1 Yohana 2 - Bibilia Ilagano Lya Kale 2015

Būlyehu wene būkanji wa Būsangī

¹ Baana bane, ī yenīyī nalīng'wandīkīla gīkī mutizīīta shibi; alīyo ūlū munhū wīta shibi tūlī na Nombeji ū kūlī Sīswe, ng'wene Kilisito Yesu ū ntūngīlīja.

² Ū wei h'ūyo alī shitambo kūlwa shibi shise, hama nīyo ītī kūlwa shibi shise dūhū, alīyo sha bose pyī ū mu sī.

³ Ūlū tūshidima ī shilagīlo shakwe hū tūkūmana gīkī tūndeebile.

⁴ Ū wa kūhaya gīkī andeebile alīyo ūbiza atashidimile ī shilagīlo shakwe, ū ng'wenūyo nomolomo; hama nū būtūngīlīja būtīmo ū mulī we.

⁵ Alīyo ūyo agūdimile ū mhayo gokwe, ū ng'wenūyo ntūngīlīja, nū būtogwa bo ng'wa Mulungu būshikanyiwe ū mulī we. Ū mu gīko hū tūkūmana gīkī tūlī mulī we.

⁶ Ū wa kūhaya gīkī alī mulī wei, shiigelile nang'hwe ashimīzīle mu nhūngwa gītī jakwe.

Shilagīlo shipya

⁷ Batogwa, natūng'wandīkīlaga shilagīlo shipya, alīyo shaho na kale; īsho mulī nasho kūfuma kale na kale. Ī shilagīlo sha kale shenīsho hū gwene ū mhayo ūyo ng'wamalile kūgwigwa.

⁸ Alīyo hangī nalīng'wandīkīla shilagīlo shipya, ū mhayo gwa ng'hana ūyo gūlī mulī wei, hamò nū mu bing'we; nguno ī giiti shilībīta, ī lisana lya ng'hana līkwaakaga ī haha.

⁹ Ūyo akwihayaga gīkī alī ng'wisana alīyo ūbiza ankolilwe ndūgūye, ū ng'wenūyo ataalī mu giiti nī haha!

¹⁰ Ūyo antogilwe ndūgūye alī ng'wisana, nīyo ū mulī wei shitīmo sha kwipamya.

¹¹ Alīyo ūyo ankolilwe ndūgūye alī mu giiti, nīyo akūshimīzīlaga mu giiti; atamanile nūūlū hado ūko ajile, nguno ī giiti shimbokugije a miso gakwe!

¹² A bing'we banīgīnī nalīng'wandīkīla, nguno mulekejiwe ī shibi shing'we mu lina lyakwe.

¹³ A bing'we bababa nalīng'wandīkīla, nguno muumanile ūyo alī waho na kale, kūfuma wandījo. A bing'we badinha, nalīng'wandīkīla, nguno mumpyenile ū Mi.

¹⁴ A bing'we banīgīnī, nang'wandīkīlaga, nguno muumanile ū Sīswe. A bing'we bababa, nang'wandīkīlaga, nguno muumanile ūyo alī waho na kale kūfuma wandījo. A bing'we badinha, nang'wandīkīlaga, nguno mulī na nguzu, nū mhayo go ng'wa Mulungu gūlīmo ū mu bing'we, na hangī mumpyenile ū Mi.

¹⁵ Yaya ū kwītogwa ī sī, pyī nī sha mu sī; ūlū munhū ūtogwa sī, ū būtogwa bo ng'wa Sīswe būkūbiza būtīmo ū mulī we.

¹⁶ Nguno pyī ī sha mu sī, gītī kwikūmva kwa mīlī, kwikūmva kwa miso, na kūdoosela būpanga; shitafumaga kūlī Sīswe, ī shoi shilī sha mu sī!

¹⁷ Alīyo ī sī īlībīta, hamò nū kwikūmva kwamo; lelo ū wa kwīta īyo yīnyegije Mulungu, ū ng'wene alī wa kūshinga welelo bose.

Būhūgūlwa kū lwa ng'wilwisha wa ng'wa Kilisito

¹⁸ Bing'we baana, ī likanza īlī līlī lya kū būkalīkījo; hūna lūūlū gīt'ūmo ng'wamala kwigwa gīkī akwiza Ng'wilwisha wa ng'wa Kilisito, nī haha balīho bingī a bilwisha ba ng'wa Kilisito. H'ī nguno yene tūlīmana gīkī tūlī ng'wikanza lya kū būkalīkījo.

¹⁹ Bakūfumaga mu bise, alīyo ī gete a boi batī bichiswi, nguno ūlū ni baalī bichiswi ni bikala hamò nise, gwike ī haha īlīmanīka hape gīkī batī bichiswi pye a bose!

²⁰ Alīyo a bing'we ng'witīīlilwe Moyo Ng'wela kūfuma kūlī we ūyo alī ng'wela, nose hū kūhaya ng'wīmanile pyī ī yose.

²¹ Natūng'wandīkīlaga īkī gīkī mutīmanile ī ng'hana, alīyo īkī ng'wīmanile; na hangī īkī būtīmo būlomolomo bose bose ū mu ng'hana.

²² Ī gīsī ū nomolomo alī nani, ūlū atī ūyo alemile kūzunya gīkī ū Yesu hū ng'wene ū Kilisito? Ū ng'wenūyo hū ng'wene ū Ng'wilwisha wa ng'wa Kilisito, h'ūyo anemile ū Sīswe pyī nū Ng'wana!

²³ Būlī ng'wene ūyo anemile ū Ng'wana, nū Sīswe atī nang'hwe; ū wa kūkaanīla gīkī alī nang'hwe ū Ng'wana, ū ng'wenūyo alī nang'hwe nū Sīswe.

²⁴ A bing'we ikalagi ū mu mhayo ūyo mugwigwile kūfuma ha wandījo. Ū mhayo ūyo mugwigwile kūfuma ha wandījo gwenūyo ūlū gwikala ū mu bing'we, ning'we mukwikala mo ū mulī Ng'wana nū mulī Sīswe.

²⁵ Ū mhayo ūyo atwisagīgije gwene ūyū, būpanga bo welelo bose.

²⁶ Nang'wandīkīlaga ī mihayo yenīyī kūlwa nguno ya banhū abo bakūmuhūbyaga.

²⁷ Alīyo a bing'we ū Moyo Ng'wela ūyo ng'witīīlilwe kūfuma kūlī Kilisito alī hamò ning'we, nose mutī na nguno ya kūlangwa na munhū ose ose. Hūna lūūlū ikalagi mo dūhū ū mulī we, gīt'ūmo Moyo Ng'wela akūmulangaga mu yose. Ū mhayo gwenūyū gūlī gwa ng'hana, gūtī gwa būlomolomo.

²⁸ Hūna lūūlū ī haha baana, ikalagi mulī wei. Ūlū ng'wīta gīko tūtūbiza na booba ūlū oolechiwa, tūtūgooka ū kū būtongi bokwe a h'ikanza lya kūshoka kwakwe.

²⁹ Ūlū mubize mumanile gīkī ū wei ntūngīlīja, managi nī gīkī būlī munhū ūyo akīītaga ya būtūngīlīja abyalilwe na ng'wene.