.