2 Bakolinto 12 - Bibilia Ilagano Lya Kale 2015

Koolekejiwa kwa ng'wa Paulo

¹ Shinigeleelilwe ū kwikumīlīja nūūlū īkī ītīho solobo; ali lūūlū, leki nagalūkīle mihayo īyo Seeba akīyoolechaga na kwīkundūla.

² Naamanile munhū nebe mulī Kilisito, ūyo akahwehulwa ūtwalwa kūshisha kwigūlū lya kadatū. Ū haha yabītaga myaka ikūmi n'īne, hīmba olī mu mīlī, nūūlū hīmba olī hanze ya mīlī, natamanile; Mulungu agūmanile ū gwenūyo.

³ Na ng'hana naamanile ū munhū ng'wenūyo, alīyo ūlū olī mu mīlī nūūlū hanze ya mīlī natamanile; ū Mulungu amanile.

⁴ Ū munhū ng'wenūyo akahwehulwa ūtwalwa paladiso, ūūkigwa mihayo īyo munhū atazunīlījiwe kwīsomboola.

⁵ Ali lūūlū, nakwikumīlīja kūlwa nguno yakwe ū munhū ng'wenūyo, alīyo ūlū kūlwa nguno yane nene ng'wenekīlī, natūdūla ū kwikumīlīja; ūlū ītī kūlwa būgokolo bone dūhū.

⁶ Gwike nahene nūūlū nakikumīlīja natūbiza nchilū chilū, nguno nakūbiza nalīhaya ya ng'hana. Alīyo nakwilemejaga, nguno natatogilwe munhū ose ose anibalīle mitaale kūtinda ūmo akūnibonelaga, nū mumo akwīyigwīlaga īyo nakwīyītaga.

⁷ Na lūūlū kūlwa nguno ya kūkundūlīlwa mihayo mitaale gīko, nakatūūlīlwa ling'hwa mu mīlī, itūng'wa lya ng'wa Shetani, gīkī līninwamye, natizikumīlīja.

⁸ Nakashisha ng'hangala idatū nakūng'wikūmbīlījaga ū Seeba, gīkī ū mhayo gwenūyo gūnīngīle.

⁹ Alīyo ūniwīla gīkī, “Ī shigongo shane shikwigelile, nguno ū būdūla bone būkashikanaga mu būgokolo!” Hū kūhaya ū nene nakongeja kwikumīlīja kūlwa kūbūyegela ū būgokolo bone, gīkī ū būdūla bo ng'wa Kilisito bongeje kwikala ū mulī nene.

¹⁰ Hūna lūūlū ū nene nakūyejiagwa na būgokolo, būsondagūlwa, būgayiwa, būluhiwa, na makoye, kūlwa nguno ya ng'wa Kilisito; nguno ū nene ūlū nalī na būgokolo, hū nalī na būdūla.

Būtogwa bo ng'wa Paulo kū Bakolinto

¹¹ Ī gete angū mmho nose naachilūhala! Alīyo mulīnenheleja bing'we, abo yalī īng'wigeleelilwe munigaliile. Nguno shitīho gete īsho banilebije a batūng'wa a bataale, nūūlū īkī ū nene natī shikolo.

¹² Īkī ī mihayo ya koolecha ūmo balī a batūng'wa īkabeejiwa ū mu bing'we mu wiyūmīlīja bose, mu nzīla ya shimanīkījo na milīmo ya kūkumya, na shītwa sha būdūla.

¹³ Ī gīsī mukaleba mu mhayo kī ū kūlenganīla nī kanisa ī jingī, ūlū ītī gīkī dūhū ū nene natamusesegije nigo a bing'we? Nilekejagi ū būhūbi wenūbo.

¹⁴ Managi gīkī namalīīlile kwiza ko ū kū bing'we. Ū lwenūlū lūkūbiza lūkangala lo kadatū, alīyo nī hangī natūmubuna; ū nene natizaga kūlwa shikolo shing'we, naliza kūlwa nguno ying'we. Nguno ītabeelelile a baana bayūsūmbya sabo kūlwa babyaji, alīyo a babyaji hū bene abo bakabīkaga sabo kūlwa baana.

¹⁵ Ū nene nalī na būyegi no ū kūshitūmamīla īsho nalī nasho, nū kwifunya nene ng'wenekīlī kūlwa nguno ya būpanga wing'we. Nīyo namutogilwe hataale no, a bing'we hū mugelele kūnitogwa hado dūhū?

¹⁶ Ū gwene nahene gūtī na mhayo ni gūjage gīko. Gwike ū nene natang'winhile nigo a bing'we. Kolaga hamo naalī na masala no, nakamugwasha mu nyasala sala!

¹⁷ Nūūlū hamo nakang'wiboneela nūsola shikolo shing'we mu nzīla ya ng'wa ose ose ū mu banhū abo nakabatūma bize ū kū bing'we?

¹⁸ Nakanomba Tito ize koi, nūbatūma kwiza ko nū ndūgū wise; kolaga hamo ū Tito akang'wiboneela shi? Hamo ī nhūngwa ja kashimīzīle kise jalī jitalenganīlile, nose twalī tūtajīlanījaga ū mu moyo?

¹⁹ Nūūlū hamo ng'wandije kwiganika gīkī ī mihayo īyo tūkūmuwīlaga īlī ya kwigunīja bise benekīlī? Managi gīkī īyo tūkwīsomboolaga yenīyo, tūkwīsomboolaga mulī Kilisito, kū būtongi bo ng'wa Mulungu; hama pyī īyo tūkūyītaga īlī ya kūmuzenga bing'we batogwa bise!

²⁰ Bing'we, nalogoha natizūshika ko namusange mutī gīt'ūmo natogelilwe, na a bing'we munibone ū nene natī gīt'ūmo mutogelilwe. Hamo nakūsanga mukūkoyiagwa wilemeelwa, wilu, kwisaayīla, wilwisha, būlwisanya, būsīgani, wikumīlīja na wiyugagūji.

²¹ Nalīnomba ū Mulungu one atizūnidoheleja hangī ū kū būtongi wing'we, ūlū nalize ko! Nguno bingī abo baalī bīīta shibi bakūnilīja būpīna, ūlū nalabasange bataalī kūgalūka na kūlekana nabo ū būsoso nū būjingi, nū būbi ūbo baalī bawīta!