1 Yohana 5 - Bibilia Ilagano Lya Kale 2015

Kūpyena ya mu sī

¹ Būlī ng'wene ū wa kūzunya gīkī ū Yesu alī Kilisito, ū ng'wenūyo abyalilwe kūfuma kūlī Mulungu; hama būlī ng'wene ūyo antogilwe ū myaji shiigelilwe kūntogwa nū myalwa.

² Ūlū tūntogwa ū Mulungu, hūna tūbiza tūkūshishikīlījaga ī shilagīlo shakwe, ū mu gīko tūkūmana gīkī tūbatogilwe na a baana ba ng'wa Mulungu.

³ Nguno ū būtogwa bo ng'wa Mulungu būlī gīkī, tūshidime ī shilagīlo shakwe; nīyo ī shilagīlo shakwe shitī shilambu yaya.

⁴ Nguno būlī ng'wene ūyo abyalilwe na Mulungu ayīpyenile ī ya mu sī, hama ū būpyeni wise būlī ūbū, ū kūzunya kwise.

⁵ Ī gīsī nani ūyo ayīpyenile ī ya mu sī, ūlū atī ūyo azunije gīkī ū Yesu alī Ng'wana wa ng'wa Mulungu?

Kūkaanīlwa kwa Ng'wana

⁶ Ū ng'wenūyo na ng'wene ūyo wamala kwiza mu nzīla ya minzī na mininga; ū Yesu Kilisito. Atizile mu nzīla ya minzī dūhū, alīyo mu nzīla ya minzī hamò na mininga. Ū Moyo hū ng'wene ū Nkaanīji, nguno ū Moyo alī wa ng'hana.

⁷ Nose ū būkaanīji ūbo būlīho būlī bo mbika idatū.

⁸ Kūfuma kūlī Moyo, na minzī, na mininga; ū būkaanīji būdatū wenūbū būlī mu būsangī būmò.

⁹ Ū būkaanīji wa banhū tūkawanukūlaga, alīyo ū bo ng'wa Mulungu būlī būtaale kūtinda. Nguno ū wene būlī būkaanīji bo ng'wa Mulungu, ūbo akūnkaanīlaga Ng'wana wakwe.

¹⁰ Ū wa kūnzunya Ng'wana wa ng'wa Mulungu, alī nabo ū būkaanīji wenūbū; ūyo ūlema kūnzunya, akūbiza alīmona būlomolomo ū Mulungu. Nguno atabūzunije ū būkaanīji ūbo Mulungu akūnkaanīlaga ū Ng'wana wakwe.

Būpanga butashilaga

¹¹ Ūbū wene hū būkaanīji, gīkī ū Mulungu watwinhile būpanga butashilaga; ū būpanga wenūbo būlī mulī Ng'wana wakwe.

¹² Ūyo alī nang'hwe ū Ng'wana alī nabo ū būpanga; ūyo atī nang'hwe ū Ng'wana wa ng'wa Mulungu atī nabo ū būpanga!

¹³ Ū mihayo yenīyī nalīng'wandīkīla a bing'we abo mulīzunije ī lina lya Ng'wana wa ng'wa Mulungu, mumane gīkī mulī na būpanga butashilaga.

Wiyabī kūnomba Mulungu

¹⁴ Ali lūūlū, ū kūsanya ūko tūlī nako kū būtongi bokwe kūlī gīkī, ūlū tūnomba mhayo gose gose ūyo gwizunīlīgije nū būtogwa bokwe, akūtwigwa.

¹⁵ Nose īkī tūmanile gīkī akatwigwaga mu yose ūlū tūnomba, hū kūhaya tūmanile nī gīkī tūlī nasho īsho tūkūnomba.

¹⁶ Ūlū munhū ūmona ndūgūye alīīta shibi shitī sha kūbūlaja, ni anombelage, ū Mulungu akūmpīja. Nalībahaya abo bakwīta shibi īsho shitī sha kūbūlaja; nguno shilīho na shibi sha kūbūlaja, natūhayaga gīkī alombe kūlwa nguno ya shibi shenīsho!

¹⁷ Na ng'hana pyī ū būkenaagūji būlī shibi, alīyo shilīho ī shibi īsho shitī sha kwingīja munhū mu kūcha.

Mulungu nang'hani wise

¹⁸ Tūmanile gīkī būlī ng'wene ūyo abyalilwe na Mulungu atīītaga shibi, būlī ng'wene ūyo abyalilwe kūfuma kūlī Mulungu alang'hanilwe atizūkuumiwa nū Mi.

¹⁹ A bise tūmanile gīkī tūlī baana ba ng'wa Mulungu, alīyo pyī ī sī īlī ha sīlīlī yakwe ū Mi.

²⁰ Hama tūmanile gīkī ū Ng'wana wa ng'wa Mulungu wamala kwiza kūtwinha witegeleja, gīkī tūūmane ūyo alī wa ng'hana; nīyo na a bise tūlīmo ū mulī we ūyo alī ng'hana yenekīlī, ū Yesu Kilisito ū Ng'wana wakwe. Ū ng'wenūyū hū ng'wene ū Mulungu wa ng'hana, nīyo hū ng'wene ūyo alī būpanga butashilaga.

²¹ Bing'we baana, ilang'hanagi ū kū mawitongeleja. Alichene.