2 Bakolinto 10 - Bibilia Ilagano Lya Kale 2015

Paulo na nīmo gokwe

¹ Hūna lūūlū, ū nene Paulo nalīng'wikūmbīlīja kūlwa būfula na wiyūmīlīja bo ng'wa Kilisito; nene ng'wenekīlī ūyo mūkūnibonaga gīkī nalī ng'ooba wa booba ū kū bing'we ūlū nalī hamò ning'we, alīyo ūlū natīho nalī ngimu!

² Ū haha aho natī hamò ning'we, nalīng'wikūmbīlīja ūlū nalize ko mutizūnenheleja kūgima, nakabūtūmamīla ū būgimu ūbo namanile gīkī nalī nabo kū bamò, abo bakūtwiganikīlaga gīkī tūkūshimīzīlaga mu nhūngwa ja mu mīlī.

³ Na ng'hana ni tūbizage tūlī banhū ba mīlī, alīyo tūtalwaga gītī banhū ba nhūngwa ja mu mīlī.

⁴ Nguno ī shilanga shise shitī mu nguzu ja mīlī, alīyo shilī mu nguzu ja ng'wa Mulungu. Shidūgije kūkambagūla ng'hambī ja banishi, kūgwisha maganiko ga bahalalī;

⁵ na būlī shose shose īsho shikigūngūhyaga kūlwa kūbahangīja banhū batizūmana Mulungu. Na hangī shilī na būdūla bo kūdima būlī iganiko, na kūlītūūla ha sīlīlī ya ng'wa Kilisito.

⁶ Hūna lūūlū, ū wigwi wing'we ūlū būlashikane, a bise tūmalīīlile kūwinha nsango pyī ū būshitiigwa.

⁷ A bing'we mukwībabataga ī mihayo higūlya gūlya gīt'ūmo mukwībonelaga; ūlū alīho munhū imanile gīkī alī wa ng'wa Kilisito, ni agūmanage nū gwenūyū nago, gīkī na a bise tūlī ba ng'wa Kilisito.

⁸ Nguno nūūlū nakabiza gītī naja no ū mu wikumīlīja kūlwa būdūla wise ūbo watwinha Seeba, gīkī tūmuzenge, tūtizūmusambagūla, nahene natūgooka.

⁹ Ū nene natatogilwe niganikīlwe gīkī nakūmukangaga ū mu nyalūba jane.

¹⁰ Nguno bangī bakūhayaga gīkī, “Ahene ū ng'wing'wana ī nyalūba jakwe jilī na ntili, nīyo jilī na nguzu; lelo ūlū ūmona ū wei ng'wenekīlī, nyangīlīzu o banyangīlīzū, hama nī mihayo yakwe migokolo ya nyaleele leele!”

¹¹ Ū munhū ūyo akwiganikaga gīko ni amanage gīkī, ūmo tūlī ū mu nyalūba ūlū tūlī ndūhū, h'ūmo tūlī nū mu katūmamīle, ūlū tūlīho.

¹² A bise tūtūdūla gete ū kwitūūla ng'wigele līmò na bamò babo, abo bakwikumīlījaga boi benekīlī; nūūlū ni kwilenganīja nabo dūhū yaya. Nguno a boi batamanile; bakūgelelaga kwilenganīja na kwilola boi benekīlī na benekīlī dūhū.

¹³ Alīyo a bise tūtīko kwikumīlīja tūkīlanīje ūmo Mulungu atūgelekelile, nīyo na a bing'we mulīmo ū mu ngelekelo yenīyo.

¹⁴ Hūna lūūlū aho tūkashika ko kwiza kūmulomeela Ng'hūlū Jawiza ja ng'wa Kilisito, twalī tūtananamīīlaga mu kwihadīkīja.

¹⁵ Tūtīko nūūlū kwikumīlīja kūlwa milīmo ya bangī, alīyo tūlī na kwisagīlwa gīkī ū kūzunya kwing'we ūlū kūlashikane, ū nīmo gwise ū kū bing'we gūkūbiza gwabeela.

¹⁶ Hū tūkwandya kūjilomeela ī Ng'hūlū Jawiza nū kū mapandī ayo galī kūle na bing'we, gwike tūtatogilwe kwikumīlīja kūlwa nīmo ūyo gwabeejiwa na ūngī.

¹⁷ Hūna lūūlū ūlū alīho ng'wikumīlīja, ni ikumīlījage mulī Seeba.

¹⁸ Nguno ūyo akakumīlījiagwa na Seeba hū ng'wene ūyo asanyiwe na Seeba, atī ūyo akikumīlījaga wei ng'wenekīlī.