1 Sang'weli 7 - Bibilia Ilagano Lya Kale 2015

Baisilaeli kūngalūkīla SEEBA

¹ Na ng'hana a banhū ba Kiliati-yelimu biza būlīsola ī lisandīko lya ng'wa SEEBA, būlītwala ha ng'wa Abinadabu, walī na ng'witūnja lina lyakwe Elieza, būng'wīta kūbiza nang'hani walyo ī lisandīko lya ng'wa SEEBA.

² Ī lisandīko lyenīlo līkikala ī Kiliati-yelimu ikanza ilīhu, myaka makūmi abīlī, a Baisilaeli bose bandya kūnkooba ū SEEBA mu kūlīla.

³ Ū Sang'weli ūbawīla pye a Baisilaeli, “Ūlū ng'hana mulīngalūkīla ū SEEBA na ng'holò jing'we jose, lekanagi nabo a bamulungu a bageni, na Maashitoleti mūgīnje ū mu bing'we, ī ng'holò jing'we jingalūkīle SEEBA; muntūmamīle we wike, hū akūmupīja ū mu nkono gwa Bafilisiti.”

⁴ Hūna a Baisilaeli būgīnja a Mabaalī na a Maashitoleti, bandya kūntūmamīla SEEBA we wike.

Bafilisiti kūpyenelwa Misipa

⁵ Hūna ū Sang'weli ūhaya, “Balaalīkagi pye a Baisilaeli bize kwibilinga Misipa, namulombele kūlī SEEBA.”

⁶ Aho bibilinga ī Misipa, būdaha minzī būgita kū būtongi bo ng'wa SEEBA; ū lūshikū lwenūlo būfunga na kūntambūūlīla ū SEEBA balīhaya, “A bise tūlī bahūbi ū kūlī SEEBA.” A Baisilaeli aho balī ī Misipa būng'wanukūla ū Sang'weli kūbiza ntongeeji wabo.

⁷ Alīyo a Bafilisiti aho bigwa gīkī a Baisilaeli bikumingaga Misipa, a basugi ba Bafilisiti būlinha bajile ūko baalī a Baisilaeli kūjūūbadumīla. A Baisilaeli aho bigwa gīko bogoha no kūlwa nguno ya Bafilisiti.

⁸ Būng'wīla ū Sang'weli, “Yaya ū kooya ū kūnīlīīla ū SEEBA Mulungu wise kūlwa nguno yise, atūpīje ū mu nkono gwa Bafilisiti.”

⁹ Hūna ū Sang'weli ūsola ng'wana wa ng'holo ataalī ong'ha, ūnsīnza ūmfunya kūlī SEEBA alī ngima gīko, kūbiza shitambò sha kūpemvwa. Ūnīlīīla ū SEEBA kūlwa nguno ya Baisilaeli; nang'hwe ū SEEBA ūng'wigwa, wīta gīt'ūmo walombelaga.

¹⁰ Ū Sang'weli aho alīfunya ī shitambò, a Bafilisiti būbasanga a Baisilaeli kwiza kūbadumīla. Alīyo ū lūshikū lwenūlo ū SEEBA ūbapalalūkīla būpalalūki būtaale no a Bafilisiti, kūshisha būzwangana kībi kībi; a Baisilaeli būbatūla būbapyena.

¹¹ A Baisilaeli bīnga ī Misipa, būboolomya nhambo a Bafilisiti; būja bakūbabūlagaga nzīla ngima, kūjūshika kū sīlīlī ya Beeti-kaali.

Sang'weli kwīmīīlija iwe

¹² Hūna ū Sang'weli ūsola iwe ūlyīmīlīja ha gatī ya Misipa na Sheni; ūliilīka lina lya Ebenezeeli, nguno akahaya, “Ū SEEBA ataalī ūtūgunanha kūshisha haha.”

¹³ Na lūūlū a Bafilisiti būbiza baapyenwa gete, batashokile hangī kwiza kūbikolosha a Baisilaeli ū mu sī yabo. Ū mu shikū jose ja būlamu bo ng'wa Sang'weli, ū nkono go ng'wa SEEBA gwalī gūbahangīgije a Bafilisiti.

¹⁴ Ī mizengo īyo Bafilisiti balī babataaja Baisilaeli, kwandīja Ekuloni kūshisha Gaasi, bīshosha a Baisilaeli, pyī nī sī īyo yalī bbihī bbihī najo ī mhandī jenījo, a Baisilaeli būbataaja a Bafilisiti. Hama na a ha gatī ya Baisilaeli na Baamooli yūbiza ho mhola.

¹⁵ Ū Sang'weli akagwīta ū nīmo gwa kūbatongeela a Baisilaeli kūshisha shikū ja būlamu wakwe bose.

¹⁶ Būlī ng'waka wabayeleelaga a Baisilaeli, kwandīja Beeseli, hūna Giligaali, hama Misipa; waja akūbalamulaga ū mu mapandī gose genayo.

¹⁷ Hanuma washoka Lama, nguno h'ūko yalī ī kaya yakwe, nū kwene wabalamulīlaga koi a Baisilaeli. Nīyo ū kwene walī wazenga na ng'walīlo kūlwa ng'wa SEEBA.