1 Sang'weli 4 - Bibilia Ilagano Lya Kale 2015

Baisilaeli kūpyenwa na Bafilisiti

¹ A Baisilaeli a bose bandya kūgūpandīka ū mhayo go ng'wa SEEBA mu nzīla ya ng'wa Sang'weli. Ū mu shikū jenījo a Baisilaeli bakingīla mu būlūgū wa kwilwisha na Bafilisiti; būūkakoma ng'hambī yabo Ebenezeeli, a Bafilisiti būkoma ī ng'hambī yabo Afeki.

² A Bafilisiti bilwisha nabo a Baisilaeli; ū būlūgū aho waseba gete a Baisilaeli būtindwa. Banhū babo ba kūshika gītī shihūmbī shinè būbūlagwa na Bafilisiti ū kū būlūgū kwenūko.

³ Bahayūshoka ū kū ng'hambī a bashilikale, a banamhala ba Baisilaeli bibūūja, “Nibūlī ī lelo ū SEEBA watūtūūla mu būpyenwa būtaale gīkī ū kū būtongi wa Bafilisiti? Tūjagi ī Shilo tūkalyenhe ī lisandīko lya būlagane bo ng'wa SEEBA, lībize ū kū būtongi wise, atūpīje ū mu nkono gwa banishi bise.”

⁴ Būtūma banhū ī Shilo būūkalyenha ī lisandīko lya būlagane bo ng'wa SEEBA ū Ndūji wa shose, ūyo isumbī lyakwe lya būtemi līlī ha gatī gatī ya makelubi. Na a bitūnja ba ng'wa Eli a ba Hofuni nū Finehasi būja kwikala nalyo ī lisandīko lya būlagane bo ng'wa SEEBA.

⁵ Aho lyashika ū mu ng'hambī ī lisandīko lya būlagane bo ng'wa SEEBA, pye a Baisilaeli būyega no, būyoga na'ilaka lya higūlya no no no, kūshisha ī sī yūtingina.

⁶ A Bafilisiti aho bīyiigwa ī yoge yenīyo būhaya, “Al'ī yombo ī nhaale yenīyo ya kinehe ū kū ng'hambī ya Bahebulania?” Aho badeeba gīkī lizaga isandīko lya ng'wa SEEBA ū kū ng'hambī,

⁷ a Bafilisiti bogoha; bandya kwiwīla, “Biza bamulungu ū mu ng'hambī, twaacha! Gūtaalī kwilonga mhayo gūlī gīko na kamò yaya.

⁸ Twaashila! Nani akūtūpīja ū mu nkono gwa bamulungu a ba nguzu benaba? A bamulungu benaba angū hū bene abo bakabatūla bana Misili na mahūūya ga būlī mbika ng'witogolo.

⁹ Bing'we Bafilisiti timbyagi ng'holò mulwe nyagosha, ūlū ng'ūdondosha bakūmusuga a Bahebulania, gīt'ūmo ng'walī mubasugīlile a bing'we; ipandagi chanda mulwe nyagosha.”

¹⁰ Na ng'hana a Bafilisiti būūlwa, būbapyena a Baisilaeli; būlī ng'wene ūpeela kwiheema lyakwe. Ū būbūlagi būbiza būtaale no, a Baisilaeli būjimīīja bashilikale shihūmbī makūmi adatū ba kūshimīza wa magūlū.

¹¹ Nī lisandīko lya ng'wa SEEBA lyūding'wa, pye na a bitūnja ba ng'wa Eli būbīlī wabo, ū Hofuni nū Finehasi, būbūlagwa.

Kūcha kwa ng'wa Eli

¹² Ū lūshikū lwenūlo munhū ūmò wa mu lūganda lo ng'wa Benjamini ūpeela kūfuma ū kū būlūgū, ūja ī Shilo na shizwalo shakwe shitandagūkile, hama ookalaga lūbuubu ū kū ntwe.

¹³ Aho alīshika, ū Eli walī wigasha hisumbī lyakwe hihī na'ikūūwa alindanile; nguno ī ng'holò yakwe yalī yogoha no kūlwa isandīko lya ng'wa SEEBA. Ū munhū ng'wenūyo wahayūshika ū mu nzengo, aho wabawīla īyo yalī yilonga, pyī ū nzengo gūūtandūka kūlīla ng'hūngū.

¹⁴ Ū Eli aho wīyigwa ī ng'hūngū ūbūūja, “Ni yaakī hangī ī ng'hūngū yenīyo?” Ū munhū ng'wenūyo ūja wangū aho walī ū Eli.

¹⁵ Ī shikū jenījo ū Eli walī namhala wa būlamu wa myaka makūmi anaane na kenda; nīyo na miso gakwe gaalī gooya ū kūbona.

¹⁶ Na lūūlū ū munhū ng'wenūyo ūng'wīla ū Eli, “Baba nafuma ū kū būlūgū ī haha yenīyī,” nīnga ko lelo īyī, niza nalīpeela. Ū Eli ūbūūja, “Yaja ko kinehe ng'wana wane?”

¹⁷ Ū munhū ūyo akeenha mhola ūhaya, “A Bafilisiti babapeeja a Baisilaeli; nī libità lyajimīīja banhū bingī no. Na a bitūnja bako, ū Hofuni nū Finehasi baacha; nī lisandīko lya ng'wa SEEBA lyading'wa.”

¹⁸ Aho walīhaya dūhū ī lisandīko lya ng'wa SEEBA, ū namhala Eli ūgwa sagaalī ū kūfuma a h'isumbī lyakwe. Walī bbihī na mita, ūgwīla henaho ūbīnzīka ī nhingo ūcha, nguno walī namhala; hangī ū mīlī gwakwe gwalī ndito. A Baisilaeli walī wabatongeela ikanza lya myaka makūmi anè.

¹⁹ Walīho na ng'wīnga wakwe, nke o ng'wa Finehasi, walī nda ya bbihī kūbyala; aho wajipandīka ī mhola gīkī lyadimagwa ī lisandīko lya ng'wa SEEBA, nū ise būkwi waacha; nū ngoshi wachīlaga kū būlūgū, ū nkīma ng'wenūyo ūlung'wa būsūngū wa kūbyala ī likanza lyenīlo; alīyo ū būsūngū būbiza wakīlanīja no,

²⁰ būmūlaga. Aho alī ng'wikanza lya kūcha a bakīma abo bangunanhaga būng'wīla, “Timbyaga ng'holò wabyala ng'wana ngosha.” Alīyo atoolekegije gīkī akabigwa nūūlū kūbashokeja.

²¹ Ū ng'wana ūng'wilīka lina lya Ikaboodi, kūnū alīhaya; “Lyīngaga ī likūjo ū mu Isilaeli!” Nguno ī lisandīko lya ng'wa Mulungu lyalī lyading'wa, nū nkwiye ūcha hamò nū ngoshi wakwe.

²² Ūhaya, “Ī lisandīko lya ng'wa Mulungu lyadimagwa, lyīngaga ī likūjo ū mu Baisilaeli!”