1 Sang'weli 29 - Bibilia Ilagano Lya Kale 2015Bafilisiti kūnema Daūdi kū būlūgū 1 A mabità ga Bafilisiti gakibilingīla Afeki pye a gose; a Baisilaeli a bene būtūūla ī ng'hambī yabo bbihī na lwinzī lwa Yezileeli. 2 A basugi ba Bafilisiti aho bakūhūūmaga bajile na mabità gabo ga banhū magana magana na ga shihūmbī shihūmbī, ū Daūdi nang'hwe walīko ū kū numa washimīzaga na a banhū bakwe hamò nū Akishi. 3 A bataale ba mabità ga Bafilisiti būbūūja, “Ali a Bahebulania aba nabo hangī balīta kī a heneha?” Ū Akishi ūbashokeja a bataale ba mabità ga Bafilisiti ūhaya, “Ū ng'wenūyū atī Daūdi ūyo walī ntūmami o ng'wa Saulo ū ntemi wa Baisilaeli? Angū nīyo wamalaga shikū ja kūkīla ha ng'waka ngima alī hamò naane; hama kūfuma lūshikū lwa kūlekana kwakwe nū Saulo nataalī kūmona shisembo nūūlū hado.” 4 Alīyo a bataale ba mabità ga Bafilisiti būndakīīla no; būng'wīla, “Ng'wīnjage ū munhū ng'wenūyū a henaha ashoke ūko wang'helela kwikala. Atūdūla ū kūja hamò nise ū kū būlūgū; nguno ū ng'wikanza lya būlūgū ashikile kūtwigalūka. Ī gīsī adūgije kwiyeeja mu nzīla kī yīngī ū kūlī ise būgonzo, ūlū ītī kūyūūtīna mitwe ya banhū bise dūhū? 5 Ū ng'wenūyū, atī ng'wene ū Daūdi ūyo bīmbaga bakūhelelekejaga būhaya gīkī, ‘Ū Saulo wabūlagile maashihūmbī gakwe, ū Daūdi makūmi ga maashihūmbī gakwe?’” 6 Hūna ū Akishi ūng'witana ū Daūdi ūng'wīla, “Nalīkwilahīlīla mu lina lya ng'wa SEEBA mpanga gīkī ūlī munhū wa kūsanyiwa; ū nene ni naayega no ū kūkūsola tūje bose ū ng'wibità. Nguno kūfuma ikanza īlo wiza kwigasha hamò nane kūshisha lelo īyī, nataalī kūbona shilingo ū kūlī bebe; alīyo a bataale ba mabità balīkwitīng'wa. 7 Na lūūlū shokaga ūje mu mhola, yaya ū kwīta mhayo gose gose ūyo gūdūgije kūbipamya a basugi ba Bafilisiti.” 8 Nang'hwe ū Daūdi ūbūūja, “Mm! Ū nene naahūbaga mhayo kī? Wabonile būbi kī ū kūfuma ū kūlī nene ntūmami wako kwandīja aho nizīlile kwikala nang'ho kūshisha lelo īyī? Nibūlī natizūzunīlījiwa ū nene ū kūja nakilwishe na a banishi ba ng'wa baba būgonzo ū ntemi?” 9 Ū Akishi ūnshokeja ūng'wīla, “Ū nene namanile gīkī ū mu miso gane oolekije wiza būtaale no, gītī malaika o ng'wa Mulungu; alīyo naaheene a bataale ba mabità ga Bafilisiti baahayaga gīkī, ‘Yaya ū ng'wenūyo ū kūja hamò nise ū kū būlūgū.’ 10 Alilūūlū, ī ntondo ipuunage ū kūmisha hamò na a batūmami ba ntaale wako, abo wizile nabo; ī līīmi ūlū līlīfuma ning'we mubūūke mushoke.” 11 Ng'hana ū Daūdi na a banhū bakwe būbūūka dilū, būshoka ū kū sī ya Bafilisiti; a boi a Bafilisiti bakūlinha bajile Yezileeli. |
Sukuma Bible © Bible Society of Tanzania, 2019.
Bible Society of Tanzania