2 Bakolinto 1 - Bibilia Ilagano Lya Kale 2015

Kūgīsha na kūlūmba

¹ Nene Paulo ntūng'wa wa ng'wa Kilisito Yesu kūlwa būtogwa bo ng'wa Mulungu, na ndūgū wise Timotheo. Kū kanisa ya ng'wa Mulungu īyo īlī mu Kolinto, na kū beela bose abo balī mu Akaya ī yose.

² Shigongo na mhola shibize hamò ning'we kūfuma kūlī Mulungu Sīswe, na kūlī Seeba wise Yesu Kilisito.

³ Akumīlījiwe ū Mulungu, Ise wa ng'wa Seeba wise Yesu Kilisito, Sīswe wa shigongo, na Mulungu nūngūja mu yose.

⁴ Hūna ng'wene akūtūlūngūjaga ū mu makoye gise gose, ayo gakūtūgwīlaga; nose ū mu būlūngūjiwa ūbo tūkūlūngūjiagwa na Mulungu a bise benekīlī, nise tūbize na būdūla bo kūbalūngūja abo balī mu makoye ga būlī mbika.

⁵ Nguno ūmo būluhiwa būkongejaga kūtūkwīlīla kūlwa ng'wa Kilisito, h'ūmo nū būlūngūjiwa wise būkongejaga kūkwīla kūlwa ng'wa Kilisito.

⁶ Hūna lūūlū ūlū tūlīluhiwa, īlī kūlwa nguno ya būlūngūjiwa na būpīji wing'we; hama ūlū tūkūlūngūjiagwa, īlī kūlwa nguno ya būlūngūjiwa wing'we ūbo būkūng'winhaga wiyūmīlīja ū mu būluhiwa gīt'ūbo tūkūluhiagwa na a bise.

⁷ Nīyo tūlī na kwisagīlwa kūtaale no kūlwa nguno ying'we, nguno tūmanile gīkī, īkī mukūsangīlaga ū mu būluhiwa, mukūbiza basangīji nū mu būlūngūjiwa.

⁸ Nguno badūgū bise tūtatogilwe muleke ū kūmana gīkī, ū būluhi ūbo būkatūgwīla mu Asia boolī būdito no, būkatūbuna tūmala gete ī nguzu; kūshisha nose tūgwa ng'holò, tūmana gīkī tūtikala bapanga yaya!

⁹ Nguno nose tūkibona gīkī tūlī mu nsango gwa kūcha; toya ū kwisanya a bise benekīlī, tūsaaja mhayo gwa kūnsanya Mulungu ūyo akajūūchaga bafu.

¹⁰ Hūna ng'wene ūyo akatūpīja kūfuma mu nhabaala nhaale gīko, na ng'hana akūtūpīja. Ū wei h'ūyo tūnsanije gīkī akongeja kūtūpīja;

¹¹ nguno na a bing'we mulīmo ū mu būsangī bo kūtūlombela. Nose tūlī na shakwinhwa kūlwa kūlombelwa na banhū bingī, gīkī būfunyiwe būlūmbi būtaale kūlwa nguno yise.

Wikumīlīja kūlwa nīmo go ng'wa Seeba

¹² A bise ū kwikumīlīja kwise kūlī mu būkaanīji ūbo tūlī nabo mu myoyo yise, gīkī ī nhūngwa jise ū mu sī, ī no no no ū kū bing'we, jalī mu widohya na mu būtūngīlīja bo ng'wa Mulungu, ītī mu masala ga mīlī; alīyo mu shigongo sha ng'wa Mulungu.

¹³ Nguno tūtūng'wandīkīlaga mihayo yīngī, ūlū ītī īyo mudūgije kwīsoma nūūlū kwīyitegeleja; na ng'hana nalisagīlwa gīkī mukwīyitegeleja mu būshikanu bose.

¹⁴ Nguno ahene mugemile ū kūtūmana, kūshisha nose mukwikumīlījaga kūlwa nguno yise. Na a bing'we mukūbiza nguno ya kwikumīlīja kwise ū mu lūshikū lo ng'wa Seeba Yesu.

¹⁵ Hūna lūūlū, īkī nakasanya gīkī h'ūmo īlī, nakabiza na ng'hūmbū ja kwiza ūko mulī tame; gīkī ng'wīlūkīlwe lubango ng'hangala ibīlī.

¹⁶ Ī likanza lya kūja Makedonia nabīte ko, hama na a ha kūfuma ī Makedonia nalabīte ko, munigunanhe na mu lūgendo lwa kūja Būyudaya.

¹⁷ Kolaga hamo shi nakabiza munhū wa magalū galū aho nagūhela gwa kwīta gīko? Nūūlū hamo ī mihayo īyo nayiganikaga yenīyo, nayiganikaga mu nhūngwa ja mīlī nose nabize munhū wa kūyūsangīlīja mu kahayīle, Ehe na Yaya, ng'wikanza līmò?

¹⁸ Alīyo gīt'ūmo Mulungu alī wa kūsanyiwa, ū mhayo gwise ū kū bing'we gūtī na būsangīlīja bo Ehe na Yaya!

¹⁹ Nguno ū mulī Ng'wana wa ng'wa Mulungu, ū Yesu Kilisito, ūyo nene na Silwano na Timotheo tūkamulomeela, jitasangīlīgije Ehe na Yaya, ū mulī ng'wene īlīmo Ehe dūhū.

²⁰ Nguno pyī ū wisagīja bo ng'wa Mulungu ūbo abūtūūlile ho kūbītīla mulī wei būlī Ehe, h'ī nguno yene ū mulī wei tūkūhayaga Alichene; gīkī ū Mulungu apandīke ikūjo kūfuma kū bise.

²¹ Alīyo ū Mulungu hū ng'wene ūyo akūtūguzuhyaga mulī Kilisito a bise, pye na a bing'we. Na hangī nīyo atūbilile maguta,

²² hūna ūtūmeng'ha; hanuma ūtwinha Moyo Ng'wela ikale ū mung'holò jise, koolecha gīkī tūlī bakwe.

Nguno ya kūleka kūja Kolinto

²³ Ali lūūlū, nakaleka ū kwiza ī Kolinto kūlwa kūmukūlīlwa; ū mu mhayo gwenūyū nalīntūūla Mulungu kūbiza nkaanīji wa būpanga bose.

²⁴ A bise tūtī basugi ba kūzunya kwing'we, alīyo tūlī batūmami biching'wi dūhū kūlwa būyegi wing'we; nguno a bing'we ng'wīmīīlile kūlwa kūzunya.