1 Timoteo 2 - Bibilia Ilagano Lya Kale 2015

Būkomeleja kūlwa kūlomba

¹ Ali lūūlū, ū mhayo gwa kwandya nalīkomeleja gīkī kūbize ho kwikūmbīlīja na kūlomba na kūlombela, hamò na kūlūmba kūlwa banhū bose.

² Kūlwa basugi na batongeeji bose, gīkī twikale mu mhola na būlembeezu, n'ikūjo mu wela bose.

³ Ū mhayo gwenūyū gūlī gwawiza, na gūzunīlījiwe nū Mulungu ū mpīja wise,

⁴ ūyo atogilwe pye a banhū bapīle, na bashike mu kwīyitegeleja ī ng'hana.

⁵ Nguno alīho Mulungu ūmò, na Munhū ūmò, ūyo alī ntūūji wa būsangīja ha gatī ya banhū na Mulungu, ng'wene Kilisito Yesu;

⁶ ūyo akifunya wei ng'wenekīlī kūbiza shikomoolelo kūlwa nguno ya bose, mhayo ūyo gūkaanīlilwe ng'wikanza lyago.

⁷ Ū nene nakasolwa nūtūūlwa kūbiza nkumūcha wa mhayo gwenūyo, na ntūng'wa wa kūlanga banhū ba mahanga; gīkī bingīle mu kūzunya, na babize batūngīlīja; nalīhaya ya ng'hana natūlomalomaga.

⁸ Ali lūūlū natogilwe gīkī, būlī kwene a bagosha bayūlomba babūūkije ng'wigūlya makono meela, yaya ū kūsugwa na būpelanu nūūlū halalī.

⁹ A bakīma nabo ū kwigaliila kwabo kūbize mu kazwalīle kalongile; nīyo mu būkoonu na būdeekanu bo masala, ītī mu kūshiba nzwīlī na kūzwalīla zahabu na luulu, nūūlū myenda ya mpango ntaale.

¹⁰ Alīyo babize mu shīmīle īsho shibigelile bakīma ba nhūngwa jawiza, mu kashimīzīle ka logohano kūlī Mulungu.

¹¹ Ū nkīma ni ilangage mu būlembeezu na widohya bose.

¹² Natūnzunīlījaga ū nkīma kūnanga nūūlū kūnsuga ngosha, alīyo abize nembeezu.

¹³ Nguno ū Adamu hū ng'wene ūyo akabūmva kwandya hūna wiza nū Eva.

¹⁴ Hama ū Adamu atalemba lembilwe, alīyo ū nkīma h'ūyo akalemva lemva, ūgwa mu būbi.

¹⁵ Gwike akūpījiwa kūlwa kūbyala baana, ūlū wikala mu kūzunya na būtogwa na wela na kwilang'hana.