1 Timoteo 1 - Bibilia Ilagano Lya Kale 2015

Kūgīsha

¹ Nene Paulo ntūng'wa wa ng'wa Kilisito Yesu, kūlwa shilagīlo sha ng'wa Mulungu mpīja wise, na Kilisito Yesu ūyo alī kwisagīlwa kwise.

² Kūlī Timotheo ng'wana wane gete ū mu kūzunya; shigongo na wiza na mhola shibize hamò nang'ho, kūfuma kūlī Mulungu Sīswe na Kilisito Yesu Seeba wise.

Būhūgūji kūlwa malange mabi

³ Ikalaga mo ū mu Efeso gīt'ūmo nakakūkomelegeja aho najaga Makedonia, nguno balīmo bangī balīyūlanga malange gatatūngīlīgije; ūbahūgūla booye.

⁴ Na hangī batizimanīlīja kwikala būponya makanza gabo bakūdegelekaga ngano, nūūlū mahoya ga mihayo ītī na būkalīkīle ya makwihela ga shibyalīlwe. Ū mihayo yenīyo ītagunanhaga nūūlū hado ū mu kūntūmamīla Mulungu mu kūzunya, ūlū ītī kwenheleja halalī dūhū.

⁵ Ī nguno ya kūkwinha ū būhūgūji wenūbū īlī gīkī, būbize ho būtogwa ūbo būfumile mung'holò neela na wiyangūji wawiza, na kūzunya kwa ng'hana.

⁶ Bamò na bamò bakwījimīījaga pyī ī yose īyī bayūgalūkīla mahoya ayo gatī na solobo!

⁷ Batogilwe kūbiza balangi ba shilagīlo, alīyo batīmanile nūūlū hado īyo bakīhayaga, nūūlū īkī bakigambīlaga kūlomeela na būgimu būtaale.

⁸ Tūmanile gīkī ī shilagīlo shilī shawiza kūlī munhū ose ose ūyo wizunīlīja nasho ūmo shihayīlile.

⁹ Gwike īlī yawiza kwitegeleja gīkī, ī shilagīlo shitatūūlilwe kūlwa nguno ya ntūngīlīja, shilīho kūlwa nguno ya bashitiigwa na a babo balemile kūhang'wa; kūlwa basoso, bakenaagūji, banhū ba malofu na badalahi; na kūlwa babūlagi ba basaabo na baninaabo, hamò na babūlagi ba banhū bose bose!

¹⁰ Shilīho kūlwa nguno ya bajingi, na bagosha abo bakiyītīlaga ya minala na bagosha bichabo; na kūlwa babisi ba banhū na balomolomo, pye na a babo batashikīlījaga būlagane wabo. Shitūūlilwe kūlwa mihayo yose īyo īkachaamaga malange masoga,

¹¹ ayo gizunīlīgije nī Ng'hūlū Jawiza ja ng'wa Mulungu nkumīlījiwa; ījo waninha nene.

Būlūmbi kūlwa kūchīlwa shigongo

¹² Nakūnūmbaga no ū nguzuhya wane ū Seeba wise Yesu Kilisito; nguno akanibona nigeleelilwe, ūnitūūla ū mu nīmo gokwe.

¹³ Ū nene ī kwandya naalī nsosohaja wa lina lya ng'wa Mulungu, hangī naalī nuhya wa banhū, na ng'wibonya! Alīyo nakachīlwa shigongo nguno pyī ī yenīyo nayītaga mu būchilū chilū, kūlwa būtūzunya.

¹⁴ Hūna ū mulī Kilisito Yesu nitīīlwa shigongo shingī, na kūzunya, hamò na būtogwa kūfuma kūlī Seeba wise.

¹⁵ Ū mhayo ūyū gūtūngīlīgije gete, hangī gwigeleelilwe kūzunyiwa na banhū bose; gīkī: Ū Kilisito Yesu akiza ū mu sī kūpīja ba shibi. Ū mu benabo, ū nene nalī wa kwandya!

¹⁶ Alīyo ī nguno īyo īkenheleja nachīlwe shigongo yalī gīkī, ū mulī nene ūyo naalī nkenaagūji ntaale, ū Yesu Kilisito abooleche pyī ū wiyūmīlīja bokwe. Būbize ho būlolelo kū bose abo batogilwe kūnzunya we, na kwingīla mu būpanga bo welelo bose.

¹⁷ Hūna lūūlū, ī haha akumīlījiwe na kūgongoolwa ū Ntemi wa welelo bose, ūyo atī wa kūyagala, nūūlū kūbonwa, ū ng'wene h'ūyo alī Mulungu ūmò wike.

¹⁸ Bebe Timotheo ng'wana wane, ī mihayo yenīyī nalīkūlagīla gīt'ūmo būhangi būkafunyiwa kūlwa nguno yako, gīkī ūdūle kwilwisha mu kalwīle kawiza.

¹⁹ Ūbize na kūzunya, na wiyangūji wawiza ū mu moyo; nguno ī haha balīho bangī balī mu nhabaala ya kūtubīla, kūlwa kūleka kūkūdīlīla ū kūzunya.

²⁰ Nīyo bamò, gītī ba Humaneyo na Isikanda, naanekelile Shetani balangwe, booye ū kwikala būsosohaja lina lya ng'wa Mulungu.